އުޅަނދުތައް މޮނިޓާކޮށް، ވަގަށް ނެގުން ފަދަ ކަންކަން މަދު ކުރުމަށް މެޝިން ރީޑަބަލް ނަންބަރު ޕްލޭޓް ތައާރަފުކުރުމަށް ޓްރާންސްޕޯޓް މިނިސްޓްރީން ނިންމައިފިއެވެ.
އެ މިނިސްޓްރީން ބުނީ މެޝިން ރީޑަބަލް ނަންބަރު ޕްލޭޓް ތައާރަފުކުރަން ނިންމީ އުޅަނދު ރަޖިސްޓްރޭޝަން ފަދަ ކަންކަމަށް ހޭދަވާ ވަގުތު ކުޑަ ކުރުމަށާއި އުޅަނދުތަކަށް ގެއްލިދިނުމާއި ވައްކަން ކުރުން ފަދަ ކަންކަން މަދު ކުރުމަށް ކަމަށެވެ.
އެ ޕްލޭޓް ތައާރަފު ކުރުމުން އެހެން ގައުމުތަކެކޭ އެއްގޮތަށް ރާއްޖޭގައި ވެސް ޒަމާނީ ފެންވަރަށް އުޅަނދުތައް މޮނިޓާ ކުރެވޭނެ ކަމަށް އެ މިނިސްޓްރީން ބުނެއެވެ. އޭގެއިތުރުން، ގާނޫނާއި ގަވާއިދުތައް ތަންފީޒު ކުރަން ފަސޭހަވެ، ރަޖިސްޓްރީކޮށްފައިވާ އުޅަނދުތައް ޓްރެކް ކުރެވޭނެ ކަމަށް މިނިސްޓްރީން ބުންޏެވެ.
މެޝިން ރީޑަބަލް ނަންބަރު ޕްލޭޓެއް: ޓްރާންސްޕޯޓް މިނިސްޓްރީން ވަނީ އުޅަނދުތައް މޮނިޓާ ކުރަން އެފަދަ ނަންބަރު ޕްލޭޓް ތައާރަފްކުރަން ނިންމާފައި --- ފޮޓޯ/ ޓްރާންސްޕޯޓް މިނިސްޓްރީ
އެހެންކަމުން، އުޅަނދުގެ ވެރިފަރާތަށް އިތުރު ރައްކާތެރިކަން ލިބޭނެކަން ޓްރާންސްޕޯޓް މިނިސްޓްރީން ފާހަގަކޮށްފައިވެއެވެ.
އިތުރަށް އެ މިނިސްޓްރީން ވަނީ ރާއްޖޭގެ ހުރިހާ ސަރަހައްދެއް ހިމެނޭހެން، ޚާއްސަކޮށް މާލެ ސަރަހައްދުގައި ރަޖިސްޓްރީނުކޮށް ނަންބަރު ޕްލޭޓް އަޅުވައިގެން ގިނަ އަދަދެއްގެ އުޅަނދު ދުއްވާކަން ފާހަގަވެފައިވާ ކަމަށް ބުނެފައެވެ.
މެޝިން ރީޑިން ޓެކްނޮލޮޖީން، ކެމެރާ ފަދަ ޑިވައިސްއެއް ބޭނުންކޮށްގެން، އުޅަނދުތަކުގެ ރެޖިސްޓްރޭޝަން ނަމްބަރު ދެނެގަނެ މައުލޫމާތު ހޯދައެވެ.
ފާހަގަކޮށްލެވޭ ގޮތުގައި، ނުގަވައިދުން މާލެ ސަރަހައްދުގައި ބޭނުން ކުރަމުން އަންނަ ވެހިކަލްތައް ގަވާއިދަށް ފައްތަން ކަމާ ބެހޭ އިދާރާތަކުން އަންނަނީ މަސައްކަތްތަކެއް ކުރަމުންނެވެ.
އެ މަސައްކަތުގެ ދަށުން، ހުޅުމާލޭ ދެވަނަ ފިޔަވަހީގައި ވަގުތީ ގޮތުން ވެހިކަލްތައް ޕާކު ކުރަން ހަމަޖެއްސި ބިމަށް ވެހިކަލްތައް ގެންދިޔުމަށް އަންގައި، އެ އުޅަނދުތަކުގައި ސްޓިކާ ހަރުކުރުމުގެ މަސައްކަތް ކުރަމުން އަންނަ ކަމަށް ފުލުހުން ބުންޏެވެ.
އެފަދައިން ސްޓިކާ ހަރުކުރެވޭ ވެހިކަލްތަކުގެ ވެރިފަރާތްތަކުން ސްޓިކާގައި ބުނެފައިވާ ސުންގަޑީގެ ކުރިން ވެހިކަލް އެ ބިމަށް ގެންދިޔުމަށް ފުލުހުން އެދިފައިވެއެވެ.