ގައިންގަޔަށް އަރާ ބައްޔެއް ކަމަށްވާ ހިމަބިހި ޖެހޭ މީހުންގެ އަދަދު އިތުރުވެ، އެ ބަލި ފެތުރިދާނެކަމުގެ އިންޒާރު ދުނިޔޭގެ ސިއްޚަތު ޖަމުއިއްޔާ (ޑަބްލިޔުއެޗްއޯ) އިން ދީފިއެވެ.
މިދިޔަ އަހަރު ގާތްގަނޑަކަށް 10.3 މިލިއަން މީހުންނަށް ހިމަބިހި ޖެހިފައިވާއިރު، މިއީ 2022 ވަނަ އަހަރާ އަޅާބަލާއިރު 20 އިންސައްތައިގެ އިތުރު ވުމެއް ކަމަށް ދިރާސާއަކުން ދައްކައެވެ.
އެމެރިކާގެ ސެންޓާސް ފޯ ޑިޒީސް ކޮންޓްރޯލް އެންޑް ޕްރިވެންޝަން (ސީޑީސީ) އާއި ޑަބްލިޔުއެޗްއޯ ގުޅިގެން ޝާއިއުކުރި ދިރާސާއެއްގައި ބުނެފައިވާ ގޮތުގައި ހިމަބިހީގެ ކޭސްތައް އިތުރުވެފައި ވަނީ އެ ބަލިން ދިފާއުވުމަށް ވެކްސިން ދޭމިންވަރު މަދުވުމުންނެވެ.
"ދުނިޔޭގައި ހިމަބިހި ޖެހޭ މީހުންގެ އަދަދު އިތުރުވެ، ފުރާނައާއި ސިއްޚަތަށް ދަނީ ނުރައްކާވަމުން." ސީޑީސީގެ ޑިރެކްޓަރު މެންޑީ ކޯހެން ވިދާޅުވިއެވެ. "ވައިރަހުން އަޅުގަނޑުމެންނަށް އެންމެ ރަނގަޅު ރައްކާތެރިކަން ލިބޭނީ ވެކްސިނުން. ވެކްސިން ފޯރުކޮށްދިނުން އިތުރުކުރުމަށް ކުރާ މަސައްކަތުގައި އިންވެސްޓް ކުރަމުން ގެންދަން ޖެހޭނެ."
ހިމަބިއްސަކީ ދުނިޔޭގައި އެންމެ ގިނައިން ފެތުރޭ އެއް ބައްޔެވެ. އެ ބަލި ފެތުރުން ހުއްޓުވުމަށްޓަކައި ހިމަބިހި/ރޫބެލާ ވެކްސިންގެ ދެ ޑޯޒް ޖަހަންޖެހެއެވެ.
ދެހާސް ތޭވީސް ވަނަ އަހަރު އެ ވެކްސިންގެ ފުރަތަމަ ޑޯޒް ޖެހީ މުޅި ދުނިޔެއިންވެސް އެންމެ 83 އިންސައްތަ ކުދިންނެވެ.
ވެކްސިން ފޯރުކޮށްދިނުން ލަސްވުމުގެ ސަބަބުން 2023 ވަނަ އަހަރު 57 ގައުމެއްގައި ނުރައްކާތެރި ދަރަޖައަށް ހިމަބިހި ފެތުރިފައިވެއެވެ.
ރޯގާ ޖެހުމާއި ހުމުގެ އިތުރުން ރޯގާގެ އެހެން އަލާމާތްތައް ފެނިގެންދާ ހިމަބިހި ޖެހުމުން ކުޑަކުދިންނަށް ބޮޑު ވަރުވެއެވެ. އެ ބަލީގައި 2023 ވަނަ އަހަރު 107،500 މީހުން މަރުވެފައިވެއެވެ.