ދިވެހިރާއްޖޭގައި އުނގަންނައި ދިނުމަށް ކުރެވޭ މަސައްކަތަކީ ޒަމާނުއްސުރެ ވަރަށް ޚާއްޞަ އިސްކަމެއް ދެވިގެން ކުރަމުން ގެންދިޔަ މަސައްކަތެކެވެ. އެހެންކަމުން އުނގަންނައި ދެއްވާ އެދުރުންނަށް އިހުތިރާމް ކުރުމާއި، އެބޭފުޅުންނަށް އެކި ގޮތްގޮތުން އެހީތެރިވެދިނުމަކީ ދިވެހި މުޖުތަމަޢުގައި ހަރުލާފައިވާ ރީތި އާދައެކެވެ. އަދި ދިވެހިންގެ ތެރޭގައި ޒަމާންތަކަކަށް ދެމިގެންދިޔަ ސަޤާފީކަމެކެވެ. ކުރީ ޒަމާނުގައި އުނގަންނައިދޭ އެދުރުންނަށް ކުރެވޭ އިޙުތިރާމާއި ޤަދަރަކީ މިއަދުގެ މުޖުތަމަޢުން ދިރުވަން މަސައްކަތް ކުރާ ދިވެހިންގެ މުހިއްމު، ދިވެހިން ފަޚުރުވެރިވާ ސިފައެއްވެސް މެއެވެ.
މީލާދީން އޮނަވިހިސަތޭކަ ނުވަދިހަ ހަތަރު ވަނަ އަހަރުގެ އޮކްޓޯބަރ މަހުގެ ފަސްވަނަ ދުވަހުން ފެށިގެން ކޮންމެ އަހަރެއްގެ އޮކްޓޯބަރ މަހުގެ ފަސް ވަނަ ދުވަސް އެއީ ދުނިޔޭގެ މުދައްރިސުންގެ ދުވަހުގެ ގޮތުގައި ފާހަގަ ކުރަން ޔުނެސްކޯއިން ނިންމެވި ހިސާބުން ދިވެހިރާއްޖޭގައި ވެސް މުދައްރިސުންގެ ދުވަސް ފާހަގަ ކުރަން ފެށުނެވެ. ޔުނެސްކޯގެ މަޤުޞަދަކީ ދިވެހިންވެސް ނުހަނު ބޭނުންވާ ކަމެއް ކުރުމުގެ، މަޤުޞަދެވެ. މުދައްރިސުން ކުރާ މަސައްކަތުގެ އަގުވަޒަން ކުރުމެވެ. މުދައްރިސުންނަކީ މުޖުތަމަޢުގައި ޤަދަރު އުފުލިގެންވާ ބަޔަކަށް ހެދުމެވެ. އެހެންކަމުން މިމަޤުޞަދު ހާޞިލުކުރުމަށްޓަކައި ރާއްޖޭގެ ސްކޫލް ތަކުގައި މުދައްރިސުންގެ ދުވަސް ފާހަގަ ކުރަން ފެށުނެވެ. މުދައްރިސުންގެ ދުވަސް ފާހަގަ ކުރުމުގެ ގޮތުން ސްކޫލްތަކުގައި ކުރަންފެށި މައިގަނޑު ކަމަކީ މުދައްރިސުންނާމެދު ދަރިވަރުންގެ ހިތުގައި އޮންނަ ލޯތްބާއި ކުލުނު ހާމަކުރުމެވެ. އެބޭފުޅުންނާ ދޭތެރޭ ކިޔަވާ ކުދީންނާ އެކުދިންގެ ބެލެނިވެރިންގެ ހިތުގައި އުފެދިފައި އޮންނަ ޝުޢޫރުތައް ހާމަކުރުމެވެ. މީގެ އިތުރަށް ސްކޫލްތަކުން އިސްނަންގަވައިގެން އެދުވަހާ ދިމާކޮށް ދަރިވަރުންނަށް މުދައްރިސުން ކުރައްވާ މަސައްކަތުގެ މަޢުލުމާތާ އެމަސައްކަތުގެ ވައްޓަފާޅި އާއި މަސައްކަތުގެ ބުރަކަން އިހުސާސްކޮށް ދިނުމަށްޓަކައި އެދުވަހުގެ ވަކި ގަޑިތަކެއްގައި ދަރިވަރުންގެ ތެރެއިން ކުދިބަޔަކު ކުލާސް ތަކުގައި ކިޔަވައިދޭ ގޮތަށް ހަމަޖައްސަވައިގެން އެދުވަހުގެ ޙަރަކާތްތައް ކުރިއަށް ގެންގޮސްފައިވެއެވެ. މިދެންނެވީ މުދައްރިސުންގެ ދުވަސް ފާހަގަ ކުރަން ފެށިގެން އައި ދުވަސްވަރު ކަންހިނގަމުންދިޔަ ގޮތެވެ.
