މިދިޔަ އަހަރާ އަަޅައިބަލާއިރު މިއަހަރުގެ އޮކްޓޫބަރު އަދި ނޮވެމްބަރު މަހު ޑެންގީ ޖެހިގެން ރިޕޯޓު ކުރި މިންވަރު ވަރަށް ބޮޑަށް ދަށްވެފައި ވާކަމަށް ހެލްތު ޕްރޮޓެކްޝަން އެޖެންސީ (އެޗްޕީއޭ)ގެ ތަފާސްހިސާބުތަކުން ދައްކައިފިއެވެ.
އެޗްޕީއޭއިން މިއަދު އާންމުކުރި ތަފާސްހިސާބުތަކުން ދައްކާގޮތުގައި ފާއިތުވި ދެ މަހު ޑެންގީ ޖެހިގެން ރިޕޯޓުކޮށްފައި ވަނީ، 266 ކޭހެވެ. އެއީ އޮކްޓޯބަރު މަހު 126 އަދި ނޮވެމްބަރު މަހު 140 ކޭހެވެ. ނަމަވެސް، މިދިޔަ އަހަރުގެ އޮކްޓޫބަރު އަދި ނޮވެމްބަރު މަހު ޖުމުލަ 524 ކޭސް ރިޕޯޓުކޮށްފައި ވެއެވެ.
ޑެންގީގެ އަލާމާތްތައް ފެނިއްޖެ ނަމަ ގޭގައި ދެވިދާނެ ފަރުވާތައް އެޗްޕީއޭއިން ވަނީ ފާހަގަކޮށްފައެވެ. އެގޮތުން:
- ގިނަގިނައިން އަރާމުކުރުން
- ދިޔާއެއްޗެހި ބޭނުންކުރުން
- ހުން މަޑުކުރުމާއި ގައިގައި ރިއްސުން މަޑުކުރުމަށް ޕެރެސެޓަމޯލް ބޭނުންކުރުން
ޑެންގީއާއެކު ބޭރަށް ހިންގުން ވެސް ފާއިތުވި ދެމަހު ވަނީ ދަށްވެފައެވެ. އެގޮތުން މިއަހަރުގެ އޮކްޓޫބަރު އަދި ނޮވެމްބަރުގައި ބޭރަށް ހިންގުމުގެ 6،799 ކޭސް ރިޕޯޓުކޮށްފައި ވާއިރު، މިދިޔަ އަހަރު ރިޕޯޓުކޮށްފައި ވަނީ، 14،831 ކޭހެވެ.
ޑެންގީއާއި ބޭރަށްހިންގުން ޖެހުނު މިންވަރު މަދުވެފައި ވީނަމަވެސް، އަރިދަފުސް ރޯގާ ޖެހުނު މިންވަރު މިއަހަރު ވަނީ އިތުރުވެފައެވެ. އެގޮތުން ވޭތުވެދިޔަ ދެމަހު 70،019 މީހުންނަށް އަރިދަފުސް ރޯގާ ޖެހިގެން ރިޕޯޓުކޮށްފައި ވާއިރު، މިދިޔަ އަހަރުގެ އޮކްޓޯބަރު ނޮވެމްބަރުގައި އަރިދަފުސް ރޯގާ ޖެހިގެން ރިޕޯޓުކުރީ 65،634 މީހުންނެވެ.
އަރިދަފުސްރޯގާ ޖެހުނު މިންވަރު ވަރަށް ބޮޑަށް އިތުރުވެފައި ވުމުން އިންފްލުއެންޒާ އަދި ކޮވިޑްފަދަ ބަލިތަކުން ސަލާމަތްވުމަށް ފިޔަވަޅުތައް އެޅުމަށް އެޗްޕީއޭއިން ވަނީ އިލްތިމާސްކޮށްފައެވެ.
މި ބަލިން ރައްކާތެރިވުމަށް އެޅިދާނެ ފިޔަވަޅުތަކުގެ ތެރޭގައި:
- ކެއްސާ ކިނބިހިއަޅާއިރު ނޭފަތާއި އަނގަމަތި ޓިޝޫއަކުން ނިވާކުރުން
- ގިނަގިނައިން އަތް ދޮންނަން ސަމާލުވުން
- އިންފުލުއެންޒާއިން ރައްކާތެރިވުމަށް ވެކްސިން ޖެހުން
- ބަލިވެގެން ހޮސްޕިޓަލަށް ދާއިރު، ވީހާވެސް މަދު މީހުން ގޮވައިގެން ދިއުން