މާލޭ ސިޓީ ކައުންސިލާއި އެގްރިކަލްޗާ އެންޑް އެނިމަލް ވެލްފެއާ މިނިސްޓްރީން ހުޅުމާލެ ފަރުކޮޅުފުށީގައި އަޅަމުންދާ ބުޅާ ފެސިލިޓީގައި މިހާރު ކުރިއަށް ދަނީ ފިނިޝިން މަސައްކަތްތައް ކަމަށް މާލޭ ސިޓީ ކައުންސިލުން މިއަދު ބުނެފިއެވެ.
އެ ފެސިލިޓީގެ މަސައްކަތުގެ ތަފްސީލް 'ސަން'އާ ހިއްސާކުރައްވަމުން މާލޭ ސިޓީ ކައުންސިލްގެ މީޑިއާ އޮފިޝަލް އައިމިނަތު ޝަތުފާ ޝަފީއު ވިދާޅުވީ، ފެސިލިޓީގެ މަސައްކަތް ވަރަށް ބޮޑަށް ނިމިފައިވާ ކަމަށެވެ.
އެގޮތުން، އެތަނުގެ އޮފީސް ބަޔާއި ބުޅާތައް ބަހައްޓާ ކޮށިތައް ނިމިފައިވާ ކަމަށް ޝަތުފާ ވިދާޅުވިއެވެ.
ޝަތުފާ އިތުރަށް ވިދާޅުވީ، އެ ބިމުގައި ގަސްތައް އިންދާފައި ހުރި ސަރަހައްދުގައި އޮތް ބައިގައި ފެސިލިޓީއާ ގުޅުން ހުރި އިތުރު ބައިތައް ހަދަމުން އަންނަ ކަމަށެވެ.
ބުޅާ ފެސިލިޓީގެ އަމަލީ މަސައްކަތް ފެށުން: މިހާރު ކުރިއަށް ދަނީ ބުޅާ ފެސިލިޓީގެ ފިނިޝިން މަސައްކަތްތައް ކަމަށް މާލެ ސިޓީ ކައުންސިލުން ބުނޭ --- ސަން ފޮޓޯ/ މޫސާ ނަދީމް
ދެން [ބުޅާ ފެސިލިޓީ] މިހާރު ފިނިޝިން މަސައްކަތް އެދަނީ ވަރަށް ބޮޑަށް ވެސް. މާލެ ސިޓީ ކައުންސިލްގެ މީޑިއާ އޮފިޝަލް އައިމިނަތު ޝަތުފާ ޝަފީއު
ނަމަވެސް، ފެސިލިޓީގެ މަސައްކަތް ނިންމައި ބުޅާތައް ގެންދަން ފެށޭނެ ތާރީޚެއް ހާމަކޮށްފައެއް ނުވެއެވެ.
މީގެއިތުރުން، މާލޭގައި ގިނަވެފައިވާ ބުޅާތައް ފަރުކޮޅުފުށީގައި އަޅާ ފެސިލީޓީގެ ބާކީ އޮތް ބިމަށް ބަދަލު ކުރުމުގެ މަސައްކަތް މިދިޔަ މެއި މަހުގެ ތެރޭގައި ފަށާނެ ކަމަށް މާލެ ސިޓީގެ މޭޔަރު އާދާމް އާޒިމް ވަނީ މީގެ ކުރިން ވިދާޅުވެފައެވެ. އެކަމަކު، އެ މަސައްކަތް އަދި މިހާތަނަށް ކުރެވިފައެއް ނުވެއެވެ.
ބުޅާ ފެސިލިޓީ އެޅުމުގެ އަމަލީ މަސައްކަތް ފަށާފައި ވަނީ މާޗު މަހުގެ 19 ވަނަ ދުވަހެވެ.
ބުޅަލެއް: މިހާރު ކުރިއަށް ދަނީ ބުޅާ ފެސިލިޓީގެ ފިނިޝިން މަސައްކަތްތައް ކަމަށް މާލެ ސިޓީ ކައުންސިލުން ބުނޭ --- ސަންފޮޓޯ/ ފަޔާޒު މޫސާ
މާލޭގައި ބުޅާ ގިނަވެފައިވާއިރު، އޭގެ ސަބަބުން ސިއްހީ އެތައް މައްސަލަތަކެއް ވެސް ކުރިމަތިވެއެވެ. މޭޔަރު މީގެ ކުރިން ވިދާޅުވީ މާލޭގައި ބުޅަލުގެ އާބާދީ 3،000 އަށް އަރާނެ ކަމަށް ލަފާކުރެވޭ ކަމަށެވެ.
މާލޭގެ އެކި ސަރައްހައްދުތަކުގައި ބުޅާ ނަޖިސް ގިނަވާތީ، ޚާއްސަކޮށް ސަލްމާން މިސްކިތް ސަރަހައްދަށް ދާ މީހުނަށް އެ ތަކެއްޗަށް އެރޭ ހާދިސާތައް ދިމާވާކަން އާޒިމް ފާހަގަކުރެއްވިއެވެ.
އަދި، ސަލްމާން މިސްކިތަށް ބުޅާ ވަދެގެން އެ ކައުންސިލަށް ރިޕޯޓްކޮށްފައިހުރި ކަމަށް ވެސް ވިދާޅުވިއެވެ.
ފަރުކޮޅުފުށީގައި ކެޓް ޝެލްޓަރު ގާއިމުކުރަނީ 5،000 އަކަފޫޓުގެ ބިމެއްގައެވެ. މި ތަނުގައި ކެޓް ޝެލްޓަރު ގާއިމު ކުރުމުން މާލޭގައި އުޅޭ ބުޅާތައް ގެންގޮސް، ފަރުވާ ދިނުމުގެ އިންތިޒާމު ގާއިމުކުރާނެއެވެ. މި ފެސިލިޓީއަކީ 24 ގަޑިއިރު ޚިދުމަތް ދޭނެ ފެސިލިޓީއެކެވެ.