ފުވައްމުލައް ސިޓީގައި ވާ ގިނަވެ، އޭގެ ސަބަބުން ދަނޑުބިންތަކަށާއި ގަސްތަކަށް ގެއްލުންވަމުންދާތީ، ވާ މެރުމަށް ޓަކައި ބަޑިޖަހަން ނިންމާފައިވާ ކަމަށް އެ ސިޓީގެ ކައުންސިލުން ބުނެފިއެވެ.
ފުވައްމުލައް ސިޓީ ކައުންސިލުން މިއަދު ކުރި އާންމު އިއުލާނެއްގައި ބުނެފައިވަނީ ވާ ގިނަވެ، ދަނޑުބިންތަކަށާއި ގަސްތަކަށް ގެއްލުންވުމުގެ އިތުރުން ރަށުގެ އެކި ހިސާބުތަކުގައި ދިރިއުޅެމުންދާ ރައްޔިތުންނަށް ވެސް އެކި ވަރުގެ އުނދަގޫތަކާއި ކުރިމަތިލާންޖެހިފައިވާކަމުގެ ޝަކުވާ ލިބެމުންދާ ކަމަށެވެ.
އެ ގޮތުން ސިޓީ ކައުންސިލާއި، އެމްއެންޑީއެފް ގުޅިގެން ވާ މަދުކުރުމުގެ ޕްރޮގްރާމެއް އަންނަ ބުރާސްފަތީގައި ފެށުމަށް ނިންމާފައިވާ ކަމަށް އެ އިއުލާނުގައިވެއެވެ. އެ ގޮތުން ބުރާސްފަތި ދުވަހުން ފެށިގެން އެ ސިޓީގެ އެކި ހިސާބުތަކުގައި ވާލަށް ބަޑިޖެހުން ކުރިޔަށްދާނެ ކަމަށް ބުނެފައިވެއެވެ.
"މިގޮތުން ފުވައްމުލަކު ސިޓީ ކައުންސިލްއާއި މޯލްޑިވްސް ނެޝެނަލް ޑިފެންސް ފޯސް ގުޅިގެން ވާ މަދުކުރުމުގެ ޕްރޮގްރާމެއް 26 ސެޕްޓެމްބަރ 2024 ވަނަ ދުވަހުން ފެށިގެން މިސިޓީގައި ހިންގުމަށް ވަނީ ހަމަޖެހިފައެވެ. އެހެން ކަމުން 26 ސެޕްޓެމްބަރ 2024 ވަނަ ދުވަހުން ފެށިގެން ރަށުގެ އެކި ހިސާބުތަކުގައި ވާލަށް ބަޑި ޖެހުން ކުރިއަށްދާނެ ވާހަކަ އާންމުންގެ މައުލޫމާތަށްޓަކައި ދަންނަވަމެވެ." އެ އިއުލާނުގައި ބުނެފައިވެއެވެ.
މީގެ ކުރިން ވެސް ބައެއް ރަށްތަކުގައި ވާލުގެ އުނދަގޫ ބޮޑުވެގެން ވާ މަރާފައިވެއެވެ.