ޒަމާން ބަދަލު ވެއްޖެއެވެ. ކިޔަވައި ދިނުމުގެ ވައްޓަފާޅިއަށްވެސް ބަދަލުތަކެއް އަތުވެއްޖެއެވެ. ޓީޗަރުން ކުރައްވާ މަސައްކަތް އެތައް ގުނައެއް އިތުރުވެސް ވެއްޖެއެވެ. މުދައްރިސުންނާ ދޭތެރޭ މުޖުތަމަޢު ދެކެމުންދިޔަ ގޮތަށްވެސް ބަދަލުތަކެއް އަންނަން ފަށައިފިއެވެ. ވަކިން ޚާއްޞަކޮށް މުދައްރިސުންގެ ދުވަސް ފާހަގަ ކުރުމުގެ ކަންތައްތަކަށް "އިންޤިލާބީ ބަދަލެއް" ވެސް އަތުވެއްޖެއެވެ. މިދެންނެވި ބަދަލަކީ އެކަމުގެ ނޭދެވޭ އަސަރު ޓީޗަރުންނާ ޓީޗަރުންގެ ޢާއިލާތަކަށް ކުރަމުންދާ ބަދަލެކެވެ. ރާއްޖެގެ ސްކޫލް މަދަރުސާތަކުގައި މިއަދު ފެތުރެމުންދާ "އެއްބައްޔަކީ" އެއްބަޔަކަށްވުރެ މޮޅަށް އަނެއްބަޔަކު ކަންކުރުމަށް މަސައްކަތް ކުރުމުގެ ބައްޔެވެ. މިކަމަކީ މީސްކޮޅު މަދު ގައުމެއްގައި، އަމުދުން ދައުލަތުން ޚަރަދު ކުރައްވައިގެން ތަޢުލީމީ ނިޒާމު ކުރިއަށް ގެންދަވާ، މައިގަނޑު ސްކޫލްތައް ސަރުކާރުން ހިންގަވާ ޤައުމެއްގައި އެއްގޮތަކަށްވެސް އޮންނަން ޖެހޭ ކަމެއްނޫނެވެ. އެހެންނަމަވެސް ރަސްމީގޮތުން އެކަން އިޢުލާން ކުރެވިފައި ނެތަސް މުދައްރިސުންގެ ދުވަސް ފަދަ ދުވަސް ފާހަގަ ކުރުމާއި ސްކޫލުގެ އިނާމު ދިނުމުގެ ހަފްލާ ފަދަ ހަފްލާތަކާއި ސްކޫލުތަކުގައި ކުރިއަށް ގެންދާ ކިޔަވައި ދިނުމާ ގުޅުންނެތް އިތުރު ހަރަކާތްތައް ކުރިއަށް ގެންދިއުމުގައި އަމަލު ކުރަމުންދާ ގޮތުން ސްކޫލުތަކުން، ސްކޫލު ހިންގުމުގެ ވާދައިގެ މުބާރާތެއްގައި ބައިވެރިވެގެން ހިނގާކަމުގެ އިހުސާސްވެސް ކުރެވެއެވެ. މިކަން އެންމެބޮޑަށް ފެނިގެންދާ ދުވަސްވަރަކީ މުދައްރިސުންގެ ދުވަސް ފާހަގަ ކުރުމުގެ ދުވަސްވަރެވެ.
