ޕްރޮސިކިއުޓާ ޖެނެރަލް ޢައްބާސް ޝަރީފު, ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް)ގެ ނޯމަލައިޒޭޝަން ކޮމިޓީއާއި ފީފާގެ ވަފުދާ މިއަދު ބައްދަލުކުރައްވައި، އެފްއޭއެމްގެ ޚިޔާނާތުގެ މައްސަލައިގެ އެންމެ ފަހުގެ ތަފްސީލުތައް ހިއްސާކުރައްވައިފިއެވެ.
ޕީޖީ އޮފީހުން ބުނީ، އެފްއޭއެމްގެ ނޯމަލައިޒޭޝަން ކޮމިޓީގެ އެދުމުގެ މަތިން ހޮޓެލް ޖެންގައި ބޭއްވި މި ބައްދަލުވުމުގައި އައްބާސް، އެ އެސޯސިއޭޝަންގެ ޚިޔާނާތުގެ ސަބަބުން އެފްއޭމްއަށް ގެއްލިފައިވާ ފައިސާއާއި މުދާ އަނބުރާ ހޯދުމަށް އެޅެން ހުރި ފިޔަވަޅުތަކާ ގުޅޭ ގޮތުން މަޝްވަރާކުރައްވާފައިވާ ކަމަށެވެ.
އެ ބައްދަލުވުމުގައި އެފްއޭއެމްއިން ވަނީ، އެ އެސޯސިއޭޝަންގެ ކުރީގެ ވެރިންގެ މައްޗަށް ހިންގަމުންދާ ޖިނާއީ ތަހުގީގާ ގުޅިގެން، އެސޯސިއޭޝަންގެ މަސައްކަތްތައް ޢާންމު ޙާލަތަކަށް ރުޖޫޢަކުރުމަށް ކުރަމުންދާ މަސައްކަތުގައި ދިމާވާ ދަތިތައް ހިއްސާކޮށްފައެވެ. އަދި، އެ ބައްދަލުވުމުގައި އައްބާސް ވަނީ އިދާރާތަކާ ގުޅިގެން އެކަންކަން ޙައްލުކޮށްދެއްވާނެކަމަށް ވިދާޅުވެފައެވެ.
އެފްއޭއެމް ތެރޭގައި މިފަދަ ކަންކަން ތަކުރާރު ނުވާ ގޮތަށް އަމާޒުކޮށްގެން ނޯމަލައިޒޭޝަން ކޮމިޓީގެ މަސައްކަތްތައް ބައްޓަންކުރުމަށް އައްބާސް ވަނީ ބާރުއަޅުއްވާފައެވެ.
ފާހަގަކޮށްލެވޭ ގޮތުގައި، ކޮވިޑު ތެރޭގައި ކްލަބްތަކަށް ފައިސާ ދޫކުރަން އެފްއޭއެމްއަށް ދިން ފައިސާ ބޭނުންކޮށްގެން އެ އެސޯސިއޭޝަންގެ ކުރީގެ ރައީސް ބައްސާމް އަދީލް ޖަލީލް، އަމީން އެވެނިއުއިން ދެ ފުލެޓު ގަތްކަމަށް ތުހުމަތުކުރެވޭ މައްސަލައިގައި ދައުވާކުރަން ފުލުހުން ވަނީ ފޮނުވައިފައެވެ.
ފުލުހުން ބުނި ގޮތުގައި، އެ ކަމަށް އެފްއޭއެމްގެ ފަައިސާއިން 3،084،000 ރުފިޔާ ބޭނުންކޮށްފައިވާ ކަމަށެވެ.
ފީފާއިން ވަނީ ބައްސާމް، މަގާމުގެ ނުފޫޒު ބޭނުންކޮށްގެން ނާޖާއިޒު ފައިދާ ނަގައި ފީފާގެ ފައިސާ ނަހަމަ ގޮތުގައި ބޭނުންކުރިކަމަށް ތުހުމަތުކުރެވޭތީ އޭނާ ފުޓުބޯޅައިގެ ކަންކަމުން ނުވަ މަހަށް ސަސްޕެންޑުކުރަން މިދިޔަ ޖޫން 20ގައި ނިންމައިފައެވެ.
އެފްއޭއެމްގެ ފައިސާއިން ޚިޔާނާތްވި މައްސަލައިގައި ބައްސާމްގެ މައްޗަށް އިތުރު ދައުވާތަކެއް ވެސް ވަނީ އުފުލައިފައެވެ.