ފުރާވަރު ކުދީންނަށް ޚާއްސަކޮށްގެން "ނޫރުލް އަޛާން 1446"ގެ ނަމުގައި ބަންގި ގޮވުމުގެ މުބާރާތެއް އަންނަ ރޯދަމަހު ބޭއްވުމަށް ނިންމައި، ބައިވެރިވުމަށް އިސްލާމީ ކަންތައްތަކާއި ބެހޭ ވުޒާއިން ހުޅުވާލައިފިއެވެ.
އެ ވުޒާރާއިން ކޮށްފައިވާ އިއުލާނުގައި ވަނީ ވުޒާރާގެ މޮސްކް ސެކްޝަނުން އިންތިޒާމުކޮށްގެން އުމުރުން 15 އަހަރާއި 20 އަހަރާއި ދެމެދުގެ އުމުރުފުރާގެ ކުދިންނަށް އަމާޒުކޮށްގެން، މާލޭގައި ބަންގި ގޮވުމުގެ މުބާރާތެއް ބޭއްވުމަށް ހަމަޖެހިފައިވާ ކަމަށެވެ.
މި މުބާރާތް ކުރިއަށްދާނީ ފިޒިކަލްކޮށް ކަމަށް މިނިސްޓްރީއިން ވާނީ ބުނެފައެވެ.
އެހެންކަމުން "ނޫރުލް އަޛާން 1446" ބަންގި ގޮވުމުގެ މުބާރާތުގައި ބައިވެރިވާން ބޭނުންވާ މީހުން ލިންކު މެދުވެރިކޮށް ފޯމް "ނޫރުލް އަޛާން 1446" ފުރިހަމަކުރުމަށް އެ ވުޒާރާއިން ވަނީ އެދިފައެވެ.
މި މުބާރާތުގައި ބައިވެރިވާން ބޭންނަފުޅުވާ ފަރާތްތަކުން މި ޑިސެމްބަރު މަހުގެ 31 ވާ އަންގާރަ ދުވަހުގެ 14:00ގެ ކުރިން ލިންކު މެދުވެރިކޮށް ފޯމު ހުށަހެޅުމަށް ވެސް އެ ވުޒާރާއިން ވަނީ އެދިފައެވެ.