މުދައްރިސުންގެ ދުވަސް ފާހަގަ ކުރުމުގެ ދުވަސްވަރު ކަމުގައި ދެންނެވުމުން މުދައްރިސުންގެ ދުވަހަކީ ވަކި މޫސުމެއްކަމުގައި ސިފަކުރެވިދާނެއެވެ. ހަގީގަތަކީވެސް އެއީއެވެ. އެއްދުވަހުގެ ވަގުތުކޮޅެއްގައި ފާހަގަކުރި މުދައްރިސުންގެ ދުވަސް ފާހަގަކުރުން މުޅިދުވަހަށް، އޭގެ ފަހުން ދެދުވަހަށް ދުވަސްކޮޅެއް ފަހުން "ޓީޗާސް އެޕްރިސިއޭޝަން ވީކް" ގެ ގޮތުގައި މުޅި ހަފްތާއަށް، އެންމެފަހުން މުޅި އޮކްޓޯބަރ މަހަށް މުދައްރިސުންގެ ދުވަހުގެ ހަރަކާތްތައް ފެތުރިގެން ދިޔައީއެވެ. މުދައްރިސުންނަށް ހަދިޔާއެއްގެ ގޮތުގައި ދަރިވަރުން ކޮންމެ ކުއްޖަކު ވަކި ހަދިޔާއެއް ދިން ދުވަސްވަރު މާޒީވެ، މުދައްރިސުންގެ އަގުވަޒަންކުރުމަށްޓަކައި އެބޭފުޅުންނަށް ހަދިޔާ ހޯދައި ދިނުމަށްޓަކައި ސްކޫލްތަކުން އިސްވެ، ބެލެނިވެރީން ދީލަތި ފަރާތްތަކުގެ އެހީތެރިކަމަށް އެދި ދަންނަވަންވެސް ފެށީއެވެ. ނަން މަޝްހޫރު ރެސްޓޮރެންޓްތަކާއި ރިސޯޓްތަކުން ކެއުމާއި ރިސޯޓްގައި ޗުއްޓީ ހޭދަ ކުރުމާ، އެއަރލައިންތަކުން ޓިކެޓް ހޯދުމާ، ހައްޖުއުމްރާ ގްރޫޕްތަކުން ޢުމްރާ ދަތުރު ހޯދުމާ ހިސާބަށް ހަދިޔާގެ ކަންކަންވެސް ފުޅާވެގެން ދިޔައީއެވެ.
މިދެންނެވީ މިއަދާ ހިސާބަށް މުދައްރިސުންގެ ދުވަސް ފާހަގަކުރުމުގެ ކަންކަން ކުރިއަށްދާ ގޮތެވެ. ދެންއޮތީ މިކަމުން މުދައްރިސުންނަށް ކުރާ އަސަރުގެ ވާހަކައެވެ. މުދައްރިސުންގެ ދުވަސް ކައިރިވާން ފެށުމުން ކޮންމެ ދުވަހަކަށް ވަކި ކުލައެއް ކަނަޑައަޅައި އެކިދުވަސްތަކަށް އެކިކުލަކުލައިގެ ހެދުން ހޯދުމަށް މުދައްރިސުން ޚަރަދުތައް ކުރައްވަން ޖެހެއެވެ. ސްކޫލުން މުދައްރިސުންގެ ދުވަސް ފާހަގަ ކުރުމަށް ވަކިވަކި ޑިޕާޓްނަމްޓް ތަކާއި އެކި ސެކްޝަންތަކުން އިންތިޒާމް ކޮށްގެން ބާއްވާ ހަދިޔާ ބަދަލު ކުރުމާއި އެކި ޕާޓީތަކާއި ކެއުންތަކަށް ގިނަ ޢަދަދެއްގެ ފައިސާ ޚަރަދު ކުރަންޖެހެއެވެ. މިކަންކަމުގައި ބައިވެރިވާން ބޭނުންނުވާ ޓީޗަރަށްވެސް "އެއްބާރުލުން ނުދޭ" މީހެއްގެ ހެދުން އަޅަން ބޭނުންނުވާތީ މިކަންކަމުގައި ބައިވެރިވުމަކީ މަޖުބޫރު ކަމަކަށް ވެފައިވެއެވެ.
