އެކި ތަންތަނުގައި ހިންގަމުންދާ މާލެ ސިޓީ ކައުންސިލްގެ ޚިދުމަތްތައް އެއް ފުރާޅެއްގެ ދަށުން ދިނުމަށް ޓަކައި، އައު އޮފީސް އިމާރާތެއް އެޅުމުގެ މަސައްކަތް މިހާރު ކުރަމުންދާ ކަމަށް މާލޭގެ މޭޔަރު އާދަމް އާޒިމް ވިދާޅުވެއްޖެއެވެ.
މާލެ ސިޓީ ކައުންސިލްގެ އެކި ޑިޕާޓްމަންޓްތައް ހިންގަނީ އެކި ތަންތަނުގައެވެ.
މިދިޔަ ބުރާސްފަތި ދުވަހު ގްރީން ބިލްޑިންގައި ހިނގި އަލިފާނުގެ ހާދިސާގައި އެންމެ ބޮޑު ގެއްލުމެއް ލިބުނު އެއް ބަޔަކީ އެ އިމާރާތުގައި ހިންގަމުންދިޔަ މާލެ ސިޓީ ކައުންސިލްގެ އޮފީހެވެ.
މާލޭ ރައްޔިތުންގެ ރަށްވެހިކަމާއި، އަލަށް މާލެ ސަރަހައްދަށް އުފަންވާ ކުދިންގެ ލިޔެކިޔުންތައް ބެލެހެއްޓުމުގެ އިތުރުން، އިމާރާތްތަކުގެ ރެޖިސްޓްރޭޝަން ފަދަ މުހިންމު ކަންކަން ބެލެހެއްޓުމުގެ މަސައްކަތް ހިނގަމުންދާ އެ އޮފީހުގެ ލިޔެކިޔުންތަކަށް ވަނީ ގެއްލުންވެފައެވެ.
އަލިފާނުގައި ސަލާމަތްކުރި ސިޓީ ކައުންސިލްގެ ލިޔެކިޔުންތަކެއް ހަލާކުވެފައި -- ސަން ފޮޓޯ/ ނާއިޝް ނާހިދު
އަލިފާނުގެ ހާދިސާއިން ވި ގެއްލުމުގެ ވާހަކަ ހިއްސާކުރައްވާ އާޒިމް "ސަން" އަށް ވިދާޅުވީ މާލެ ސިޓީ ކައުންސިލަކީ އަށް ވަރަކަށް ތަނުގައި އެ ކައުންސިލްގެ އެކި ޑިޕާޓްމަންޓްތަކުގެ މަސައްކަތްތައް ކުރިއަށްގެންދާ ބައެއް ކަމަށެވެ. އެހެންކަމުން މޭޔަރުކަމާ ހަވާލުވެ އެންމެ ފުރަތަމަ ވެސް ހިތުލި އެއްކަމަކީ ވަކި އިމާރާތެއް އަޅައި، އެ އިމާރާތަށް އެ ކައުންސިލްގެ މަސައްކަތްތައް ބަދަލުކުރުން ކަމަށެވެ. އަދި އެ މަސައްކަތް މިހާރު ފަށައިގެން ކުރިއަށްދާ ކަމަށް އާޒިމް ވިދާޅުވިއެވެ.
"ދެން މިހާރު އަޅުގަނޑުމެން އިމާރާތް ކުރަހައި، އިމާރާތުގެ ހުރިހާ އިންޖިނިއަރިން ޑްރޯވިންގްސް ނިންމައި، އިމާރާތް އަޅާދޭނެ ފަރާތެއް ހޯދާ އެ ހުރިހާ މަސައްކަތެއް ކޮށްފައި މިހާރު މިއޮތީ. ދެން އޮތީ އެވޯޑުކުރުން،" އާޒިމް ވިދާޅުވިއެވެ.
