އިޒްރޭލު މީހުންނަށް ރާއްޖެ ނާދެވޭ ގޮތަށް އެ މީހުންގެ ޕާސްޕޯޓު މަނާކުރާނެ ކަމަށް ބުނެފައި، އެކަން ނުކޮށް، އދ.އަށް ވަޑައިގެން ފަލަސްތީނުގެ ވާހަކަދެއްކެވުމުގެ ބޭނުމެއް ނެތް ކަމަށް ވިދާޅުވެ، ކުރީގެ ރައީސް އަބްދުﷲ ޔާމީން އަބްދުލްގައްޔޫމް ރޭ ވަރަށް ބޮޑަށް ފާޑުވިދާޅުވެއްޖެއެވެ.
ރައީސް ޑރ. މުޙައްމަދު މުއިއްޒު އދ.އަށް ކުރައްވާ ދަތުރުފުޅުގެ ތެރެއިން ފަލަސްތީނުގެ ހައްގުގައި ވަރަށް ޖޯޝާ އެކު ވާހަކަދެއްކެވިއެވެ.
އިޒްރޭލުން ފަލަސްތީނުގެ އާންމުންނާއި ކުޑަކުދިން މަރައި، ސްކޫލުތަކާއި އެ ނޫން ވެސް ތަންތަނަށް ބޮން އަޅައިގެން ހިންގަނީ ސީދާ ޓެރަރިޒަމް ކަމަށް ވިދާޅުވެ، ރައީސް މުއިއްޒު ވަނީ އިޒްރޭލު ޖަވާބުދާރީ ކުރުވަން ދުނިޔޭގެ ގައުމުތަކަށް ގޮވާލައްވައިފައެވެ. އަދި، ފަލަސްތީނަށް އދ.ގެ ދާއިމީ މެންބަރުކަން ދޭން ވެސް އެ މަނިކުފާނު ގޮވައިލެއްވިއެވެ.
އެ ކަންކަމަށް އަލިއަޅުއްވައިލައްވައި ރޭ ޕީޕަލްސް ނެޝަނަލް ފްރަންޓް (ޕީއެންއެފް)އިން ބޭއްވި ޖަލްސާއެއްގައި ވާހަކަދައްކަވަމުން ޔާމީން ވިދާޅުވީ، ޣައްޒާއަށް ދެމުންގެންދާ ލާއިންސާނީ ހަމަލާތައް ކުށްވެރިކުރައްވައި، އދ.ގައި ރައީސް ތަގުރީރުކުރެއްވުމުން އުފާފުޅުވާ ކަމަށެވެ.
އެކަމަކު، އެއީ މާނައެއް އޮތް ކަމެއްތޯ އެ މަނިކުފާނު ސުވާލު އުފެއްދެވިއެވެ.
ޕީއެންއެފްގެ ޖަލްސާއެއްގައި ޔާމީން: އެ މަނިކުފާނު ވިދާޅުވީ އިޒްރޭލު ޕާސްޕޯޓު މަނާނުކޮށް ފަލަސްތީނުގެ ވާހަކަދެއްކުމުގެ މާނައެއް ނެތް ކަމަށް -- ސަން ފޮޓޯ/ އަމަން ލަތީފް
"އެ ވާހަކަދައްކާއިރު ކިހާ މޮޅުވީސްތޯ ކިހާ ފުރިހަމަ ވީސްތޯ، އެހެންވެގެން ތިމަންނަމެންނަށް އެކަން ގަބޫލުނުކުރެވޭތީއޭ ތިމަންނަމެން އިޒްރޭލުގެ ނޫނީ ޔަހޫދީ މުދާ ދިވެހިރާއްޖެއަށް އައުން ހުއްޓުވައިގެން މި ތިބީ. އެހެންވެގެންނޭ، ތިމަންނަމެން މި ތަނަށް އިޒްރޭލު މީހުން އައުން މަނާކޮށްގެން މި ތިބީ،" ޔާމީން ވިދާޅުވިއެވެ.
އެ މަނިކުފާނު ވިދާޅުވީ، ރައީސް މުއިއްޒު ވެސް އދ.އަށް ވަޑައިގެން އެ ފަދަ މޭރުމަކުން ވާހަކަދެއްކެވި ނަމަ ވަރަށް ފުރިހަމަ ވާނެ ކަމަށެވެ.
އިޒްރޭލު މީހުންނަށް ރާއްޖެ ނާދެވޭ ގޮތަށް އެ މީހުންގެ ޕާސްޕޯޓު މަނާކުރާނެކަން އިއުލާނުކުރައްވާފައި، ކުރައްވަންޖެހޭ ހުރިހާ ކަމެއް ފުރިހަމަ ކުރެއްވުމަށް ފަހުގައި ރައްޔިތުންގެ މަޖިލީހަށް އެ މަސައްކަތް ފޮނުވީ އެކަން ނުކުރާންވެގެން ކަމަށް ޔާމީން ތުހުމަތުކުރެއްވިއެވެ. އެ މަސައްކަތް ތިން މަހަށް ވުރެ ދިގުލައިގެން ދިއުމުގެ ކަންބޮޑުވުން އެ މަނިކުފާނު ފާހަގަކުރެއްވިއެވެ.