ސްކޫލްތަކުގައި ޓީޗަރުންގެ ދުވަސް ފާހަގަ ކުރުމަށް ކުރާ ކަންކަމަކީ މުޖުތަމައުން ބަލައިގަންނަ ކަންކަންތޯ މިއީވެސް އުފައްދަން ރަނގަޅު ސުވާލެކެވެ. ޓީޗަރުންގެ ދުވަސް ކައިރި ވުމާއެކު އިޖުތިމާއީ ވިއުގަ އެކަމުގައި "ތެޅިފޮޅިގަންނަނީ" އާދަޔާ ޚިލާފު މިންވަރަކަށެވެ. މުދައްރިސުންގެ މަސައްކަތާ ބެހެވެން ފެށެއެވެ. އެބޭފުޅުންގެ މުސާރައާ މެދު ޝަކުވާތައް ކުރެވެން ފެށެއެވެ. އެބޭފުޅުންގެ ވަގުތު ހޭދަކުރާ މިންވަރާ މެދު ސުވާލު އުފެދެން ފަށައެވެ. އެންމެފަހުން މުދައްރިސުންގެ ޒާތީ ދިރިއުޅުމާ ބެހޭ ހިސާބަށް ކަންތައް ބޮޑުކޮށްލެވެއެވެ. ނަތީޖާއަކީ ޓީޗަރުންނަށް ކުރެވޭ ފުރައްސާރަ އެއްދުވަހުން އަނެއް ދުވަހަށް އިތުރުވުމެވެ. ޓީޗަރުންނަށް އެކިގޮތްގޮތަށް ގަނާ ކުރެވުމެވެ. މިދެންނެވުނީ ނޭދެވޭ އަސަރުގެ ކުޑަ މިންވަރެކެވެ. ޓީޗަރުންގެ ދުވަސް ފާހަގަ ކުރުމަށް މިހާތަނަށް ކަންކަން ކުރަމުންދިޔަ ގޮތުން މުޖުތަމައު ޓީޗަރުންނާމެދު ދެކޭ ގޮތް ބަދަލުވެ، ޒަމާނުއްސުރެ ދިވެހި މުޖުތަމަޢުގައި ޓީޗަރުންނަށް ކުރަމުންދިޔަ އިޙުތިރާމާއި ގަދަރަށް އުނިކަން ލިބެމުންދާ ކަމީ ރާއްޖެގެ ސްކޫލްތަކުގައި މަސައްކަތް ކުރައްވާ ގިނަ ޓީޗަރުން އެއްބަސްވެވަޑައިގަންނާވަނެ ހަގީގަތެކެވެ. ޔުނެސްކޯއިން ޓީޗަރުންގެ ދުވަސް ފާހަގަ ކުރެއްވުމުގެ މަޤުޞަދު މިހާތަނަށް ރާއްޖޭގައި ހާސިލުވެފައި ނުވާކަން، އޭރު ކަމާ ހަވާލުވެ ތިއްބެވި ބޭފުޅުންގެ ޒަމީރުވެސް އެއްބަސްވާނެއެވެ. މިއަދުގެ ހަގީގަތަކީ މުދައްރިސުންގެ ދުވަސް ފާހަގަ ކުރުމަށް ސްކޫލްތަކުގައި ކަންކަން ކުރާގޮތް ބަދަލުވުމަކީ ސްކޫލްތަކުގައި މަސައްކަތް ކުރައްވާ ހަމަކޮންމެ މުދައްރިސެއްގެވެސް އުއްމީދެވެ. އެބޭފުޅުންނަށް ސީދާ ގޮތުންނާއި ނުސީދާ ގޮތުން ކުރެވޭ އެންމެ ބޮޑު ގަނާ ކުރުމަކީ މުދައްރިސުންގެ ދުވަސް ކަމަށް ވެފައިވާވުން ބަދަލު ވުމަކީ މުދައްރިސުން ހިތުގެ އަޑިން އެދިއެދި ތިއްބެވި ކަމެކެވެ. މިއަދު މިއޮތީ އެއުއްމީދު ހަގީގަތަކަށް ވުމުގެ ކޮޅުމަތި ފެނިފައެވެ. ސަރުކާރުން މުދައްރިސުންގެ ދުވަސް ފާހަގަ ކުރެއްވުމަށް ސްކޫލް ތަކުގައި އަމަލު ކުރާނެ ގޮތުގެ ގައިޑް ލައިނެއް ތައްޔާރު ކުރައްވައި ނިންމެވި ނިންމެވުމަކީ މުދައްރިސުންނަށް ޓީޗަރުންގެ ދުވަހު ދެއްވާ އެންމެ އަގު ބޮޑު ހަދިޔާއެވެ. އެކަމުގެ ސަބަބުން މުޖުތަމަޢުގައި ޓީޗަރުންނަށް ކުރެވޭ ފުރައްސާރަ މަދުކުރެވިގެން ދާނެއެވެ. ޓީޗަރުންނަށް ކުރެވޭ އިޙުތިރާމް އިތުރުވެގެން ދާނެއެވެ.