ނޭވާލާ ނިޒާމު ބަލިކަށިކުރުވާ ވައިރަހެއް ކަމަށްވާ، ރެސްޕިރޭޓޮރީ ސިންސީޝިއާ ވައިރަސް ކުޑަކުދިންގެ މެދުގައި އިތުރުވާންފަށައިފިއެވެ.
މިކަމާ ގުޅިގެން ހެލްތު ޕްރޮޓެކްޝަން އެޖެންސީ (އެޗްޕީއޭ)އިން ބުނީ، އެ އެޖެންސީން ހާލަތު ގާތުން ބަލައި މޮނީޓާ ކުރަމުންދާކަމަށެވެ.
މި ވައިރަސްގެ އަލާމާތްތަކުގެ ތެރޭގައި، ހުން އައުން، ކެއްސުން، ނޭވާލާން އުނދަގޫވުން އަދި މޭގައި ރިއްސުން ހިމެނެއެވެ. މިފަދަ އަލާމާތެއް ފެނިއްޖެ ނަމަ، ލަސްނުކޮށް ޑޮކްޓަރަށް ދެއްކުމަށް އެޗްޕީއޭއިން ވަނީ އިލްތިމާސް ކޮށްފައެވެ.
މި ވައިރަހުން ރައްކާތެރިވުމަށް ކުރެވިދާނެ ކަންކަމުގެ ތެރޭގައި، ގިނަގިނައިން އަތްދޮވުމާއި، ކެއްސާ ކިނބިހިއަޅާއިރު އަނގައާއި ނޭފަތް ނިވާކުރުމާއި އެފަދަ ކަންކަމަށް ބޭނުންކުރާ ޓީޝޫފަދަ ތަކެތި ރައްކާތެރިކަމާއެކު ނައްތާލުން އަދި މީހުން ގިނަ ތަންތަނަށް ދިއުން މަދުކުރުން ހިމެނެއެވެ.
މި ވައިރަހާ ގުޅިގެން އަޅަންޖެހޭ ރައްކާތެރިކަމުގެ ފިޔަވަޅުތައް އެޅުމަށް އެޗްޕީއޭއިން ވަނީ ގޮވާލައިފައެވެ. މި ވައިރަސް އެންމެ ގިނައިން ފެތުރެނީ ކުޑަކުދިންގެ މެދުގައެވެ.
މި ވައިރަހަކީ ގައިންގަޔަށް އަރާ ވައިރަހެކެވެ. މި ވައިރަސް ފެތުރެން މެދުވެރިވަނީ ވައިރަހުގެ އަސަރުކޮށްފައިވާ މީހެއް ކެއްސުމާއި ކިނބިހި އެޅުމުގެ ސަބަބުންނެވެ.