ޑޮކްޓަރުންނާއި އިންޖިނިއަރުންގެ އިތުރުން ރާއްޖޭގައި ތަފާތު ދާއިރާތަކުން މަސައްކަތްކުރާ މީހުން ހިމެނޭހެން ރާއްޖޭގައި ދިރިއުޅޭ ބަންގްލަދޭޝް މަސައްކަތްތެރިން، ސަގާފީ ހަރަކާތަކާއެކު އެ ގައުމުގެ ނަސްރުގެ ދުވަސް ފާހަގަކޮށްފިއެވެ.
ބަންގްލަދޭޝްގެ ސަގާފީ ދުވަސް ފާހަގަކޮށްފައި ވަނީ ގައުމީ ޔުނިވަސިޓީ، އެމްއެންޔޫގައި ރޭ ބޭއްވި ހަފުލާއެއްގައެވެ. ބަންގްލަދޭޝްގެ ސަގާފީ ލަވައިގެ ހަރަކާތްތަކެއް ފެނިގެންދިޔަ މި އިވެންޓު ޝަރަފުވެރިކޮށްދެއްވީ، އެ ގައުމުގެ އެކްޓިން ހައިކޮމިޝަނަރު، އެމްޑީ ސޮހެލް ޕަރްވެޒްއެވެ. ބަންގްލަދޭޝްގެ ނަސްރުގެ ދުވަސް ފާހަގަ ކުރުމަށް ބޭއްވި މި އިވެންޓުގައި، ރާއްޖޭގައި ތިބި އެ ގައުމުގެ ގިނަ އަދަދެއްގެ މަސައްކަތްތެރިންގެ އިތުރުން ކުޑަކުދިން ވެސް ބައިވެރިވިއެވެ.
އެމްއެންޔޫގައި ބަންގްލަދޭޝްގެ ނަސްރުގެ ދުވަސް ފާހަގަކުރުން -- ފޮޓޯ/
މި އިވެންޓުގެ ޝަރަފުވެރި މެހެމާނާއި އެހެން މެހެމާނުން ވެސް ވަނީ، ބަންގްލަދޭޝްގެ މިނިވަންކަމާއި މިނިވަންކަމަށްޓަކައި ފުރާނަ ގުރުބާންކުރި ހިތްވަރުގަދަ ބަތަލުންގެ ޒިކުރާ އައުކޮށްފައެވެ. އަދި ޑިމޮކްރަސީއާއި އިންސާފު އިއާދަކުރުމަށް ބަންގްލަދޭޝްގައި ހިންގި ހަރަކާތްތަކުގައި ފުރާނަ ޤުރުބާންކުރި ޝަހީދުންގެ ހަނދާން ވެސް އައުކުރިއެވެ.
އެމްއެންޔޫގައި ބަންގްލަދޭޝްގެ ނަސްރުގެ ދުވަސް ފާހަގަކުރުން -- ފޮޓޯ/
ޕާކިސްތާނުގެ ކިބައިން ބަންގްލަދޭޝްއަށް މިނިވަންކަން ލިބުނީ 1971ވަނަ އަހަރުގެ ޑިސެންބަރު 16ގައެވެ. މިއީ އެ ގައުމަށް މިނިވަންކަން ލިބުނުތާ 53ވަނަ އަހަރެވެ.
ރާއްޖެއާ ބަންގްލަދޭޝާ ދެމެދު ޚާރިޖީ ގުޅުން ގާއިމްކުރެވުނީ 1978ވަނަ އަހަރުގެ ސެޕްޓެންބަރު 22ގައެވެ.