އިސްރާއީލުގެ އަނިޔާވެރި ބޮޑުވަޒީރު ބެންޖަމިން ނަތަންޔާހޫގެ ތަގުރީރު އދ.ގެ އާންމު މަޖިލީހުގައި ފެށުމާއެކު، އެ މަޖިލިސް ދޫކޮށް ދިޔަ ގިނަ ގައުމުތަކާއެކު ރާއްޖެއިން ވެސް މަޖިލިސް ބޮއިކޮޓްކޮށްފިއެވެ.
ނަތަންޔާހޫގެ ތަގުރީރު ފެށުމާއެކު ގިނަ އަދަދެއްގެ ގައުމުތަކުން މަޖިލީހަށް ގޮސް ތިބި ވަފުދުތައް ވަނީ މާލަން ދޫކޮށް ނިކުމެ ބޮއިކޮޓްކޮށްފައެވެ.
އެއީ އިސްރާއިލުން ފަލަސްތީނުގެ ޣައްޒާގައި ހިންގަމުންދާ ނަސްލު ނައްތައިލުމުގެ ގަތުލުއާންމާ ދެކޮޅު ހެދުމުގެ ގޮތުންނާއި މިހާރު ލުބުނާނަށް ދެމުން އަންނަ ހަމަލާތަކާ ދެކޮޅު ހެދުމުގެ ގޮތުންނެވެ.
ގިނަ ގައުމުތަކެއްގެ ވަފުދުތައް ނުކުތްއިރު އޭގެ ތެރޭ ދިވެހިރާއްޖޭގެ ވަފުދު ވެސް ހިމެނޭކަމަށް ސަރުކާރުގެ ތަރުޖަމާނު ހީނާ ވަލީދު ވަނީ ވިދާޅުވެފައެވެ.
އެކްސްގައި މިރޭ ކުރެއްވި ޕޯސްޓެއްގައި ހީނާ ވިދާޅުވީ ރާއްޖޭގެ ވަފްދު މާލަމުން ނުކުތީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ފަލަޞްޠީނާމެދު ގެންގުޅުއްވާ ޚާއްސަ ކަމުގެ ސަބަބުން ކަމަށެވެ.
އަދި ފަލަސްޠީނުގެ ޙައްޤުގައި އެ މަނިކުފާނު ކުރައްވަމުން ގެންދަވާ ޚާއްޞަ މަސައްކަތްޕުޅަށް އިޙްތިރާމް ކުރެއްވުމުގެ ގޮތުން ކަމަށެވެ.
މީގެ އިތުރުން ހީނާ ވިދާޅުވީ ފަލަސްތީނުގެ ރައީސް މަޙްމޫދު ޢައްބާސްއާ އދ.ގައި ބައްދަލުކުރައްވައި ރައީސްވަނީ ފަލަސްތީނަކީ މިނިވަން ދައުލަތެއްގެ ގޮތުގައި ބަލައިގަތުމަށް ބައިނަލްއަޤްވާމީ ގޮތުން ކުރެވޭ މަސައްކަތްތަކުގައި ދިވެހިރާއްޖެއިން ސާބިތުކަމާއެކު ދެމި އޮންނާނެކަމުގެ ކަށަވަރުކަން ދެއްވާފައި ކަމަށެވެ.
މި މަހުގެ 25ވަނަ ދުވަހުގެ ރޭ ރައީސް އދ.ގައި ތަގުރީރު ކުރައްވަމުން ވެސް ވަރަށް ބޮޑަށް ވަނީ ފަލަސްތީނުގެ ހައްގުތައް ހޯދައިދިނުމަށް ވަކާލާތުކުރައްވައި، ދުނިޔެއަށް ވެސް ފަލަސްތީނުގެ ހިމާޔަތުގައި މަސައްކަތްކުރުމަށް ގޮވައިލައްވައިފައެވެ.
ރައީސް މުއިއްޒު ވިދާޅުވީ، އިޒްރޭލުން ފަލަސްތީނުގެ ކުށެއް ނެތް އަންހެނުންނާއި ކުޑަކުދިން މަރަމުން އެ ހިންގަނީ ޓެރަރިޒަމް ކަމަށެވެ. އެ ކަންކަމަށް ބައިނަލްއަގުވާމީ މައިދާނުގައި އިޒްރޭލު ޖަވާބުދާރީ ކުރުވަންޖެހޭ ކަމަށް ރައީސް ވިދާޅުވިއެވެ.