މާފަންނު ސަހަރާގެ ގަބުރުތައް ނަގައިގެން، އެތަން ހުސްކުރުމުގެ އަމަލީ މަސައްކަތް ފަށައިފިއެވެ.
މާފަންނު ސަހަރާ ހުސްކުރުމުގެ މަސައްކަތް ކޮށްދޭނެ ބަޔަކު ހޯދަން ސިޓީ ކައުންސިލުން އިއުލާނު ކުރީ މިދިޔަ އޮގަސްޓު މަހުގެ އަށެއްގައެވެ.
އެކަމާ ގުޅުވައި މާލެ ސިޓީ ކައުންސިލްގެ މީޑިއާ އޮފިޝަލް އައިމިނަތު ޝަތުފާ ވިދާޅުވީ، އެ ތަން ހުސްކުރުމުގެ މަސައްކަތް ބަޔަކާ ހަވާލުކޮށް، އަމަލީ މަސައްކަތް ފެށީ މިދިޔަ ހަފްތާ ތެރޭގައި ކަމަށެވެ.
މާފަންނު ސަހަރާ: ބަޔަކާ ހަވާލުކޮށް، މާފަންނު ސަހަރާ ހުސްކުރުމުގެ އަމަލީ މަސައްކަތް ފަށައިފި---- ސަން ފޮޓޯ: އަމަން ލަތީފް
އެގޮތުން، މިހާރު އެ ސަހަރާގެ އެއްބައިގައި އޮތީ ޓިނާއި ދާ ޖަހައިގެން ބަންދުކޮށްފައެވެ.
ޝަތުފާ ވިދާޅުވީ، އެތަނުން ނަގާ ގަބުރުތަކުގެ ކަށިތައް ނައްތާލުމުގެ މަސައްކަތް ކުރާނީ އިސްލާމިކް މިނިސްޓްރީންނެވެ. ނަމަވެސް، މިހާތަނަށް އެ މިނިސްޓްރީގެ ބަހެއް ލިބިފައިނުވާތީ އެކަން ކުރަނީ ކޮން ގޮތަކަށް ކަމެއް ސާފުވެފައެއް ނުވެއެވެ.
މާފަންނު ސަހަރާ: ބަޔަކާ ހަވާލުކޮށް، މާފަންނު ސަހަރާ ހުސްކުރުމުގެ އަމަލީ މަސައްކަތް ފަށައިފި ---- ފޮޓޯ: ނާޖިހު
ފާހަގަކޮށްލެވޭ ގޮތުގައި، މީގެކުރިން މާލެ ސިޓީ ކައުންސިލުން ބުނީ، އެ ސަހަރާއިން ހުސްކުރަނީ 36،153 އަކަފޫޓުގެ ސަރަހައްދެކެވެ.
އެތަން ހުސްކުރަނީ ޕާކިންއަށް ޚާއްސަކުރުމަށް ކަމަށް މީގެކުރިން އެކައުންސިލުން ބުނެފައިވާއިރު، އެތަނުގެ ގަބުރުތައް ނަގައިގެން ހުސްކުރުމުގެ މަސައްކަތް ކުރާތީ ތާރީޚު ދިރާސާ ކުރައްވާ ބޭފުޅުން ކަންބޮޑުވުން ވެސް ފާޅުކޮށްފައިވެއެވެ.
މާފަންނު ސަހަރާއަކީ މީހުން ވަޅުނުލާތާ ގިނަ ދުވަސްވެފައިވާ ސަހަރާއެއް ކަމަށްވާއިރު، އެ ސަހަރާގެ ހުޅަނގު ފަރާތަށް ވާ ގޮތަށް މިހާރުވެސް ޕާކިން ޒޯނެއް ހަދާފައި އޮވެއެވެ.