ފުލުހުންގެ ނަމުގައި ސައްހަ ނޫން ބަޔާނެއް ދައުރުކުރާ މައްސަލައިގައި، ސޯޝަލް މީޑިއާ އެކްޓިވިސްޓް ތޮއްޔިބު ޝަހީމް މިއަދު ފުލުހަށް ހާޒިރުކޮށްފިއެވެ.
ފުލުހުން ބުނީ، އެ މައްސަލާގައި އޭނާ ފުލުހަށް ހާޒިރުކޮށް، ސުވާލުކޮށްފައިވާ ކަމަށެވެ.
ނަމަވެސް، އެ ކަމާ ގުޅޭގޮތުން އިތުރު ތަފުސީލެއް ނުދެއެވެ.
މީގެ ކުރިން ފުލުހުން ވަނީ އެ މައްސަލައިގައި ތަހުގީގުގެ ބޭނުމަށް ކޯޓު އަމުރެއްގެ ދަށުން ތޮއްޔިބުގެ ފޯނާއި އިލެކްޓްރޯނިކް އެހެން ބައެއް ތަކެތި ވެސް ހިފަހައްޓާފައިވާ ކަމަށް ބުނެފައެވެ.
މި ފަހުން ސޯޝަލް މީޑިއާގައި ވަނީ، ކުރީގެ ރައީސް އަބްދުﷲ ޔާމީން އަބްދުލްގައްޔޫމް ހައްޔަރުކުރުމަށް ސައްހަ ނޫން ކޯޓު އަމުރެއް ނެރުމާ ގުޅޭ ގޮތުން ދިވެހި ފުލުހުންގެ ޚިދުމަތުން ކޮށްފައިވާ ތަހުގީގުގެ ރިޕޯޓެއް ކަމަށް ބުނެ، ސައްހަ ނޫން ރިޕޯޓެއް ފަތުރައިފައެވެ.
މި މަހުގެ ތިނެއްގައި ފުލުހުން ވަނީ އެ މައްސަލަ ސީރިއަސް މައްސަލައެއްގެ ގޮތުގައި ތަހުގީގުކުރަމުން އަންނަ ކަމަށް ބުނެފައެވެ.
އެ ތަހުގީގާ ގުޅޭ ގޮތުން މީގެ ކުރިން ފުލުހުން ބުނީ، މީސް މީޑިއާގެ އެކި މަންސަތަކުގައި ދައުރުކުރަމުންދާ، ޔާމީން ހައްޔަރުކުރުމަށް ނެރުނު ކަމަށް ބުނާ ސައްހަ ނޫން ކޯޓު އަމުރަކާ ގުޅޭ ގޮތުން ފުލުހުން ކޮށްފައިވާ ތަހުގީގުގެ ރިޕޯޓް ކަމަށް ބުނެ ދައުރުކުރަމުންދާ ރިޕޯޓަކީ ސައްހަ ނޫން ރިޕޯޓެއް ކަމަށެވެ.
ކުރީގެ ސަރުކާރުތަކަށް ވަރަށް ބޮޑަށް ފާޑުކިޔަމުން ދިޔަ ތޮއްޔިބު، ކުރީގެ ރައީސް ޔާމީންގެ ސަރުކާރުގައި 2017 ވަނަ އަހަރުގެ މާޗު މަހު ހައްޔަރު ވެސް ކުރިއެވެ. ނަމަވެސް، އެ އަހަރުގެ އޭޕްރިލް މަހުގެ ތެރޭގައި ހައިކޯޓުން އަމުރުކޮށްގެން އޭނާ ދޫކޮށްލުމުން އޭނާ ސްރީލަންކާއަށް ދިރިއުޅުން ބަދަލުކުރިއެވެ.
ސްރީލަންކާގައި ދެ އަހަރު ދުވަހު އުޅުމަށް ފަހު އޭނާ އަލުން ރާއްޖެ އައީ، ކުރީގެ ރައީސް އިބްރާހިމް މުހައްމަދު ޞާލިޙް ވެރިކަމާ ހަވާލުވެވަޑައިގަތް ފަހުން، 2019 ވަނަ އަހަރުގެ ތެރޭގައެވެ. އެ ސަރުކާރުގައި އޭނާ ޓޫރިޒަމް މިނިސްޓްރީގެ ސީނިއާ އެގްޒެކެޓިވް ޑިރެކްޓަރުގެ މަގާމު އަދާކޮށްފައިވެއެވެ.