ސްޕެނިޝް ލަލީގާގައި އެންމެ ފަހުގެ ޗެމްޕިއަން ރެއާލް މެޑްރިޑާއި ވާދަވެރި އެތުލެޓިކޯ މެޑްރިޑް ބައްދަލުކުރި މެޗު އެއްވަރުވެއްޖެއެވެ.
އެތުލެޓިކޯގެ ދަނޑުގައި ކުޅުނު މި މެޗު ނިމުނީ 1-1 އިން ދެ ޓީމު އެއްވަރުވެގެންނެވެ.
މެޗުގެ ފުރަތަމަ ހާފުގައި ދެ ޓީމުން ކުރެ އެއްވެސް ޓީމަކަށް ލަނޑެއް ކާމިޔާބު ކުރެވޭގޮތެއް ނުވިއެވެ. ނަމަވެސް، ލަނޑު ޖަހާނެ ފުރުސަތު ދެ ޓީމަށް ވެސް ލިބުނެވެ.
ފުރަތަމަ ލަނޑު ޖަހައި، މެޗުގެ ލީޑު ނަގާފައިވަނީ ރެއާލުންނެވެ. މި ލަނޑު އެ ޓީމަށް މެޗުގެ 64 ވަނަ މިނެޓުގައި ކާމިޔާބުކޮށްދިނީ އެޑާ މިލިޓާއޯއެވެ. މި ލަނޑު ޖެހިތާ މާ ގިނައިރުތަކެއް ނުވެ، ރެއާލްގެ ކީޕަރު ޓީބޯ ކޯޓުއާ ހުރި ގޯލާ ދިމާލަށް އެތުލެޓިކޯގެ ސަޕޯޓަރުން އެއްޗެހި އުކާ ކަމުގެ ޝަކުވާ އޭނާ ކުރުމާ އެކު ރެފްރީ ވަނީ ދަނޑުގެ ސްޕީކަރު ސިސްޓަމްތައް ބޭނުންކޮށް އެ ކަން ނުކުރުމަށް އާންމު ބަޔާނެއް އިއްވާފައެވެ.
އެ ވަރުން އެކަން ނުހުއްޓުމުން ދެ ޓީމުގެ ކޯޗުންނާއި މަޝްވަރާ ކުރުމަށް ފަހު ރެފްރީ މެޗު މެދުކަނޑާލިއެވެ. އެތުލެޓިކޯގެ ސަޕޯޓަރުންގެ މި އަމަލުތައް ހުއްޓުވަން އެތުލެޓިކޯގެ ކުޅުންތެރިން ވެސް ވަރަށް މަސައްކަތްކުރިއެވެ.
މި ބަޔަށް ފަހު އަލުން މެޗުގެ ކުޅުން ފެށިފައިވަނީ 20 މިނެޓް ފަހުންނެވެ. މެޗު ރެއާލުން ކާމިޔާބުކޮށްފާނެހެން ހީވެފައިވަނިކޮށް މެޗުގެ އިތުރު ވަގުތުގެ ފަސްވަނަ މިނެޓުގައި އެތުލެޓިކޯގެ އެންގެލް ކޮރެއާ ޖަހާދިން ލަނޑާ އެކު މެޗު ނިމިގެންދިޔައީ ދެ ޓީމު އެއްވަރުވެގެންނެވެ. މި ލަނޑު އެންމެ ފުރަތަމަ އޮފް ސައިޑް ކަމަށް ދެއްކި ނަމަވެސް ވީއޭއާރުން ބެލުމަށް ފަހު އެ ލަނޑު ވަނީ ބަލައިގެންފައެވެ.
މެޗަށް ފަހު ވާހަކަދައްކަމުން އެތުލެޓިކޯގެ ކޯޗު ޑިއޭގޯ ސިމިއޯނީ ވަނީ ކުރިން އެތުލެޓިކޯއަށް ކުޅެފައިވާ ރެއާލްގެ ކީޕަރު ކޯޓުއާއަށް ފާޑު ކިޔާފައެވެ.
އޭނާ ބުނީ، ލަނޑެއް ޖެހުމުން އުފާފާޅު ކުރުމަކީ އެންމެ ރަނގަޅު ކަމެއް ކަމަށާއި ނަމަވެސް ކޮޓުއާ އެތުލެޓިކޯގެ ސަޕޯޓަރުންނާ ދިމާއަށް އެނބުރި އުފާފާޅު ކުރުމުން ސަޕޯޓަރުން ހިތްހަމަ ނުޖެހުނީ ކަމަށެވެ. އަދި، ސަޕޯޓަރުންނަކީ ހަމަ ތިބެފާ ރުޅި އަންނަ ބައެއް ނޫން ކަމަށާއި އެކަން ވާނީ ރުޅިއެރުވީމާ ކަމަށް އޭނާ ބުންޏެވެ.
ރެއާލްގެ ކޯޗު ކާލޯ އެންޗެލޯޓީ ވަނީ މެޗު ހުއްޓާލުމަށް ރެފްރީ ނިންމި ނިންމުމަށް ތާއީދުކޮށްފައެވެ. އެންމެ ފަހު ވަގުތު ބައިކޮޅަށް ވަން ލަނޑާ މެދު ހިތްހަމަނުޖެހުމުގެ ބަދަލުގައި އޭނާ އެކަން ނަގަނީ ރަނގަޅު ގޮތުގައި ކަމަށާއި މިއީ އެއްވަނައިގައި އޮތް އެފްސީ ބާސެލޯނާއާ ކައިރިއައް ޖެހެލެވުނު އެއް ޕޮއިންޓްގެ ގޮތުގައި ސިފަކުރިއެވެ.
މެޗު އެއްވަރުވުމުން ރެއާލް މިހާރު އޮތީ ކުޅުނު އަށް މެޗުން ލިބިފައިވާ 18 ޕޮއިންޓާ އެކު ތާވަލުގެ ދެވަނައިގައެވެ. އެއީ، ބާސާއަށް ވުރެ ތިން ޕޮއިންޓް ފަހަތުންނެވެ. މެޗުން މޮޅުވި ނަމަ ރެއާލަށް ބާސާއާ އެއް ޕޮއިންޓް ގާތަށް ޖެހިލެވުނީހެވެ. މެޗުން ލިބުނު ޕޮއިންޓާ އެކު އެތުލެޓިކޯ އޮތީ 16 ޕޮއިންޓާ އެކު ތާވަލުގެ ތިންވަނައިގައެވެ.