ޑޮމެއިން ނަންބަރު ދޫކުރުމުގެ އާ ގަވައިދަށް އަމަލުކުރަން ފަށައި، މިހާރު ދޫކޮށްފައި ހުރި ޑޮމެއިން ރަޖިސްޓްރީތައް މިހާރުގެ ގަވައިދަށް ފައްތަން، ރަޖިސްޓްރީކުރަން މި މަހުގެ 17އިން ފެށިގެން ދެ މަހުގެ މުއްދަތެއް ދޭން ޓްރާންސްޕޯޓް މިނިސްޓްރީން ނިންމައިިފިއެވެ.
ޓްރާންސްޕޯޓު މިނިސްޓްރީން މިއަދު ވަނީ އެއްގަމު އުޅަނދުގައި ޑޮމެއިން ބޭނުން ކުރުމުގެ ގަވާއިދަށް އެއްވަނަ އިސްލާހު ގެނައުމުގެ ގަވާއިދު ސަރުކާރުގެ ގެޒެޓުގައި މިއަދު ޝާއިއުކޮށްފައެވެ.
އެއަށް އަމަލުކުރަން ފަށާނީ ގެޒެޓުކުރާތާ ހަތް ދުވަސް ފަހުންނެވެ. އެހެންކަމުން މި މަހު 18ވާ ހޯމަ ދުވަހުން ފެށިގެން އަމަލުކުރާނީ އާ ގަވައިދަށެވެ.
އެއާއެކު އެ މިނިސްޓްރީން ކުރި އިއުލާނެއްގައި ބުނީ އާ ގަވައިދާއެކު ޑޮމެއިން ޚިދުމަތުގެ ސެކިއުރިޓީ ވަރުގަދަކުރުމަށް އާ ސެކިއުރިޓީ ފީޗާތަކާއެކު ޑޮމެއިން ރަޖިސްޓްރީ ސެޓްފިކެޓާއި ހުއްދަ ތައާރަފްކުރަން ނިންމައިފައިވާކަމަށެވެ.
އެހެންކަމުން މި މަހު 17 އިން ފެށިގެން 60 ދުވަހުގެ ތެރޭ ކުރިން ދޫކޮށްފައިވާ ޑޮމެއިން ބޭނުންކުރުމުގެ ހުއްދަ ނުވަތަ ފައިސާ ދެއްކިކަމުގެ ރަސީދު ހުށަހަޅައިގެން އަލަށް ތައާރަފްކުރާ ހުއްދައަށް ބަދަލުކުރަން އެދޭކަމަށެވެ.
ގަވައިދުގައިވާ ގޮތުން ކުރިން ޓްރާންސްޕޯޓު މިނިސްޓްރީން ދޫކޮށްފައިވާ ޑޮމެއިން ބޭނުންކުރުމުގެ ހުއްދަ، ގަވާއިދު އާންމުކުރާތާ ތިން މަސް ތެރޭ ބަދަލުކުރަން ވާނެއެވެ.
އާ ގަވައިދާއެކު ޑޮމެއިން ރަޖިސްޓްރީ ކުރުމާއި، އުޅަނދުގައި ޑޮމެއިން ބޭނުން ކުރުމުގެ ހުއްދައާއި، ޑޮމެއިންގެ ވެރިފަރާތް ބަދަލު ކުރުމުގެ ހުއްދައާއި، ޑޮމެއިން ދޫކޮށްފައިވާ އުޅަނދު ބަދަލު ކުރުމަށް 500 ރުފިޔާ ދައްކަންޖެހޭނެއެވެ.
ޑޮމެއިންގެ ޚިދުމަތް ދިނުން އެ މިނިސްޓްރީން ހުއްޓައިލީ، ޑޮމެއިން ނަންބަރުތަކާ ގުޅޭ ގިނަ މައްސަލަތަކެއް މިދިޔަ ސަރުކާރުގައި ފެންމަތިވުމުންނެވެ. އެއާއެކު އެ މައްސަލަތައް ވަކި ގޮތަކަށް ނިމެންދެން ޑޮމެއިންގެ ހުރިހާ ޚިދުމަތެއް ހުއްޓުވީ މިދިޔަ ސަރުކާރުގައި ރައީސް އޮފީހުންނެވެ.
ކުންފުނިތަކުގެ ބޭނުމަށް ދޫކުރާ ޑޮމެއިންގެ ރެޖިސްޓްރީ --
އަމިއްލަ ބޭނުމަށް ދޫކުރާ ޑޮމެއިންގެ ރެޖިސްޓްރީ --
ޑޮމެއިންގެ ޚިދުމަތް ދިނުމުގައި ދިމާވެފައިވާ ނުވަތަ ދިމާވާ މައްސަލަތައް ބަލައި، އެ މައްސަލަތަކާ މެދު ގޮތް ނިންމުމަށް ޓަކައި ޓްރާންސްޕޯޓު މިނިސްޓްރީން ހަތް މެންބަރުންގެ މައްޗަށް އެކުލެވޭ ކޮމިޓީއެއް އެކުލަވައިލަން ޖެހެއެވެ. އަދި މި ގަވާއިދުގެ ދަށުން ޑޮމެއިން ބޭނުން ކުރުމުގެ ހުއްދަ، އެ އުޅަނދެއް ދުއްވާ މީހާގެ އަތުގައި އޮންނަންވާނެއެވެ.
ގާނޫނުގައި ކަނޑައަޅާފައިވާ ގޮތުގައި ނީލަމުގެ އުސޫލުން ޑޮމެއިން ދޫކުރާނީ 100،000 އާއި 50،000 ރުފިޔާއާ ދެމެދުގެ އަގެއްގައެވެ.
ޑޮމެއިންގެ ޚިދުމަތަކީ، ދިވެހިންގެ މެދުގައި އަދި ވަކިން ޚާއްސަކޮށް ޒުވާނުންގެ މެދުގައި، މަޤުބޫލުކަން ލިބިފައިވާ ޚިދުމަތެކެވެ. ޑޮމެއިން ގަތުމަށާއި އެކަމާ ގުޅުންހުރި ޚިދުމަތް ހޯދުމަށް އެ ފަރާތްތަކުން ބޮޑެތި ހޭދަތައް ވެސް ކުރެއެވެ.