އެއާޕޯޓު ބާރުބޮޑުވުމުގެ ސަބަބުން ފަސިންޖަރުން ފުރުމުގެ ތިން ގަޑިއިރު ކުރިން އެއާޕޯޓަށް ދިޔުމަށް، މޯލްޑިވްސް އެއާޕޯޓްސް ކޮމްޕެނީ ލިމިޓެޑް (އެމްއޭސީއެލް) އިން އެދިއްޖެއެވެ.
އެމްއޭސީއެލުން އެކްސްގައި ކުރި ޕޯސްޓެއްގައި ބުނީ އުމްރާއަށް ދާ މީހުން ފުރާ ހަދާތީ، އެއާޕޯޓުގެ މަގުތަކާއި ޓާމިނަލްގައި ޓްރެފިކް ބާރު ބޮޑުވާނެ ކަމަށެވެ. އެހެންކަމުން ފުރުމުގެ ތިން ގަޑިއިރު ކުރިން ފަސިންޖަރުން އެއާޕޯޓަށް އައުމަށް ވަނީ އިލްތިމާސްކޮށްފައެވެ.
އަދި ފުރުމުގެ ތިން ގަޑިއިރުކުރިން އައިސް އެއާޕޯޓު މުވައްޒަފުންގެ އިރުޝާދުތަކާ އެއްގޮތަށް އަމަލުކުރުމަށް ވަނީ އެދިފައެވެ.
ފާހަގަކޮށްލެވޭ ގޮތުގައި މިއަހަރުގެ ދެވަނަ ޓާމުގެ މިޑް ޓާމް ބްރޭކަށް ގޮސް ސުކޫލުތައް ވެސް ވަނީ ބަންދުވެފައެވެ. އެހެންކަމުން ދަތުރުކުރާ މީހުންގެ އަދަދު އިތުރުވާނެއެވެ.
ހަމައެއާއެކު މި ދުވަސްވަރަކީ ފަތުރުވެރިކަމުގެ ސީޒަންތެރެއަށް ވުމުން ރާއްޖެއިން ބޭރުން ޒިޔާރާތްކުރާ ފަތުރުވެރިންގެ އަދަދު ވެސް އިތުރުވާނެއެވެ.
އެހެންކަމުން ރާއްޖޭގެ އެތެރޭގެ ދަތުރުތަކުގެ އިތުރުން ރާއްޖެއިން ބޭރުގެ ދަތުރުތައް ކުރާ މީހުންގެ އަދަދުވެސް ވަނީ އިތުރުވެފައެވެ.