އެމެރިކާގެ ރިޔާސީ އިންތީޚާބާ ދިމާކޮށް އިލޮން މަސްކްގެ އެކްސްއަށް ބޮޑު ތުހުމަތެއް ކޮށްފިއެވެ. ސޯޝަލް މީޑިއާގައި އެކްސްއަށް ކޮށްފައިވަނީ އިންތިޚާބާގުޅޭ ދޮގުމައުލޫމާތު ފެތުރުމާއި، އިންތިޚާބާދިމާކޮށް އެކްސްގެ އެލްގޮރިދަމް ބަދަލުކޮށްފައިވާ ކަމުގެ ތުހުމަތެވެ.
މި ތުހުމަތު ތަކާއެކުވެސް އެކްސްގެ ވެރިޔާ އިލޮން މަސްކް ބުނެފައިވަނީ އެމެރިކާގެ އިންތިޚާބުގައި އެކްސް ބޭނުންކުރި މިންވަރު "ރެކޯޑް" އަދަދަކަށް އަރާފައިވާ ކަމަށެވެ.
މަސްކުވަނީ އެމެރިކާގެ ރިޔާސީ އިންތިޚާބުގައި ޑޮނަލްޑް ޓްރަމްޕް ކާމިޔާބު ކުރާނެ ކަމަށް ލަފާކުރެވޭތީ، އުފާފާޅުކޮށް ޕޯސްޓްތައް ކޮށްފައެވެ. މި ގޮތުން މަސްކް ވަނީ އޭނާގެ ސޯޝަލް މީޑިއާ ޕްލެޓްފޯމްގައި، ސިންކެއް ހިފައިގެން ވައިޓް ހައުސްއަށް ވަންނަ މަންޒަރު ދައްކުވައިދޭ އާޓިފިޝަލް އިންޓެލިޖެންސް (އޭއައި) އިމޭޖެއް ޕޯސްޓްކޮށްފައެވެ. މި އިމޭޖުގައި "ލެޓް ދެޓް ސިންކް އިން" މި ޢިބާރާތް ލިޔެފައިވެއެވެ. މިއީ ކުރިން ޓްވިޓާ ގެ ނަމުގައި އޮތް ކުންފުނި މަސްކް ގަތުމަށް އިޝާރާތްކޮށް ބުނެފައިވާ ޢިބާރާތެކެވެ.
މަސްކަކީ ޓްރަމްޕަށް ވަރުގަދައަށް ތާއީދުކުރާ މީހެކެވެ. އަދި އޭނާގެ ސިޔާސީ ވިސްނުން ދެއްކުމަށް އޭނާ އެކްސް ބޭނުންކޮށްފައިވެއެވެ. އިންތިޚާބަށް ފަހު، އެކްސްގައި މަސްކް ވަނީ އެ ޕްލެޓްފޯމް ބޭނުންކުރި މިންވަރު "ރެކޯޑް" އަދަދަކަށް އަރާފައިވާ ކަމަށް ބުނެފައެވެ.
ނަމަވެސް، ދިރާސާތަކުން ދައްކާ ގޮތުގައި މަސްކްގެ ގިނަ ޕޯސްޓްތަކުގައި އެމެރިކާގެ އިންތިޚާބާ ގުޅޭ ގޮތުން ދޮގު ނުވަތަ އޮޅުވާލާފައިވާ މަޢުލޫމާތު ހިމަނާފައިވެއެވެ. އަދި މަސްކް އެކްސްގެ އެލްގޮރިދަމް ބަދަލުކޮށްފައިވާ ކަމަށް ބެލެވެއެވެ.
ސެންޓާ ފޯ ކައުންޓަރިން ޑިޖިޓަލް ހޭޓް (ސީސީޑީއެޗް) އިން ނެރެފައިވާ ރިޕޯޓެއްގައި ބުނެފައިވާ ގޮތުގައި މި އަހަރު މަސްކްގެ މަދުވެގެން 87 ޕޯސްޓްގައި އެމެރިކާގެ އިންތިޚާބާ ގުޅޭ ގޮތުން ދޮގު ނުވަތަ އޮޅުވާލާފައިވާ މަޢުލޫމާތު ހިމަނާފައިވެއެވެ. މި ޕޯސްޓްތައް 1.7 ބިލިއަން ފަހަރު ބަލާފައިވާ ކަމަށް ރިޕޯޓުގައި ބުނެފައިވެއެވެ.
