ރައީސުލްޖުމްހޫރިއްޔާ ޑރ. މުޙައްމަދު މުއިއްޒު، ފަލަސްތީނުގެ ރައީސް ޑރ.މަޙްމޫދު އައްބާސްއާ ބައްދަލުކުރައްވައި ފަލަސްތީނުގެ ހަނގުރާމަ ހުއްޓުވުމަށް ދުނިޔޭގެ އެހީތެރިކަމަށް ގޮވާލައްވައިފިއެވެ.
ރައީސުލުލްޖުމްހޫރިޔާ ފަލަސްތީނުގެ ރައީސް ޑރ.މަޙްމޫދު އައްބާސާއި ބައްދަލުކުރައްވާފައި ވަނީ އދ.ގެ 79 ވަނަ އާންމު މަޖިލީހުގެ ހަވާސާގައި ރޭގެ ވަގުތެއްގައެވެ.
ރައީސުލްޖުމްހޫރިއްޔާ ފަލަސްތީނުގެ ރައީސް ޑރ.މަޙްމޫދު އައްބާސްއާއެކު ބޭއްވި ބައްދަލުކުރެއްވުމުގެ ތެރެއިން--- ފޮޓޯ/ ރައީސް އޮފީސް
މި ބައްދަލުވުމުގައި ފަލަސްތީނުގެ ރައީސް، އައްބާސް ވަނީ ބައިނަލްއަޤްވާމީ މުޖުތަމައުއަށް ވަރުގަދަ މެސެޖެއް ދެއްވާފައެވެ.
އައްބާސް ވަނީ ފަލަސްތީނުގެ ރައްޔިތުންނަކީވެސް އިންސާނުން ކަމަށް ވިދާޅުވެ ހަނގުރާމަ ހުއްޓުވުމަށް އެދޭކަމަށް ވިދާޅުވެފައެވެ. އަދި ފަލަސްތީނު ރައްޔިތުންގެ ހާލަތު ރަނގަޅުކުރުމަށް ދުނިޔޭގެ އެހީތެރިކަމާއި އެއްބާރުލުމަށް އައްބާސް ވަނީ ގޮވާލައްވާފައެވެ.
ރައީސުލްޖުމްހޫރިއްޔާ ފަލަސްތީނުގެ ރައީސް ޑރ.މަޙްމޫދު އައްބާސްއާއެކު ބޭއްވި ބައްދަލުކުރެއްވުމުގެ ތެރެއިން--- ފޮޓޯ/ ރައީސް އޮފީސް
ރައީސް މުއިއްޒު ވަނީ ފަލަސްތީނަށް ދިވެހިރާއްޖެއިން ދެވެން އޮތް ހުރިހާ ގޮތަކުން އެހީތެރިކަން ދެއްވާނެ ކަމުގެ ޔަގީންކަން ދެއްވައިފައެވެ. އަދި ފަލަސްތީނު ރައްޔިތުންނަށް އެ މީހުންގެ ހައްގުތައް ލިބޭނެކަމުގެ އުންމީދު ފާޅުކޮށް ފަލަސްތީނަކީ މިނިވަން ގައުމެއްގެ ގޮތުގައި ބަލައިގަތުމަށް ދިވެހިރާއްޖެއިން ކުރަމުންދާ މަސައްކަތް މެދުކެނޑުމެއްނެތި ކުރިއަށް ގެންދާނެކަމަށް ރައީސް ވަނީ ވައުދުވެ ވަޑައިގެންފައެވެ.
މި ބައްދަލުކުރެއްވުމުގައި ފަލަސްތީނުގެ ރައީސް އައްބާސް ވަނީ ދިވެހިރާއްޖެއިން ދެމުންގެންދާ ދިގު މުއްދަތުގެ އެހީތެރިކަމަށް ޝުކުރު އަދާކުރައްވާފައެވެ.
"ފަލަސްތީނު ރައްޔިތުންނަށް ދިވެހިރާއްޖެއިން ދެމުންގެންދާ އެހީތެރިކަމާއި އެއްބާރުލުން އަޅުގަނޑުމެންނަށް އަބަދުވެސް އެނގޭ، އަދި ތި ދެމުންގެންދަވާ އެއްބާރުލުމަށް އަޅުގަނޑުމެން ވަރަށް ބޮޑަށް ޝުކުރުވެރިވަން" ރައީސް އައްބާސް ވިދާޅުވިއެވެ.
މި ބައްދަލުވުމުގައި ދެ ގައުމުގެ ދެމެދުގައި އެއްބާރުލުން ދެވިދާނެ ދާއިރާތަކާ ބެހޭގޮތުންވެސް ދެ ލީޑަރުން ވަނީ މަޝްވަރާ ކުރައްވާފައެވެ.
އަދި ބައްދަލުވުން ނިންމާލާފައި ވަނީ ދެ ރައީސުންވެސް ދެ ގައުމުގެ މަސްލަހަތު ހިމެނޭ ކަންކަމުގައި އެކުގައި މަސައްކަތް ކުރުމަށާއި ރާއްޖެއާއި ފަލަސްތީނުގެ ދެމެދުގައިވާ ޑިޕްލޮމެޓިކް ގުޅުން އިތުރަށް ބަދަހިކުރުމަށް އަޒުމް ކަނޑައަޅާފައެވެ.