މާލޭ ސިޓީ ކައުންސިލާއި އެގްރިކަލްޗާ އެންޑް އެނިމަލް ވެލްފެއާ މިނިސްޓްރީން ހުޅުމާލެ ފަރުކޮޅުފުށީގައި އަޅާ ފެސިލިޓީއަށް، މާލޭގައި އުޅޭ ބުޅާތައް އަންނަ ނޮވެންބަރު މަހު ގެންދަން ފެށޭނެ ކަމަށް މާލެ ސިޓީގެ މޭޔަރު އާދަމް އާޒިމް މިއަދު ވިދާޅުވެއްޖެއެވެ.
އެ ފެސިލިޓީގެ އެންމެ ފަހުގެ ތަފުސީލުތައް 'ސަން'އާ ހިއްސާކުރައްވަމުން މޭޔަރު އާޒިމް ވިދާޅުވީ، ފެސިލިޓީގެ އިމާރާތުގެ މަސައްކަތް ނިމިފައިވާ ކަމަށެވެ. ނަމަވެސް، އެ ކައުންސިލުން ވިސްނަނީ އެތަނަށް ގެންދާ ބުޅާތައް އެއް ތަނެެއްގައި ބަހައްޓައިގެން މޮނިޓާ ކުރުމަށް ކަމަށް މޭޔަރު ވިދާޅުވިއެވެ.
އެގޮތުން، އެކަމަށް ބޭނުންވާ ތިން ކޭޖެއް ހަދަމުން އަންނަ ކަމަށާއި އެ ކޭޖުތައް ހަދަނީ 20 ޕަސެންޓު ހިޔާކޮށްފައި ކަމަށް މޭޔަރު އާޒިމް ވިދާޅުވިއެވެ.
ބުޅާ ފެސިލިޓީގެ އެންމެ ފަހުގެ މަސައްކަތްތައް ކުރަނީ: ނޮވެންބަރު މަސް ތެރޭ ފެސިލިޓީއަށް ބުޅާތައް ގެންދަން ފެށޭނެ ކަށް މޭޔަރު ވިދާޅުވި --- ފޮޓޯ/ މާލެ ސިޓީ ކައުންސިލް
މޭޔަރު ވަނީ އެ ކޭޖުތަކުގެ މަސައްކަތް ކުރިއަށް އޮތް ވިހި ވަރަކަށް ދުވަސް ތެރޭ ނިންމާލެވޭނެ ކަމަށް ލަފާކުރެވައްްވައިފައެވެ. އަދި، އަންނަ ނޮވެންބަރު މަސް ތެރޭ ބުޅާތައް ފެސިލިޓީއަށް ގެންދަން ފެށޭނެ ކަން އާޒިމް ވަނީ ފާހަގަކުރައްވާފައެވެ.
އެހެންވީމާ ނޮވެންބަރު މަސް ތެރޭ އިރާދަކުރެއްވިއްޔާ މާލެ ތެރޭ އުޅޭ ބުޅާތައް ގެންދަން ފެށޭނެ އަޅުގަނޑުމެނަށްމާލެ ސިޓީގެ މޭޔަރު އާދަމް އާޒިމް
ބުޅާ ފެސިލިޓީ އެޅުމުގެ އަމަލީ މަސައްކަތް ފަށާފައި ވަނީ މާޗު މަހުގެ 19 ވަނަ ދުވަހެވެ.
މާލޭގައި ބުޅާ ގިނަވެފައިވާއިރު، އޭގެ ސަބަބުން ސިއްހީ އެތައް މައްސަލަތަކެއް ވެސް ކުރިމަތިވެއެވެ. މޭޔަރު މީގެ ކުރިން ވިދާޅުވީ މާލޭގައި ބުޅަލުގެ އާބާދީ 3،000އަށް އަރާނެ ކަމަށް ލަފާކުރެވޭ ކަމަށެވެ.
މާލޭގެ އެކި ސަރައްހައްދުތަކުގައި ބުޅާ ނަޖިސް ގިނަވާތީ، ޚާއްސަކޮށް ސަލްމާން މިސްކިތް ސަރަހައްދަށް ދާ މީހުނަށް އެ ތަކެއްޗަށް އެރޭ ހާދިސާތައް ދިމާވާކަން އާޒިމް ފާހަގަކުރެއްވިއެވެ.
ބުޅާ ފެސިލިޓިގެ އެންމެ ފަހުގެ މަސައްކަތްތައް ކުރަނީ: މޭޔަރު އާޒިމް ވިދާޅުވީ ނޮވެންބަރު މަހު ބުޅާތައް ފެސިލިޓީއަށް ގެންދަން ފެށޭނެ ކަމަށް --- ފޮޓޯ/ މާލެ ސިޓީ ކައުންސިލް
އަދި، ސަލްމާން މިސްކިތަށް ބުޅާ ވަދެގެން އެ ކައުންސިލަށް ރިޕޯޓްކޮށްފައިހުރި ކަމަށް ވެސް ވިދާޅުވިއެވެ.
ފަރުކޮޅުފުށީގައި ކެޓް ޝެލްޓަރު ގާއިމުކުރަނީ 5،000 އަކަފޫޓުގެ ބިމެއްގައެވެ. މި ތަނުގައި ކެޓް ޝެލްޓަރު ގާއިމު ކުރުމުން މާލޭގައި އުޅޭ ބުޅާތައް ގެންގޮސް، ފަރުވާ ދިނުމުގެ އިންތިޒާމު ގާއިމުކުރާނެއެވެ. މި ފެސިލިޓީއަކީ 24 ގަޑިއިރު ޚިދުމަތް ދޭނެ ފެސިލިޓީއެކެވެ.