ޓެލެވިޒަން ސީރީސްތަކުން ބެލުންތެރިންގެ ހިތް ފަތަހަކުރި ބަތަލާ މޯނީ ރޯއި ފިލްމަކަށް ސޮއިކުރިކަން ސޯޝަލް މީޑިއާ މެދުވެރިކޮށް ހިއްސާކޮށްފިއެވެ.
ފިލްމީ ދާއިރާގެ އިތުރުން ރެސްޓޯރެންޓް ވިޔަފާރީގައި ވެސް މަސައްކަތް ކުރަމުން އަންނަ ބަތަލާ ސޮއިކޮށްފައި ވަނީ މަޝްހޫރު ފިލްމު "ޚުދާ ހާފިޒު"ގެ ޑައިރެކްޓަރު ފާރޫކް ކަބީރު "ސަލަކާރު"ގެ ނަމުގައި އުފައްދާ ފިލްމަކަށެވެ.
މި ފިލްމަށް ސޮއިކުރިކަން އިއުލާނު ކުރަމުން ބަތަލާ ވަނީ ފިލްމު ސެޓުގައި ޑައިރެކްޓަރު ފާރޫކްއާ އެކު ނަގާފައިވާ ފޮޓޯއެއް ވެސް އިންސްޓަގްރާމް މެދުވެރިކޮށް ބެލުންތެރިންނާ ހިއްސާކޮށްފައެވެ.
މޯނީ އާ ފިލްމަކަށް ސޮއިކުރިކަން އިއުލާނުކުރި ނަމަވެސް ފިލްމުގައި ބަތަލާ ފެންނާނީ ކޮންކަހަލަ ރޯލަކުން ކަމެއް ހާމަކޮށްފައެއް ނުވެއެވެ.
ފިލްމުގެ ސަސްޕެންސް އިތުރުކޮށްލުމުގެ މަގްސަދުގައި މޯނީ ފިލްމުގައި ކުޅޭ ރޯލާ ގުޅޭ މައުލޫމާތު ވަނީ ސިއްރުކުރެވިފައި ކަމަށް ރިޕޯޓުތައް ބުނެއެވެ. މިހާރު ފިލްމުގެ މަސައްކަތް ފަށާފައިވާއިރު ބެލުންތެރިންނަށް ފިލްމު ގެނެސްދޭން ނިންމާފައި ވަނީ އަންނަ އަހަރުއެވެ.
މޯނީ ރޯއި ފިލްމު "ޚުދާ ހާފިޒު"ގެ ޑައިރެކްޓަރު ފާރޫކްއާ އެކު--ފޮޓޯ/ބޮލީވުޑްހަންގާމާ
މޯނީ އެންމެފަހުން ބެލުންތެރިންނަށް ފެނިފައި ވަނީ މި އަހަރު ރިލީޒްކުރި އެކްޓަރު ޖޯން އަބްރަހަމްގެ ފިލްމު "ވޭދާ"ގެ އައިޓަމް ލަވަޔަކުންނެވެ. މިހާތަނަށް މޯނީ ފެނިފައިވާ މަގުބޫލު ފިލްމުތަކުގެތެރޭ ބޮޑު ކާމިޔާބީއެއް ބޮކްސް އޮފީހުގައި ހޯދި ފިލްމު "ބްރައްމަސްތުރާ"، "ބްލެކްއައުޓް" ހިމެނެއެވެ.
ފިލްމު "ސަލަކާރު"ގެ މަސައްކަތް ބަތަލާ ފަށާފައިވާއިރު ޕޯސްޓު ޕްރޮޑަކްޝަން މަސައްކަތުގައި "ދަ ވާޖިން ޓްރީ"ގެ ނަމުގައި މޯނީ މަސައްކަތްކުރި ފިލްމެއް ވެސް އެބައޮތެވެ.
މި ފިލްމު ރިލީޒް ކުރާނެ ތާރީޚެއް އަދި އިއުލާނެއް ނުކުރެއެވެ. ފިލްމުތަކުގެ އިތުރުން މޯނީ ވަނީ މި އަހަރު ޑިޒްނީ ހޮޓްސްޓާގައި ޕްރީމިއާކުރި ދަރުމާ ކުންފުނީގެ ފިލްމު "ޝޯޓައިމް"ގެ ވެސް މުހިއްމު ރޯލަކުން ފެނިފައެވެ.