މީގެ އިތުރުން، އިންތިޚާބުގެ މުއްދަތުގައި މަސްކްގެ ޕޯސްޓްތައް ބަލާފައިވާ މިންވަރު، އެ ޕްލެޓްފޯމްގައި ޝާއިޢުކޮށްފައިވާ ހުރިހާ ސިޔާސީ އިޝްތިހާރުތަކެއް ޖުމްލަކޮށް ބަލާފައިވާ މިންވަރުގެ ދެ ގުނައަށް އަރާ ކަމަށް ސީސީޑީއެޗް އިން ބުނެފައިވެއެވެ. މިއީ ގާތްގަނޑަކަށް 24 މިލިއަން ޑޮލަރު (22 މިލިއަން ޔޫރޯ) ގެ ކެމްޕެއިން އިޝްތިހާރުތަކާ އެއްވަރުގެ އަދަދެކެވެ.
މަސްކް ޕޯސްޓްކޮށްފައިވާ އެއް ދޮގު ބަޔާނެއްގައި ސްވިން ސްޓޭޓްތަކާއި "ވޯޓަރ އިމްޕޯޓޭޝަން" އާ ގުޅޭ ގޮތުން ދީފައިވާ މަޢުލޫމާތު 21 މިލިއަން ފަހަރު ބަލާފައިވާ ކަމަށް ރިޕޯޓުގައި ފާހަގަކޮށްފައިވެއެވެ.
އައު ދިރާސާއަކުން ދައްކާ ގޮތުގައި މަސްކް ވަނީ ޖަނަވަރީ މަހުން ފެށިގެން އެކްސްގެ އެލްގޮރިދަމް ބަދަލުކޮށް، އޭނާގެ ޕޯސްޓްތައް އިތުރަށް ފެންނަ ގޮތަށް ހަދާފައި ކަމަށް ބެލެވެއެވެ. މިގޮތަށް ބަދަލުކޮށްފައިވަނީ ޓްރަމްޕްއަށް ތާއީދުކުރާ ކޮންޓެންޓް އިތުރަށް ފެތުރުމަށް ކަމަށް ދިރާސާއިން ދައްކައެވެ.
މި ހުރިހާ ކަމަކީ އެމެރިކާގެ ރިޔާސީ އިންތިޚާބާ ގުޅިގެން ހިނގާފައިވާ ކަންކަމެވެ. މަސްކްގެ މި ޢަމަލުތަކާ ގުޅޭ ގޮތުން ކަމާބެހޭ ފަރާތްތަކުން އަދި އެއްވެސް ބަޔާނެއް ނެރެފައެއް ނުވެއެވެ. ނަމަވެސް، ސޯޝަލް މީޑިއާގެ ބާރުގަދަ ޕްލެޓްފޯމެއްގެ ވެރިއެއްގެ ހައިސިއްޔަތުން މަސްކްގެ މި ޢަމަލުތަކަކީ އިންތިޚާބީ މަޢުލޫމާތު ފެތުރުމުގައި ނުފޫޒު ފޯރުވުމުގެ ގޮތުން ކޮށްފައިވާ ކަމެއް ކަމަށް ފާޑުކިޔާ ފަރާތްތަކުން ދެކެއެވެ.
މި މައްސަލައާ ގުޅޭ ގޮތުން އިތުރު ތަޙްޤީޤުތައް ކުރިއަށްދާނެ ކަމަށް ބެލެވެއެވެ. އަދި ސޯޝަލް މީޑިއާގެ ޒަރީޢާއިން އިންތިޚާބީ މަޢުލޫމާތު ފެތުރުމުގައި ހުންނަންޖެހޭ މިންގަނޑުތަކާ ބެހޭ ގޮތުން އިތުރު ބަހުސްތައް ކުރިއަށް ދާނެ ކަމަށްވެސް ލަފާކުރެވެއެވެ.