ހަންގޭރީގެ އެންމެ ބޮޑު އެއް ޓުއާ އޮޕަރޭޓަރާ ގުޅިގެން މޯލްޑިވްސް މާކެޓިން އެންޑް ޕަބްލިކް ރިލޭޝަންސް ކޯޕަރޭޝަން (އެމްއެމްޕީއާރުސީ)ން އިރުމަތީ ޔޫރަޕްގައި ރާއްޖެ އިޝްތިހާރުކޮށްފިއެވެ.
އެމްއެމްޕީއާރުސީން ބުނީ، 1000 ޔޫޓީ ކިޔާ އެ ޓުއާ އޮޕަރޭޓަރާ ގުޅިގެން ހަންގޭރީގެ ބުޑަޕެސްޓްގައި ޚާއްސަ "ބީޓޫބީ ނެޓްވޯކިން އިވެންޓް"އެއް ކާމިޔާބުކަމާއެކު ބާއްވައިފައިވާ ކަމަށެވެ.
އެ އިވެންޓު ބާއްވާފައި ވަނީ މިދިޔަ ބުރާސްފަތި ދުވަހުގައެވެ.
ވިޒިޓް މޯލްޑިވްސްގެ އިތުރުން ރާއްޖޭގެ ފަތުރުވެރިކަމުގެ ސިނާއަތުގެ ތިން ކުންފުންޏަކުން ހަ މަންދޫބުން މި އިވެންޓުގައި ބައިވެރިވިއެވެ. އޭގެތެރޭގައި ހިމެނެނީ ރޮބިންސަން މޯލްޑިވްސްއާއި ކަނޑިންމަ މޯލްޑިވްސްއާއި އިންޓުއާ މޯލްޑިވްސްއެވެ.
އެމްއެމްޕީއާރުސީން ބުނީ މި ހަރަކާތުގެ މައިގަނޑު މަގުސަދަކީ އިރުމަތީ ޔޫރަޕްގެ މާކެޓުގައި ރާއްޖޭގެ ބްރޭންޑް ޕްރެޒެންސް ހަރުދަނާކޮށް އެޖެންޓުންނާއި އިންޑަސްޓްރީގެ ފަރާތްތަކާ ގުޅުން ބަދަހިކުރުން ކަމަށެވެ.
ވިޒިޓް މޯލްޑިވްސްއިން މި ހަރަކާތުގައި 1000ޔޫޓީއާ ގުޅިގެން ހަންގޭރީގެ 40 ޓްރެވަލް އެޖެންޓުން އެއްތަނަކަށް ގެނެސް، ރާއްޖެ ޕްރިމިއާ ޑެސްޓިނޭޝަނެއްގެ ގޮތުގައި އިޝްތިހާރު ކޮއްފައިވެއެވެ.
ޔޫޕީ ހޮޓެލް ބުޑަޕެސްޓްގައި ކުރިއަށްދިޔަ މި ހަރަކާތުގައި އެމްއެމްޕީއާރުސީގެ ޑެސްޓިނޭޝަން ޕާޓްނަރުންގެ ޕްރެޒެންޓޭޝަންތައް ވަނީ ދައްކާލާފައެވެ.
އެމްއެމްޕީއާރުސީ، ވިޒިޓް މޯލްޑިވްސް އާއި 1000 ޔޫޓީ ގުޅިގެން ހަންގޭރީގެ ބުޑަޕެސްޓްގައި ހާއްސަ "ބީޓޫބީ ނެޓްވޯކިން އިވެންޓް"ގެ ތެރެއިން --- ފޮޓޯ/ އެމްއެމްޕީއާރުސީ
މި ޕްރެޒެންޓޭޝަންތަކުގެ ސަބަބުން ހަންގޭރީގެ ޓްރެވަލް އެޖެންޓުންނަށް ރާއްޖޭގެ ފަތުރުވެރިކަމުގެ ސިނާއަތާ ބެހޭ ގޮތުން އަގުހުރި މައުލޫމާތުތަކެއް ލިބ،ި ބައިވެރިވި ކުންފުނިތަކުގެ ތަފާތު ހުށަހެޅުންތަކާ ބެހޭ އިތުރު މައުލޫމާތުތައް ލިބިފައި ވާކަމަށް އެމްއެމްޕީއާރުސީއިން ވަނީ ބުނެފައެވެ.