"އެންމެންނަށް އެބަ އެނގޭ ހުރިހާ ކަމެއް ސަރުކާރުގެ ހުރިހާ ހިސާބަކުން ނިންމާފައި މި ކަން ނުކުރާންވެގެން ރައްޔިތުންގެ މަޖިލީހަށް ފޮނުވާފައި މިހާރު އޮންނަތާ ތިން މަސް ދުވަހަށްވުރެ އިތުރުވެގެން މި ދިޔައީ،" ރައީސަށް ފާޑު ވިދާޅުވަމުން ޔާމީން ވިދާޅުވިއެވެ.
"އެކަމަކު، ޣައްޒާ ފެނުނީމާ އަޅުގަނޑުމެން ހަމަ ރޮވެނީ އެނގޭތޯ. ހަމަ ރޮވެނީ،"
އެއީ، އެއްވެސް މާނައެއް ހުރި ކަމެއް ނޫން ކަމަށް އެ މަނިކުފާނު ވިދާޅުވިއެވެ. ޔާމީން ވިދާޅުވީ، އދ.ގައި ގައުމުތަކުގެ ރައީސުން ތަގުރީރުކުރައްވާއިރުގައި އަޑުއައްސަވަން ތިއްބަވަނީ ހުރިހާ ގޮތަކުން ވެސް މާ ގާބިލު، މާ ކުފޫހަމަވާ މީހުން ކަމަށެވެ.
އެހެންވެ، އެ ބޭފުޅުންގެ ކުރިމަތީ ކޮންމެކޮންމެ ވާހަކައެއް ދެއްކެވީމާ އެ މީހުން ދިވެހީންނަށް މަލާމާތްކުރާނެ ކަމަށް ޔާމީން ވިދާޅުވިއެވެ.
"މިސާލަކަށް، ކިއުބާ އެންމެ ވަރުގަދަވެގެން ދިޔައިރު ފިޑޮލް ކާސްޓްރޯ ދޭ ކަހަލަ ތަގުރީރެއް މި ކުޑަކުޑަ ދިވެހިރާއްޖެއަކަށް ނުދެވޭނޭ. ނުކުރާނެ އެ ކަމެއް،" ޔާމީން ވިދާޅުވިއެވެ.
އެ މަނިކުފާނު އެފަދައިން ވިދާޅުވީ، އދ.ގެ ސަލާމަތީ މަޖިލީހުގައި ދާއިމީ ފަސް މެންބަރުންނަށް ލިބިދީފައި އޮންނަ ވީޓޯކުރުމުގެ ބާރު އުވާލަން ޖެހޭ ކަމަށް ރައީސް މުއިއްޒު ވިދާޅުވި ވާހަކަފުޅަށް އަލިއަޅުއްވާލައްވައިފައެވެ. މީގެ ކުރީގައި އދ.އަށް ވަޑައިގެން ރައީސުން، ޚާއްސަކޮށް އެންމެ ފުރަތަމަ ކުރީގެ ރައީސް މައުމޫން އަބްދުލްގައްޔޫމް ވަޑައިގެން އެ ވާހަކަފުޅު ނުދެއްކެވީ އެކަން ނޭނގޭތީ ނޫން ކަމަށް ޔާމީން ވިދާޅުވިއެވެ.
އެ މަނިކުފާނު ވިދާޅުވީ، އެ ފަދަ ވާހަކަފުޅުތައް ދެއްކެވުމުން އދ.ގައި ތިއްބަވާ ބޭފުޅުން މަލާމާތްކުރާނެ ކަމަށެވެ.
އދ.ގެ 79 ވަނަ އާންމު މަޖިލީހުގައި ވާހަކަދައްކަވަމުން ރައީސް މުއިއްޒު ވަނީ ފަލަސްތީނުގެ ހައްގުގައި ވަކާލާތު ކުރައްވާފައެވެ. އަދި، އެ ބައްދަލުވުމުގެ ހަވާސާގައި އެ މަނިކުފާނު ވަނީ ފަލަސްތީނުގެ ރައީސް މަހުމޫދު އައްބާސްއާ ވެސް ބައްދަލުކުރައްވައިފައެވެ.
އިޒްރޭލު ޕާސްޕޯޓު މަނާކުރުން ލަސްވެ، ފާޑުކިޔުން އަމާޒުވާއިރު އެކަން ނުހުއްޓޭ ކަމަށާއި އެކަން ކުރިއަށްދާ ކަމަށް ސަރުކާރު ހިންގާ ޕީއެންސީން މީގެ ކުރިން ބުނެފައިވެއެވެ.