މާލޭ އުސްފަސްގަނޑާ ދިމާ ކަނޑުމަތީގައި މިއަދު ފެނުނު މީހާ އޮތީ މަރުވެފައި ކަމަށާއި އެއީ ދިވެހި ފިރިހެނެއް ކަމަށް ފުލުހުން ބުނެފިއެވެ.
ފުލުހުން މީޑިއާތަކާ ހިއްސާކުރި މެސެޖެއްގައި ބުނީ ކަނޑުމަތީގައި މީހަކު މަރުވެފައި އޮތް ކަމުގެ ރިޕޯޓު ލިބުނީ 17:06ހާއިރު ކަމަށެވެ.
އެ ރިޕޯޓު ލިބުމާއެކު ފުލުހުން އެ ސަރަހައްދުގައި ހަރަކާތްތެރިވެ، އެ މީހާ އައިޖީއެމްއެޗަށް ގެންގޮސްފައިވާ ކަމަށް ފުލުހުން ބުންޏެވެ. އެ މީހާ ހޮސްޕިޓަލަށް ގެންދިޔައިރުވެސް މަރުވެފައިވާ ކަމަށް އައިޖީއެމްއެޗާ ހަވާލާދީ އެ އިދާރާއިން ބުންޏެވެ.
އެ ފިރިހެން މީހާއާ ގުޅޭ ގޮތުން ފުލުހުން އިތުރަށް ބުނީ، މަރުވެފައި އޮއްވައި ފެނުނީ ހ. ވެލަސްފަރުގެ، އިބްރާހީމް ޖައުހަރީ (62އ) ކަމަށެވެ.
ޖައުހަރީ، އާންމު ނަމުންނަމަ ޖައުފަރަކީ އިދިކޮޅު އެމްޑީޕީގައި، އިސްލާހީ ހަރަކާތްތަކުގައި އިސްކޮށް ހަރަކާތްތެރިވެފައިވާ މީހެކެވެ.
ފުލުހަކާއި އިތުރު މީހަކު ވެގެން، އުސްފަސްގަނޑު ކައިރީ މޫދުން މީހަކު ނަގާ މަންޒަރު ފެންނަ ވީޑިއޯއެއް ސޯޝަލް މީޑިއާގައި ވަނީ އާންމުވެފައެވެ.
ފުލުހުން އަންނަނީ އެ މައްސަލަ ތަހުގީގު ކުރަމުންނެވެ.