އެމެރިކާގެ އިންތިޚާބީ ރައީސް ޑޮނަލްޑް ޓްރަމްޕް ސަރުކާރުގެ މަގާމަކަށް ބިލިއަނަރު އަދި ޓްރަމްޕްގެ ގާތް މީހެއްކަމަށްވާ އީލޮން މަސްކު އައްޔަނުކުރައްވައިފިއެވެ.
މަސްކު އައްޔަންކުރެއްވީ އަލަށް އުފެއްދި ޑިޕާޓްމަންޓް އޮފް ގަވާމަންޓް އެފިޝަންސީގެ ވެރިޔާގެ މަގާމަށެވެ. މަސްކުގެ އިތުރުން ރިޕަބްލިކަން ޕާޓީގެ ކުރީގެ ރިޔާސީ ކެންޑިޑޭޓް ވިވެކް ރަމަސްވާމީ ވެސް މަސައްކަތްކުރައްވާނީ އެ ޑިޕާޓްމެންޓްގެ ވެރިއެއްގެ ގޮތުގައެވެ.
ޓްރަމްޕް ނެރުއްވި ބަޔާނެއްގައި ބުނެފައި ވަނީ މަސްކާއި ރަމަސްވާމީ އެމަނިކުފާނު ސަރުކާރުގެ ބިއުރޯކްރެސީ ރޫޅާލައި، ބޭނުންނުވާ ގަވާއިދުތައް އުވާލައި، އިސްރާފު ކުރާ ހަރަދުތައް ކުޑަކޮށް، ފެޑެރަލް އެޖެންސީތައް އަލުން އެކުލަވާލުމަށް މަގުފަހިކޮށްދެއްވާނެ ކަމަށެވެ.
ޓްރަމްޕް ވިދާޅުވީ އެމީހުންގެ މަސައްކަތް 2026 ވަނަ އަހަރުގެ ޖުލައި ހަތަރެއްގެ ނިޔަލަށް ނިމޭނެ ކަމަށެވެ. ނަމަވެސް އެ މުއްދަތަށްފަހު އެ ދެ ބޭފުޅުންގެ ވަޒީފާ ދެމިއޮންނާނެކަން ނުވަތަ ނޫންކަން ސާފެއް ނޫނެވެ.
ބީބީސީން ރިޕޯޓުކޮށްފައިވާ ގޮތުގައި މަސްކާއި ހަވާލުކޮށްފައިވާ އެފިޝިއަންސީ ޑިޕާޓްމެންޓަކީ ކިހިނެއް ހިނގާ އިދާރާއެއްކަމެއް ސާފުކޮށްދީފައެއްނުވެއެވެ.
ޓްރަމްޕް ވިދާޅުވެފައިވާ ގޮތުން އެއީ ރަސްމީ ފެޑެރަލް ސަރުކާރުގެ އޮނިގަނޑުތަކުގެ ތެރޭގައި ހިމެނޭ އިދާރާއެއްނޫނެވެ.
ދުނިޔޭގެ އެންމެ މުއްސަނދި ކަމަށް ފޯބްސް މަޖައްލާގެ އަންދާޒާތަކުން ދައްކާ މަސްކަކީ ޓްރަމްޕް ރައީސް ކަމުގައި ހުންނެވިއިރު ޓްރަމްޕާ މާބޮޑަށް ގުޅުން ބަދަހި ކުރައްވާފައިވާ ބޭފުޅެއް ނޫނެވެ. ދެހާސް ބާވީސް ވަނަ އަހަރު މަސްކް ވަނީ ސިޔާސީ ކަންކަމުން ޓްރަމްޕް ދުރަށް ޖެހިވަޑައިގަތުމަށް ވިދާޅުވެފައެވެ. ރިޔާސީ ދައުރުގައި ސަބްސިޑީ ހޯދުމަށް އާދޭސްކުރަން މަސްކު ތައްޔާރަށް ހުރި ކަމަށް ޓްރަމް ވެސް ވަނީ ވިދާޅުވެފައެވެ.
ނަމަވެސް މި އަހަރުގެ އިންތިޚާބު ކުރިއަށް ދިޔައިރު، މަސްކު ވަނީ ޓްރަމްޕް ޓީމުގެ މުހިންމު މެމްބަރެއްގެ ރޯލު އަދާކޮށްފައެވެ.
ވޯޓުލާން "ސްވިންގް" ސްޓޭޓްތަކުން ރަޖިސްޓްރީކުރާ މީހުންގެ ތެރެއިން މީހަކަށް ރިޔާސީ އިންތިޚާބާ ހަމަޔަށް ކޮންމެ ދުވަހަކު އެއް މިލިއަން ޑޮލަރު ދޭންވެސް މަސްކު އާންމުކޮށް އިއުލާނުކުރިއެވެ. މަސްރަހު ދިރާސާކުރާ ފަރާތްތަކުން ބުނާ ގޮތުގައި އެއީ ޓްރަމްޕަށް ވޯޓު ހޯދުމަށް މަސްކު ކުރި ކަމެކެވެ.
މަސްކް ވަނީ ޓްރަމްޕްގެ ރިޔާސީ ކެމްޕޭނަށް ތާއީދުކުރުމަށް އެތައް މިލިއަން ޑޮލަރެއް ދެއްވައި، އެ މަނިކުފާނާއެކު ކެމްޕޭނުން ވެސް ފެނިފައެވެ. މަސްކު ރިޔާސީ ކެމްޕޭނަކުން ފުރަތަމަ ފެނިފައި ވަނީ ވެސް ޓްރަމްޕްގެ ކެމްޕޭނުން މި އަހަރެވެ.