ސްރީލަންކާގައި އިއްޔެ ބޭއްވި ރިޔާސީ އިންތިޚާބުން އެއްވެސް ކެންޑިޑޭޓަކަށް 50 ޕަސެންޓަށް ވުރެ އިތުރަށް ވޯޓު ނުލިބުމުން، ދެވަނަ ފަހަރަށް ވޯޓު ގުނަން ނިންމައިފިއެވެ.
ލަންކާގައި ރިޔާސީ އިންތިޚާބުގައި ވޯޓުލާއިރު، ތިން ކެންޑިޑޭޓަކު ޚިޔާރު ކުރެވޭނެއެވެ. އެގޮތުން އެންމެ ކަމުދާ ކެންޑިޑޭޓެއްގެ ނަމުގެ ކައިރީގައި 1، ދެވަނައަށް އެންމެ ކަމުދާ ކެންޑިޑޭޓެއްގެ ނަމުގެ ކައިރީގައި 2 އަދި ތިން ވަނަ ކެންޑިޑޭޓުގެ ނަމުގެ ކައިރީގައި 3 ޖެހޭނެއެވެ.
އިއްޔެ ބޭއްވި އިންތިޚާބުން މިހާތަނަށް ގުނާފައިވާ ވޯޓުން ދައްކާ ގޮތުގައި އެންމެ ގިނަ ވޯޓު ހޯއްދަވައިފައިވަނީ ނެޝަނަލް ޕީޕަލްސް ޕާޓީ (އެންޕީޕީ) އެލަޔަންސްގެ ކެންޑިޑޭޓް އަނޫރާ ކުމާރަ ޑިސަނަޔަކަ އެވެ. އޭނާއަށް ލިބިފައިވަނީ 39.45 ޕަސެންޓު ވޯޓު ކަމަށްވާއިރު، އޭނާއާ އެންމެ ގާތުން ވާދަކުރައްވާ ސަޖިތު ޕްރަމަދާސައަށް ލިބިފައި ވަނީ 34.32 ޕަސެންޓެވެ.
އެ އިންތިޚާބުގައި 38 ކެންޑިޑޭޓުން ވާދަކޮށްފައިވާއިރު، ދެވަނަ ބުރުގައި ގުނާއިރު ބަލާނީ ޑިސަނަޔަކަ އާއި ޕްރަމަދާސައަށް ވޯޓު ދީފައިވާ މިންވަރަށެވެ.
ދެވަނަ ބުރުގައި ވޯޓު ގުނާއިރު ބަލާނީ، އެންމެ ކަމުދާ ކެންޑިޑޭޓުގެ ގޮތުގައި އެހެން ކެންޑިޑޭޓުން ޚިޔާރުކޮށްފައިވާ ވޯޓު ކަރުދާސްތަކުގައި ދެވަނައަށް ނުވަތަ ތިންވަނައަށް އެންމެ ކަމުދާ ކެންޑިޑޭޓުގެ ގޮތުގައި ޑިސަނަޔަކަ ނުވަތަ ޕްރަމަދާސަ ޚިޔާރުކޮށްފައިވޭތޯއެވެ. އެގޮތުން ޚިޔާރުކޮށްފައިވާ ނަމަ އެއީ އެ ކެންޑިޑޭޓަކަށް ލިބޭ ވޯޓެއްގެ ގޮތުގައި ގުނާނެއެވެ.
މި އިންތިޚާބުގައި ވޯޓުލުމުގެ ހައްގު ލިބިފައިވާ 17.1 މިލިއަން މީހުންގެ ތެރެއިން 76 ޕަސެންޓު ވޯޓުލާފައިވެއެވެ.
އެ އިންތިޚާބުގެ ކެމްޕެއިންގައި ހުރިހާ ކެންޑިޑޭޓުން ވެސް އެންމެ ބޮޑު އިސްކަމެއް ދީފައި ވަނީ ގައުމުގެ އިގުތިސާދީ ހާލަތު ރަނގަޅު ކުރުމާއި ކޮރަޕްޝަން ނައްތާލުމުގެ ވައުދުތަކަށެވެ.