އިންޑިއާގެ ސެންޑަލް މޮރިޝަސް ކުންފުންޏާ ހަވާލުކޮށްގެން ހުޅުމާލޭގައި އިމާރާތްކުރި "ވަން ސެންޓްރަލް ޕާކް" ފުލެޓު އިމާރާތުގެ ރެޒިޑެންޝަލް ސަރަހައްދުގައި އެއްބަސްވުމާ ޚިލާފަށް އެ ކުންފުނިން ފާރެއް ރާނަން ފެށި މައްސަލައެއް ފެންމަތިވެއްޖެއެވެ.
މި ކަމާ ގުޅިގެން "ސަން"އަށް މައުލޫމާތުދެއްވަމުން "ވަން ސެންޓްރަލް ޕާކް"ގެ ކޯޕަރޭޓިވް ސޮސައިޓީ ބޯޑުގެ މެންބަރަކު ވިދާޅުވީ، ހައުސިން މިނިސްޓްރީއާއި ސެންޑަލް މޮރިޝަސް ކުންފުންޏާ ދެމެދު ވެފައިވާ އެއްބަސްވުމުގެ ދަށުން އެޕާޓްމަންޓުގައި ދިރިއުޅޭ މީހުންނަށް އެޕާޓްމަންޓް ހަވާލުކުރާތާ އަހަރެއް ތެރޭ ކޯޕަރޭޓިވް ސޮސައިޓީ ބޯޑާ އިމާރާތް ހަވާލުކުރަންޖެހޭނެ ކަމަށެވެ.
އެގޮތުން، މި އަހަރުގެ ޖުލައި މަހުގެ ހަވަނަ ދުވަހު އެޕާޓްމަންޓުތައް ހަވާލުކުރިތާ އަހަރެއްވެފައިވާ ކަމަށާއި، މިހާރު އޮތީ އިމާރާތް ކޯޕަރޭޓިވް ސޮސައިޓީ ބޯޑާ ހަވާލުކުރުމުގެ މަރުހަލާގައި ކަމަށް އޭނާ ވިދާޅުވިއެވެ.
"ވަން ސެންޓްރަލް ޕާކް" ފުލެޓު އިމާރާތް ކޯޕަރޭޓިވް ސޮސައިޓީ ބޯޑާ ހަވާލުކުރުމުން ކުންފުނީގެ ދަށުގައި އޮންނާނީ ކޮމާޝަލް ބައެއްގެ ގޮތުގައި ކަނޑައަޅައިފައިވާ ބައެކެވެ. އެއީ އިމާރާތުގެ އެންމެ ތިރީ ފަންގިފިލާގެ ވަކި ބަޔަކާއި އެއްވަނަ ފަންގިފިލާގެ ވަކި ބައެކެވެ.
ނަމަވެސް، އިމާރާތް ކޯޕަރޭޓިވް ސޮސައިޓީ ބޯޑާ ހަވާލުކުރުމުގެ މަރުހަލާގައި އޮއްވައި މިއަދު ހެނދުނު އެ ކުންފުނިން ވަނީ އިމާރާތުގެ އެންމެ ތިރީ ފަންގިފިލާގެ ރެޒިޑެންޝަލް ބައިގައި ފާރެއް ރާނަން ފަށައިފައެވެ.
"މި މީހުން ހެދިގޮތަކީ އޮގަސްޓް 24ގައި އެންމެ ތިރީ ފަންގިފިލާއަށް ބަދަލެއް ގެނެސްގެން އެޗްޑީސީއަށް ހުށަހަޅައިގެން، އެޗްޑީސީގެ ތައްގަނޑެއް ޖަހައިގެން ރެޒިޑެންޝަލް އޭރިއާގައި އިން ބައެއްގައި ފާރެއް ރާނަން ފެށީ މިއަދު،" އޭނާ ވިދާޅުވިއެވެ.
އޭނާ ވިދާޅުވީ، ފާރު ރާނަން ފަށާފައިވާ ތަނަކީ މުޅި އިމާރާތުގެ ހުރިހާ އެޕާޓްމަންޓެއްގެ ޔޫޓިލިޓީ މީޓަރުތަކާއި ޕަމްޕް ރޫމްތައް ހުންނަ ތަން ކަމަށެވެ. އަދި، މި ފާރުގެ ސަބަބުން މިތަން ބަންދުވާކަމަށް އޭނާ ވިދާޅުވިއެވެ.
"އަޅުގަނޑުމެން އެ މީހުންނާ ވާހަކަދެއްކުމުން ބުނީ އެޗްޑީސީން އެބަ އޮތޭ ހުއްދަ ދީފައި. ދެން އެޗްޑީސީއަށް ދިޔައީމާ އެޗްޑީސީން ބުނީ، ބިލްޑިންއަށް ބަދަލެއް ގެންނަ ކުރެހުމުގައި މައްސަލައެއް ނެތްނަމަ، ތައްގަނޑު ޖަހައިދެމޭ،" އޭނާ ވިދާޅުވިއެވެ.
އޭނާ ވިދާޅުވީ، ކޯޕަރޭޓިވް ސޮސައިޓީ ބޯޑެއް ހެދުމަށް ފަހު ކުންފުނިން އެޗްޑީސީއަށް އަންގަންޖެހޭ ކަމަށެވެ. ނަމަވެސް، ކޯޕަރޭޓިވް ސޮސައިޓީ ބޯޑެއް އެކުލަވައިލުމަށް ފަހު އެ ކުންފުނިން އެޗްޑީސީއަށް އަންގާފައިނުވުމަކީ ވެސް މި ކަމުގައި ހުރި ކަންބޮޑުވުންތަކުގެ ތެރޭގައި ހިމެނޭކަމެއްކަން އޭނާ ފާހަގަކުރެއްވިއެވެ.
"އެޗްޑީސީއަކަށް ނޭނގޭ ކޯޕަރޭޓިވް ސޮސައިޓީ ބޯޑެއް އެކުލަވާލައިފައިވާ ކަމެއް، ހޭންޑް އޯވާ ޕީރިއަޑް އައިއްސިކަމެއް ވެސް،" އޭނާ ވިދާޅުވިއެވެ.
އެޗްޑީސީއާ އެކު ދެކެވުނު ވާހަކަތަކަށް ފަހު، ފާރު ރޭނުން މިހާރު ހުއްޓުވިފައިވާ ކަމަށް އޭނާ ވިދާޅުވިއެވެ. ނަމަވެސް، އެ ކުންފުނިން މަސައްކަތް ކުރަނީ ވީހާ ވެސް އަވަހަކަށް ފާރު ރާނަން ފަށަންކަން އޭނާ ފާހަގަކުރެއްވިއެވެ.
މި އިމާރާތުގައި 120 އާއިލާ ދިރިއުޅޭކަން ފާހަގަކުރައްވައި އޭނާ ވިދާޅުވީ، އެ ކުންފުނިން ނުހައްގުން އެ އާއިލާތަކުގެ ހައްގަށް އަރައިގަންނަން މަސައްކަތްކުރާ ކަމަށެވެ.
މި ކަމާ ގުޅިގެން "ސަން"އިން ސެންޑަލް މޮރިޝަސް ކުންފުންޏާ ސުވާލުކުރުމުން ބުނީ، ކުންފުނީގެ ފަރާތުން އެއްޗެއް ބުނަން ބޭނުންނުވާ ކަމަށެވެ.