އަލިފާނުގެ ހާދިސާގައި ލިބުނު ގެއްލުން ފާހަގަކުރައްވާ އާޒިމް ވިދާޅުވީ އަމިއްލަ އޮފީހެއް ނެތް ބަޔަކަށްވެ، އެފަދަ ހާދިސާއެއް ދިމާވުމުން މަސައްކަތްތަކަށް އަދި މުވައްޒަފުންނަށް ވެސް ދަތިތައް ދިމާވާ ކަމަށެވެ.
އެހެންކަމުން އަމިއްލަ އޮފީހެއް އަޅައި، ސަލާމަތާއި ރައްކާތެރިކަން ލިބޭ ތަނަކަށް ދާން މަސައްކަތް ކުރާ ކަމަށް މޭޔަރު ވިދާޅުވިއެވެ.
"އަޅުގަނޑުމެންގެ ބޭރު މުވައްޒަފުން ތިބޭ ތަނަކީ ވެސް އަޅުގަނޑު ގަބޫލުކުރަނީ އެއީ މީހުން ބައިތިއްބަން ހެޔޮވާވަރު ތަނެއްގައެއް ނޫން އެމީހުން އެތިބީ ވެސް. އެހެންވީމަ މުޅި ތަނުގައި އިންފްރާސްޓްރަކްޗާއެއް ނެތް ތަނެއްގައި ހަވާލުވެގެން ކުރިއަށް މިދަނީ،" އާޒިމް ވިދާޅުވިއެވެ.
އާޒިމް ވިދާޅުވީ އޭނާ އެންމެ ބޮޑު އިސްކަމެއް ދޭ އެއްކަމަކީ މުވައްޒަފުން ބިނާކުރުމުގެ އިތުރުން އިންފްރާސްޓްރަކްޗާ ޑިވެލޮޕްކުރުން ކަމަށެވެ.
"އަޅުގަނޑު ކެމްޕެއިންގައި ވެސް ބުނަމުން ދިޔައިން މާލެ ސިޓީ ކައުންސިލް ހިނގަމުންދަނީ އެކި ތަންތަނުގައޭ. އެއްތަނަކަށް ގެންނަންޖެހެއޭ. އެހެންވީމަ އެކަމަށް ބޭނުންވާ މަސައްކަތްތައް ކުރަމުން މިދަނީ،" އާޒިމް ވިދާޅުވިއެވެ.
ސިޓީ ކައުންސިލްގެ އައު އޮފީސް އިމާރާތާ ގުޅޭ އިތުރު ތަފްސީލް ނުދެއްވި ނަމަވެސް އެ މަސައްކަތް މިވަގުތު ކުރަމުންދާ ކަމުގެ ޔަގީންކަން އާޒިމް ވަނީ ދެއްވާފައެވެ.
އަލިފާނުގެ ހާދިސާގައި ސަލާމަތްކުރެވުނު ސިޓީ ކައުންސިލްގެ ލިޔެކިޔުންތަކާއި އިމާރާތްތަކުގެ ކުރެހުންތައް ތަރުތީބުކުރުމުގެ މަސައްކަތް މިހާރު ގަލޮޅު މަދަރުސާގެ ހޯލެއްގައި އަންނަނީ ކުރަމުންނެވެ.
އެ ލިޔެކިޔުންތައް ތަރުތީބުކުރެވުމުން، ލިބުނު ގެއްލުން އެނގިގެންދާނެ ކަމަށާއި، އޭރުން އެ ގެއްލުނު ލިޔެކިޔުންތައް ރިކަވާ ކުރުމުގެ މަސައްކަތް ކުރާނެ ކަމަށް ސިޓީ ކައުންސިލުން މައުލުމާތުދިނެވެ.
އަދި އެ ކައުންސިލުގެ އެންމެ ބޮޑު އަމާޒަކީ ކުރިއަށް އޮތް ތަނުގައި އަލިފާނުގެ ހާދިސާއެއް ދިމާވި ނަމަވެސް ލިޔެކިޔުންތަކަށް ގެއްލުން ނުވާނެ ގޮތަކަށް ކަންތައްތައް ބައްޓަންކުރުން ކަމަށް މޭޔަރު އާޒިމް ވަނީ ވިދާޅުވެފައެވެ.