"1000 ޔޫޓީއާއެކު ހަންގޭރީގައި މި ބީޓޫބީ ހަރަކާތް ބޭއްވުމަކީ އަޅުގަނޑުމެންނަށް ލިބުނު ވަރަށް ބޮޑު ކާމިޔާބީއެއް. އިރުމަތީ ޔޫރަޕުން ރާއްޖެ އަންނަ ފަތުރުވެރިންގެ އަދަދު އިތުރުވަމުން އަންނަ އިރު ހަންގޭރީގެ ޓްރެވަލް ޓްރޭޑާއެކު އޮންނަ ގުޅުން އިތުރަށް ބަދަހިކުރުމަށް ލިބުން މިއީ ވަރަށް އަގުހުރި ފުރުސަތެއް،" އެމްއެމްޕީއާރުސީގެ ސީއީއޯ އިބްރާހިމް ޝިއުރީ ވިދާޅުވިއެވެ.
އެ ކޯޕަރޭޝަނުން ބުނީ މި ހަރަކާތުގައި ރާއްޖޭގެ ފަތުރުވެރިކަމުގެ ދާއިރާގައި ހަރަކާތްތެރިވާ ޕާޓްނަރުންނާއެކު ވިޔަފާރީގެ ފުރުސަތުތައް މަޝްވަރާކުރުމަށް އިވެންޓުގެ ބައިވެރިންނަށް ގިނަ ފުރުސަތުތަކެއް ލިބުނުކަމަށެވެ.
ރާއްޖޭގެ ތަފާތު ތަޖުރިބާތަކާއި ރީތިކަމަށް އަލިއަޅުވާލައި، މި ހަރަކާތުގައި ގަތަރު އެއާވޭސް އާއި ފްލައި ދުބާއީއިން ބުޑަޕެސްޓްއާއި ރާއްޖެއާ ދެމެދުގާ ހުރި ކަނެކްޓިވިޓީ އޮޕްޝަންތައް ހުށަހަޅާފައި ވާކަމަށްވެސް ވަނީ ބުނެފައެވެ.
އެމްއެމްޕީއާރުސީ، ވިޒިޓް މޯލްޑިވްސް އާއި 1000 ޔޫޓީ ގުޅިގެން ހަންގޭރީގެ ބުޑަޕެސްޓްގައި ހާއްސަ "ބީޓޫބީ ނެޓްވޯކިން އިވެންޓް"ގެ ތެރެއިން --- ފޮޓޯ/ އެމްއެމްޕީއާރުސީ
މީގެ އިތުރުން ރޮބިންސަން މޯލްޑިވްސް، ކަނޑިންމަ މޯލްޑިވްސް އަދި އިންޓުއާ މޯލްޑިވްސްގެ އެކިއެކި ޚިދުމަތްތައް ދައްކުވައިދޭ ޚާއްސަ މިނީ ވޯކްޝޮޕެއް ވެސް މިހަރަކާތުގައި ކުރިއަށްދިޔަ ކަމަށް އެ ކޯޕަރޭޝަނުން ވަނީ ބުނެފައެވެ.
އިރުމަތީ ޔޫރަޕުގެ މާކެޓަކީ ރާއްޖޭގެ ފަތުރުވެރިކަމުގެ ސިނާއަތަށް ވަރަށް ބޮޑު ފުރުސަތުތަކެއް އޮތް މާކެޓެކެވެ. މިއަހަރުގެ އޮގަސްޓުމަހުގެ 31 ވަނަ ދުވަހުގެ ނިޔަލަށް ހަންގޭރީއިން ރާއްޖެއަށް 12،500 ފަތުރުވެރިން ވަނީ ޒިޔާރަތްކޮށްފައެވެ.