އަބަދު ވެސް ދަރިވަރުން ހަދާ ކޯސްތަކުގައި އަމަލު ކުރަމުން އައީ ކޮންޓްރޯލްޑް މިންކުރުމަކުން 50 ޕަސެންޓު ފާސްވާ އުސޫލަށް ކަމަށް ގައުމީ ޔުނިވާސިޓީ (އެމްއެންޔޫ)އިން މިއަދު ބުނެފިއެވެ.
ދަރިވަރުން ހަދާ ކޯސްތަކުން ފާސްވުމާއި ކިޔެވުމުގެ ފެންވަރު ގިނަ ފަހަރަށް ކަނޑައަޅަނީ ދަރިވަރުން ހަދާ އެސައިމަންޓުތަކުންނެވެ. އެގޮތުން، ބައެއް ޔުނިވާސިޓީތަކާއި ކޮލެޖުތަކުގައި ދަރިވަރުން ކޯސްތަކުން ފާސްވާން 70 ޕަސެންޓު ނުވަތަ އެއަށް ވުރެ ބޮޑު ޕަސެންޓެއް ގުނަނީ އެސައިމަންޓުތަކަށް ބިނާކޮށެވެ.
"ސަން"އަށް މައުލޫމާތު ދެއްވަމުން އެމްއެންޔޫގެ ސީނިއާ ލެކްޗަރާ އައިމިނަތު ޒުބައިރު ވިދާޅުވީ، އެ ޔުނިވާސިޓީގައި ދަރިވަރުން ފާސްވާ އުސޫލަށް އަމަލު ކުރަމުން އަންނަނީ ވަރަށް ހަރުކަށިކޮށް ކަމަށެވެ. އެގޮތުން، ޔުނިވާސިޓީގެ ޕޮލިސީގައި އެންމެ ކުރިން ފެށިގެން ހަދަން ޖެހޭ އެސައިމަންޓުތައް ހުންނައިރު، ފަހުން އެއަށްވުރެ ހަރުކަށި ގަވައިދެއް ވަނީ ހަދައިފައެވެ.
އެމްއެންޔޫ: އެ ޔުނިވާސިޓީ އަބަދުވެސް އަމަލުކުރަމުން އައީ ކޮންޓްރޯލްޑް މިންކުރުމުން 50 ޕަސަންޓު ފާސްވާންޖެހޭ ގޮތަށް ކަމަށް އެމްއެންޔޫއިން ބުނޭ-- ސަން ފޮޓޯ/ އިބްރާހިމް އިފާޒް
އެ ގަވައިދުގެ ތެރެއިން އެންމެ ފުރަތަމަ ކޮންމެ މޮޑިއުލްއެއްގައި ލެކްޗަރާއިން ކުރިމަތީ ހަދާ އެސައިމަންޓުތަކުން 50 ޕަސެންޓު ފާސްވެ، ދެން ހަދާ ހުރިހާ އެސައިމަންޓުތަކުން އެވަރެޖް 50 ޕަސެންޓު ފާސްވާން ޖެހެއެވެ.
ދެ ކޮންޑިޝަންއެއް އިންނަނީ. ފުރަތަމަ ކޮންޑިޝަންއަކީ އެ ކުއްޖާ ކުރިމަތީގައި ހަދާ އެއްޗެހިން 50 ޕަސެންޓު ހޯދުން. އެ ހޯދީމަ ދެން އަނެއް ކޮންޑިޝަން ބަލާނީ. ހުރިހާ އެއްޗަކުން އެގްރިގޭޓް އެބަ ލިބެން ޖެހޭ 50 ޕަސެންޓު. ދެން އެ ކުއްޖާ މި ފާސްވަނީ އެމްއެންޔޫގެ ސީނިއާ ލެކްޗަރާ އައިމިނަތު ޒުބައިރު
އެމްއެންޔޫގެ ފާސްވާ އުސޫލުގެ ހަރުކަށިކަން ކިޔައިދެއްވުމަށް އޭނާ ވިދާޅުވީ، ދަރިވަރަކު އޭނާގެ ފައިނަލް އެގްޒާމުން ފެއިލްވެފައި، ގޭގައި ހަދާ އެސައިމަންޓުތަކުން އެވަރެޖް މާކްސްއަށް 50 ޕަސެންޓު ލިބުނަސް އެ ކުއްޖަކު ފެއިލްވާނެ ކަމަށެވެ. އެއީ ޔުނިވާސިޓީގައި ހަދާ އެސައިމަންޓަކުން ފާސްނުވެ، އެހެނިހެން އެސައިމަންޓުތަކުން ފާސްވުމުންނެވެ.
