ރިޒޯޓު ތަރައްގީކުރަން ދީފައިވާ ރަށްތަކުގެ ތެރެއިން ހިންގަމުން އަންނަ ރަށެއްގެ ފެންވަރު މަތިކުރުމަށް ޓަކައި މުޅި ތަން ބަންދުކުރާނަމަ، ތިން އަހަރަށް ކުލި ފަސްކޮށްދިނުމުގެ އިޚުތިޔާރު ޓޫރިޒަމް މިނިސްޓްރީއަށް ލިބޭ ގޮތަށް ގަވާއިދު އިސްލާހު ކޮށްފިއެވެ.
ކުރިން އޮންނަ ގޮތުން ނަމަ، މިފަދަ ބޭނުންތަކަށް ރިޒޯޓު ބަންދުކުރެވޭނީ ދެ އަހަރަށެވެ.
ފަތުރުވެރިކަމުގެ ބޭނުންތަކަށް ކުއްޔަށް ދޫކޮށްފައިވާ ތަންތަން ތަރައްގީކުރުމަށް ދީފައިވާ މުއްދަތު އިތުރުކޮށްދިނުމާއި، ކުއްޔާއި ޖޫރިމަނާ ފަސްކޮށްދިނުމުގައި އަމަލުކުރާނެ ގޮތުގެ ގަވާއިދަށް ވަނީ ހަ އިސްލާހެއް ގެނެސްފައެވެ.
މި އިސްލާހުތަކުގައިވާ ގޮތުން، ރިޒޯޓު ހިންގުމަށް ދޫކޮށްފައިވާ ރަށެއްގެ ފެންވަރު މަތިކުރުމަށްޓަކައި ތަރައްގީ ކުރުމަށް އެ ތަނެއް އެއްކޮށް ބަންދުކުރަން ހުއްދަ ދެވޭނީ 36 މަސްދުވަހަށެވެ. އެހެން ނަމަވެސް އިތުރު ހަ މަސް ދުވަހަށް (ޖުމްލަ 42 މަސް ދުވަހަށް) އެ މުއްދަތު ދަންމައިލުމުގެ އިޚްތިޔާރު މިނިސްޓްރީއަށް ވަނީ ލިބިދީފައެވެ.
އެ ގޮތުން އެ ތަނެއް އެއްކޮށް ބަންދުކުރަން ދީފައިވާ މުއްދަތު އިތުރު ކުރެވެނީ 36 މަސްދުވަސް ހަމަވާއިރު، އެ ތަނެއް ހިންގަން ނުފެށި، މަސައްކަތް ކުރުމަށް ބޭނުންވާ ތަކެއްޗާއި، މަސައްކަތްތެރީން ތަނުގައި ތިބިކަމުގެ އިގުރާރެއް މިނިސްޓްރީއަށް ހުށަހެޅުމުންނެވެ.
އަދި އެ މިނިސްޓްރީން ބަލާބެލުމުގައި އެ ފަރާތަކުން ހުށަހަޅާ އިގުރާރުގައި ބަޔާންކޮށްފައިވާ ގޮތާ ޚިލާފަށް އަމަލުކޮށްފައިވާކަން ފާހަގަ ކުރެވިއްޖެނަމަ، ހުއްދަ ބާތިލް ކުރުމުގެ އިޚުތިޔާރު ވެސް މިނިސްޓްރީއަށް އޮވެއެވެ.
މި ގަވާއިދު ދިވެހި ސަރުކާރުގައި ގެޒެޓުކޮށް، ގަވާއިދަށް ވަނީ އަމަލު ކުރަން ފަށައިފައެވެ.