އައިސްކްރީމް ބްރޭންޑް ބެން އެންޑް ޖެރީ އިން އެ ބްރޭންޑުގެ ބެލެނިވެރި ކުންފުނި، ޔުނިލިވާގެ މައްޗަށް ދައުވާކޮށްފިއެވެ.
ރޮއިޓާސްއިން ރިޕޯޓުކޮށްފައިވަ ގޮތުގައި އެ ބްރޭންޑުން ބުދަ ދުވަހު ހުށަހެޅި ދައުވާގައި ބުނެފައި ވަނީ ބެލެނިވެރި ކުންފުނި ޔުނިލިވާ އިން ފަލަސްތީނުގެ ރެފިއުޖީންނަށް ތާއީދު ކުރުމަށް ކުރާ މަސައްކަތްތައް ހުއްޓުވައި އެ މައްސަލައާ ގުޅިގެން ބެން އެންޑް ޖެރީގެ ބޯޑު އުވާލައި މެމްބަރުންނާ ދެކޮޅަށް ގާނޫނީ ފިޔަވަޅު އަޅާނެ ކަމުގެ އިންޒާރު ދީފައިވާ ކަމަށެވެ.
ބެން އެންޑް ޖެރީ އާއި ޔުނިލިވާއާ ދެމެދު ފުރަތަމަ މައްސަލަ އުފެދުނީ 2021 ވަނަ އަހަރު އެ ބްރޭންޑުން އިސްރާއީލުން ހިފާފައިވާ ހުޅަނގު އައްސޭރީގައި އުފެއްދުންތައް ވިއްކުން ހުއްޓާލާނެ ކަމަށް ބުނުމުންނެވެ.
އޭގެފަހުން އިސްރާއީލުގައި އެ މީހުން ހިންގާ ވިޔަފާރިތައް އިސްރާއީލުގެ ލައިސެންސް ލިބިފައިވާ ފަރާތްތަކަށް ވިއްކާލައި، ހުޅަނގު އައްސޭރިއާއި އިސްރާއީލުގައި މާކެޓިން ކުރިއަށް ގެންދިއުމުގެ ހުއްދަ ދިނުމުން ބެން އެންޑް ޖެރީން ވަނީ ޔުނިލިވާގެ މައްޗަށް ދައުވާކޮށްފައެވެ. ނަމަވެސް އެއްބަސްވުމެއް ދަށުން އެ ދައުވާ ނިންމާލީ 2022 ވަނަ އަހަރުއެވެ.
ބެން އެންޑް ޖެރީން ވަނީ ހުޅަނގު އައްސޭރިއާއި އިރުމަތީ ގުދުސް ހިމެނޭހެން އިސްރާއީލުން ގާނޫނާއި ހިލާފަށް ހިފައިގެން އުޅޭ ފަލަސްތީނުގެ ސަރަހައްދުތަކުގައި އެ ބްރޭންޑުގެ އައިސްކްރީމް ވިއްކަން ބޭނުން ނުވާ ކަމަށް މީގެކުރިން ބުނެފައެވެ.
ބެން އެންޑް ޖެރީއިން ކުރި އާ ދައުވާގައި ބުނެފައި ވަނީ ޔުނިލިވާއިން 2022 ވަނަ އަހަރުގެ އެއްބަސްވުމުގެ ޝަރުތުތަކާ ހިލާފުވެފައިވާ ކަމަށެވެ. އެ އެއްބަސްވުމުގެ ދަށުން ބެން އެންޑް ޖެރީގެ އިޖުތިމާއީ ހަރަކާތްތައް ހިންގުމަށް ބެން އެންޑް ޖެރީގެ މިނިވަން ބޯޑުގެ އަސާސީ ޒިންމާ އޮންނަ ކަމަށް ގަބޫލުކޮށް އިހުތިރާމް ކުރަންޖެހޭ ކަމަށް އެ ދައުވާގައިވެއެވެ.
ނަމަވެސް ބެން އެންޑް ޖެރީ އިން ހަތަރު ފަހަރެއްގެ މަތިން ސުލްހައާއި އިންސާނީ ހައްގުތަކަށް ތާއީދުކޮށް ވާހަކަ ދައްކަން މަސައްކަތްކޮށްފައިވާ ކަމަށާއި އެއިން ކޮންމެ ފަހަރަކުވެސް ޔުނިލިވާއިން އެކަން ހުއްޓުވާފައިވާ ކަމަށް އެ ދައުވާގައި އިތުރަށް ބުނެފައިވެއެވެ.
އެގޮތުން ޣައްޒާ ހަނގުރާމަ ހުއްޓާލުމަށް ގޮވާލައި، ފަލަސްތީނުގެ ރެފިއުޖީން އިނގިރޭސިވިލާތަށް ރައްކާތެރިކަމާއެކު ގެންދިއުމަށް ތާއީދުކޮށް، ޣައްޒާގައި އާންމުން މަރުވުމާ ދެކޮޅަށް އެމެރިކާގެ ކޮލެޖުތަކުގައި މުޒާހަރާކުރާ ދަރިވަރުންނަށް ތާއީދުކޮށް، އިސްރާއީލަށް އެމެރިކާއިން ދޭ އަސްކަރީ އެހީ ހުއްޓުވުމަށް ވަކާލާތުކުރަން މަސައްކަތްކުރި ނަމަވެސް ޔުނިލިވާއިން އެކަން ހުއްޓުވާފައިވާ ކަމަށް ބެން އެންޑް ޖެރީއިން ބުނެއެވެ.
އެ މައްސަލައާ ގުޅިގެން ރޮއިޓާސް އިން އާންމުކުރި ޚަބަރަށް ރައްދު ދީ ނެރުނު ބަޔާނެއްގައި ޔުނިލިވާއިން ބުނެފައިވަނީ މެދުއިރުމަތީގައި ހިނގާ ހިތާމަވެރި ހާދިސާތަކުގެ ޝިކާރައަކަށް ވެފައިވާ އެންމެންނަށް ހަމްދަރުދީވާ ކަމަށެވެ. ބެން އެންޑް ޖެރީގެ ސޯޝަލް މިޝަން ބޯޑުން ދައްކާ ވާހަކަތައް ދޮގުކުރާ ކަމަށާއި އެ މައްސަލަ ވަރަށް ވަރުގަދައަށް ދިފާއު ކުރާނެ ކަމަށްވެސް ޔުނިލިވާއިން ބުނެފައިވެއެވެ.
ނަވާރަ ސަތޭކަ ހަތްދިހަ އަށް ވަނަ އަހަރު ބެން ކޯހެން އާއި ޖެރީ ގްރީންފީލްޑް އުފެއްދި ބެން އެންޑް ޖެރީން އަކީ އިޖުތިމާއީ ކަންކަމުގައި އަޑުއުފުލާ ކުންފުންޏެކެވެ.
ޔުނިލިވާގެ އުފެއްދުންތަކުގެ ތެރޭގައި ޑޯވް ސައިބޯނި، ހެލްމަންގެ މެޔޮނައިޒް، ނޯ ބޮއިލޮން ކިއުބްސް، ސާފް ޑިޓާޖެންޓް އަދި ވެސްލިން ޕެޓްރޯލިއަމް ޖެލީ ހިމެނެއެވެ.