މީގެއިތުރުން، މުޅި މޮޑިއުލްގެ 50 ޕަސެންޓު ދަރިވަރުން ޔުނިވާސިޓީގައި ހަދަން ޖެހޭ ކަމަށާއި ފައިނަލް އެގްޒާމުން ފާސްވެ، އެސައިމަންޓުތަކުގެ ތެރެއިން ޔުނިވާސިޓީގައި ހަދާ އެސައިމަންޓެއް ނުވަތަ ޕްރެޒެންޓޭޝަނެއް އިންނަ ކަމަށް އައިމިނަތު ވިދާޅުވިއެވެ.
އެމްއެންޔޫ: އެ ޔުނިވާސިޓީ އަބަދުވެސް އަމަލުކުރަމުން އައީ ކޮންޓްރޯލްޑް މިންކުރުމުން 50 ޕަސަންޓު ފާސްވާންޖެހޭ ގޮތަށް ކަމަށް އެމްއެންޔޫއިން ބުނޭ ފޮޓޯ/ އެެމްއެންޔޫ
މިސާލަކަށް ޕްރެޒެންޓޭޝަނެއް ނުވަތަ އެއްޗެއް ކުއްޖަކު އުފައްދަނީ އަޅުގަނޑުމެންގެ ކުރިމަތީގައި. އެކަހަލަ އެސައިމަންޓެއް ލާފައި އިންނާނީ. މިނިމަމް އެއީ 50 [ޕަސެންޓު] އަދި މެކްސިމަމް މިސާލަކަށް މި ސެމްގައި އަޅުގަނޑުގެ މާއްދާގެ 80 ޕަސެންޓަކީ ކޮންޓްރޯލްޑް. އަޅުގަނޑު ކުރިމަތީގައި ހަދާނީ. އެހެންވީމާ 20 ޕަސެންޓު ކުއްޖާ އަމިއްލައަށް ދުރުގައި މިހަދަނީ ގޭގައި އެމްއެންޔޫގެ ސީނިއާ ލެކްޗަރާ އައިމިނަތު ޒުބައިރު
އިތުރަށް އޭނާ ވިދާޅުވީ، ކުއްޖާގެ ފެންވަރަށް ވުރެ މަތީ ފެންވަރުން އެސައިމަންޓު ހަދާފައި ހުންނަކަން ބައެއް ފަހަރަށް ފާހަގަކުރެވޭ ކަމަށެވެ. އެގޮތުން، އެމްއެންޔޫގައި އެސައިމަންޓުތައް ހަދަން ޗެޓްޖީބީޓީ އޭއައި ފަދަ ވެބްސައިޓުތައް ބޭނުންކޮށްފައި ހުންނަކަން އެނގޭ ޓާންއިޓްއިން ސޮފްޓްވެއާއެއް ބޭނުންކުރާކަން އޭނާ ވަނީ ފާހަގަކުރައްވާފައެވެ.
ދަރިވަރުންތަކެއް: އެ ޔުނިވާސިޓީ އަބަދުވެސް އަމަލުކުރަމުން އައީ ކޮންޓްރޯލްޑް މިންކުރުމުން 50 ޕަސަންޓު ފާސްވާންޖެހޭ ގޮތަށް ކަމަށް އެމްއެންޔޫއިން ބުނޭ--- ސަން ފޮޓޯ/ އިހްތިޝާމް މުހައްމަދު
ނަމަވެސް އޭއައި ބޭނުންކުރުން ފަދަ މައްސަލަތައް ދިމާވާތީ، އެސައިމަންޓުތައް ޑިޒައިން ކުރުމުގައި އެއްބައި ޔުނިވާސިޓީގައި ހެދުން ފަދަ ކަންކަމަށް ބަދަލު ގެންނަ ކަމަށް އައިމިނަތު ވިދާޅުވިއެވެ. އޭގެ ސަބަބުން، މުޅި އެސައިމެންޓް ހަދަން އޭއައި ފަދަ ވެބްސައިޓުތައް ބޭނުންނުކުރުމުގެ ފުރުސަތު ކުޑަވާނެ ކަމަށް އޭނާ ވިދާޅުވިއެވެ.
ފާހަގަކޮށްލެވޭ ގޮތުގައި، މޯލްޑިވްސް ކޮލިފިކޭޝަން އޮތޯރިޓީ (އެމްކިއުއޭ)އިން ވަނީ މަތީ ތައުލީމަށް ކިޔަވާ ދަރިވަރުން ހަދާ ކޯސްތަކުގެ ހުރިހާ އިމްތިހާނުތަކަކުން 50 ޕަސެންޓު ފާސްވާންޖެހޭ ގޮތަށް އެކްރެޑިޓޭޝަން އުސޫލަށް ބަދަލުގެންނަން ނިންމައިފައެވެ.