އޮޅުވާލައިގެން ސައްހަ ނޫން ބޭންކް ޓްރާންސްފާ ސްލިޕް ބޭނުންކޮށްގެން ވިޔަފާރިކުރާ މައްސަލަތައް އިތުރުވެފައިވާ ކަމަށް ފުލުހުން މިއަދު ބުނެފިއެވެ.
ފުލުހުން ވަނީ އެ ކަންކަމަށް ސަމާލުވާން އިލްތިމާސްކޮށްފައެވެ.
މިހާތަނަށް ތަހުގީގުތަކަށް ފާހަގަކުރެވިފައިވާ ގޮތުގައި، މި ގޮތަށް އޮޅުވާލައިގެން ބޭންކު ޓްރާންސްފާ ސްލިޕްތައް ފޮނުވާ މީހުން ވަކި ޚާއްސަ އެޕްލިކޭޝަނެއް ބޭނުންކޮށްގެން ސައްހަ ނޫން ޓްރާންސްފާ ސްލިޕް އުފައްދާ ކަމަށް ފުލުހުން ބުންޏެވެ.
ޚާއްސަކޮށް ރެސްޓޯރަންޓުތަކާއި ފިހާރަތަކުން ވިޔަފާރިކުރުމަށް ފަހު އަގު ދެއްކުމުގެ ގޮތުން މި ފަދަ ފޭކު ސްލިޕްތައް ފޮނުވާ ކަމަށް ފުލުހުން ބުންޏެވެ.
އެހެންވެ، މި ފަދަ މައްސަލަތަކުން ރައްކާތެރިވާން އެކައުންޓަށް ފައިސާ ޖަމާވިކަން ޔަގީންކުރުމަށް ފަހު ނޫނީ ފައިސާގެ މުއާމަލާތްތައް ނުހިންގަން ފުލުހުން ވަނީ އެދިފައެވެ. މި ފަދަ ކަމެއްގެ ޝިކާރައަކަށްވެއްޖެ ނަމަ ލަސްނުކޮށް، ފުލުހުންނަށް ރިޕޯޓުކުރުމަށާއި އޮންލައިންކޮށް ހިންގާ ވިޔަފާރީގެ މުއާމަލާތްތަކުގައި ވެސް އިތުރަށް ސަމާލުވުމަށް ފުލުހުން ވަނީ އެދިފައެވެ.
މަކަރާއި ހީލަތް ހަދައި، އޮޅުވާލައިގެން ފައިސާ ހޯދުމާއި، ނުހައްގުން އެކި ޒާތްޒާތުގެ މަންފާތައް ލިބިގަތުމަކީ ރާއްޖޭގައި ވެސް އާންމުކޮށް ދޭތެރެ ދޭތެރެއިން ފެންމަތިވާ މައްސަލަތެކެވެ. މި ފަދަ ކުށްތަކަށް އަރައިގަންނަނީ އެކި ދުވަސްވަރު ދަނީ އެކި ކުޅުތައް ބޭނުންކޮށްގެންނެވެ.