މިދިޔަ އަހަރު މޯލްޑިވްސް އެއާޕޯޓްސް ކޮމްޕެނީ (އެމްއޭސީއެލް)ގައި މަސައްކަތްކުރި ހުރިހާ މުވައްޒަފުންނަށް މުސާރައާ އެކު އަހަރީ ބޯނަހުގެ ގޮތުގައި 25،000 ރުފިޔާ މިއަދު ޖަމާކުރަން ފަށައިފިއެވެ.
އެ ކުންފުނިން މުވައްޒަފުންނަށް އަހަރީ ބޯނަސް ދިނުމަށް ރަނގަޅު އުސޫލެއް ގެންގުޅޭއިރު، ފާއިތުވި ތިން އަހަރު އެ ކުންފުނިން ވަނީ ހުރިހާ މުވައްޒަފުންނަށް ހަމަހަމަވާ އުސޫލުގެ މަތިން 25،000 ރުފިޔާ ބޯނަސްގެ ގޮތުގައި ދީފައެވެ.
މި އަހަރު ވެސް އެމްއޭސީއެލުން ވަނީ މިދިޔަ އަހަރު އެ ކުންފުނީގައި މަސައްކަތްކުރި ކޮންމެ މުވައްޒަފަކަށް 25،000 ރުފިޔާ ޖަމާކޮށްދޭން ފަށައިފައެވެ.
މިހާތަނަށް އެމްއައިބީގެ އެކައުންޓްތަކަށް މުސާރަ ޖަމާވާ މުވައްޒަފުންނަށް މުސާރައާއެކު ބޯނަސް ލިބިފައިވާ ކަމަށް އެ މުވައްޒަފުން ބުނެއެވެ. އަދި ބީއެމްއެލްގެ މުވައްޒަފުންނަށް މިއަދުގެ ވަގުތެއްގައި ވާނެ ކަމަށް އެ މުވައްޒަފުން ބުނެއެވެ.
އެ ކުންފުނިން މީގެ ކުރިން ބުނި ގޮތުގައި، އަހަރީ ބޯނަސް ދެނީ އަހަރުގެ ހަ މަސް ދުވަހަށް ވުރެ ގިނަ ދުވަހު ވަޒީފާ އަދާކުރި މުވައްޒަފުންނަށާއި، ހަ މަސް ދުވަހު ވަޒީފާގައި އުޅުމަށް ފަހު، ކެނޑުނު މުވައްޒަފުންނަށް މަސައްކަތްކުރި ދުވަހުގެ މުއްދަތަށް ބަލާފައެވެ.
އެހެންނަމަވެސް، އަހުލާގީ މައްސަލައެއްގައި ވަޒީފާއިން ވަކިކޮށްފައިވާ މުވައްޒަފުންނަށް އެ ބޯނަސް ނުދޭނެ ކަމަށް ވެސް އެ ކުންފުނިން އޭރު ބުނެފައިވެއެވެ.
މައި އެއާޕޯޓް، ވެލާނާ އިންޓަނޭޝަނަލް އެއާޕޯޓް ހިންގާ އެމްއޭސީއެލްއަކީ ސަރުކާރާއި ރައްޔިތުން ހިއްސާވާ ކުންފުނިތަކުގެ ތެރެއިން އެންމެ ބޮޑު އާމްދަނީއެއް ހޯދާ އެއް ކުންފުންޏެވެ.