ސްޕޭސް އެކްސްގެ ވިސްނުން ހުރީ ދެ އަހަރު ތެރޭ މާސްއަށް، ފަޅުވެރިޔަކާ ނުލައި ފަސް ސްޓާޝިޕް ފޮނުވަން ކަމަށް އެކުންފުނީގެ ވެރިޔާ އީލޮން މަސްކް ވިދާޅުވެއްޖެއެވެ.
ސްޕޭސްއެކްސްގެ ސީއީއޯ މަސްކް އެ އިއުލާންކުރީ އޭނާގެ އަމިއްލަ މީޑިއާ ޕްލެޓްފޯމް އެކްސްގައި ކުރި ޕޯސްޓެއްގައެވެ.
މީގެ ކުރިން މަސްކް ބުނެފައިވަނީ ދުނިޔެއާއި މާސްއާ ދެމެދު ދަތުރުތައް ފެށުމަށް މަގުފަހިކުރާ މިޝަންގެ ތެރެއިން ދެ އަހަރުގެ ތެރޭގައި ފުރަތަމަ ސްޓާޝިޕްތައް މާސްއަށް ފޮނުވާނެ ކަމަށެވެ. އަދި މީހުންނާއެކު މިޝަންތައް ފޮނުވާނެ މުއްދަތު ބިނާވާނީ މީހުންނާ ނުލައި ކުރާ ދަތުރުތަކުގެ ކާމިޔާބީގެ މައްޗަށް ކަމަށް އޭނާ ބުންޏެވެ.
މީހުންނާ ނުލައި ފޮނުވާ މިޝަންތައް ރައްކާތެރިކަމާއެކު ޖެއްސިއްޖެނަމަ، ހަތަރު އަހަރުގެ ތެރޭގައި މީހުންނާއެކު މިޝަންތައް ފޮނުވާނެ ކަމަށާއި، ނަމަވެސް ގޮންޖެހުންތަކާ ކުރިމަތިވެއްޖެނަމަ އެ މުއްދަތު އިތުރު ދެ އަހަރަށް ލަސްވެދާނެ ކަމަށްވެސް މަސްކް ބުންޏެވެ.
މަސްކްގެ މި ބަޔާނަކީ ސްޓާޝިޕްގެ ތައްޔާރީތަކާ ގުޅޭގޮތުން އޭނާ ކުރިން ދީފައިވާ ތާރީޚުތަކާ ތަފާތު ތާރީޚުތަކެކެވެ. މި އަހަރުގެ ކުރީކޮޅު އޭނާ ބުނެފައިވަނީ އިންސާނުންނާ ނުލައި މާސްއަށް ފުރަތަމަ ސްޓާޝިޕް ފަސް އަހަރުގެ ތެރޭގައި ފޮނުވާނެ ކަމަށާއި މީހުންނާއެކު މިޝަންއެއް ފޮނުވާނީ ހަތް އަހަރުގެ ތެރޭގައި ކަމަށެވެ.
ޖޫން މަހުގައި، ސްޓާޝިޕް ރޮކެޓެއް ވަނީ ހައިޕަސޮނިކް ސްޕީޑުގައި ޖައްވުން ބިމަށް އެނބުރި އައުމަށްފަހު އިންޑިއާ ކަނޑުގައި ރައްކާތެރިކަމާއެކު ޖައްސައި، މުޅި ދުނިޔެ ވަށައި ދަތުރުކުރުމުގެ ޓެސްޓު މިޝަނެއް ކާމިޔާބުކޮށްފައެވެ.
މަސްކް ވަނީ ސްޓާޝިޕް މެދުވެރިކޮށް 10 އަހަރު ތެރޭގައި މީހުންނާއި މުދާ ހަނދަށް ފޮނުވުމަށާއި، މާސްއަށް ދަތުރުކުރުމުގެ ލަނޑުދަނޑި ޙާޞިލުކުރުމަށް އަމާޒު ހިފައިފައެވެ.
ދުނިޔެއިން ބޭރަށް އިންސާނުން ފޮނުވުމުގެ މަސައްކަތްތައް ބައެއް ގައުމުތަކުން ކުރަމުން އަންނައިރު، އެމެރިކާގެ ނޭޝަނަލް އެރޮނޯޓިކްސް އެންޑް ސްޕޭސް އެޑްމިނިސްޓްރޭޝަން (ނާސާ)އިން ވަނީ އެ އިދާރާއިން މީހުން ހަނދަށް ފޮނުވުމުގެ މިޝަން ފަސްކޮށްފައެވެ. އެއީ ސްޕޭސްއެކްސްގެ ސްޓާޝިޕް ބޭނުންކޮށްގެން ހިންގާ އާޓެމިސް 3 މިޝަން އެވެ.
މިހާރު މި މިޝަން ފޮނުވުމަށް ހަމަޖެހިފައިވަނީ 2026 ވަނަ އަހަރުގެ ސެޕްޓެމްބަރު މަހުގައެވެ. ކުރިން މި މިޝަން ފޮނުވުމަށް ރާވާފައި އޮތީ އަންނަ އަހަރުގެ ފަހުކޮޅުގައެވެ.