ސަރުކާރު ހިއްސާވާ ކުންފުނިތަކުގެ ޑިރެކްޓަރުންގެ ބޯޑަށް ބޭނުންވާ އެކައުންޓިން އެންޑް ފައިނޭންސް ދާއިރާގެ މެންބަރުން އައްޔަނުކުރުމަށް ޑިރެކްޓަރުންގެ ޕޫލްގައި ހިމެނޭ ބޭފުޅުންގެ ނަންތައް އާއްމުކޮށްފިއެވެ.
ޕްރައިވެޓައިޒޭޝަން އެންޑް ކޯޕަރަޓައިޒޭޝަން (ޕީސީބީ) އިން އެ ނަންތައް އާއްމުކޮށްފައި ވަނީ ދައުލަތުގެ ވިޔަފާރި ތަންތަން ޕްރައިވެޓައިޒް ކުރުމާއި ކޯޕަރަޓައިޒް ކުރުމާއި މޮނިޓާކޮށް އިވެލުއޭޓްކުރުމުގެ ގާނޫނުގެ ދަށުންނެވެ.
އެގޮތުން މިދިޔަ ބުރާސްފަތި ދުވަހު ޕީސީބީން ކުރި އިއުލާނެއްގައި ވަނީ އެސްއޯއީ ކުންފުނިތަކުގެ ޑިރެކްޓަރުންގެ ބޯޑަށް އައްޔަނުކުރާނެ 48 ނަމެއް އާއްމުކޮށްފައެވެ.
ޕީސީބީއިން މީގެ ކުރިން ބުނީ ސަަރުކާރުގެ ކުންފުނިތައް ހަރުދަނާކުރުމަށް އެ ބޯޑުން ކުރަމުންދާ މަސައްކަތުގެ ތެެރެއިން، ކުންފުނީގެ ބޯޑު އޮޑިޓް ކޮމިޓީތަކުގެ މަސައްކަތް ހަރުދަނާ ކުރުމަށް މަސައްކަތް ކުރަމުން އަންނަ ކަމަށެވެ.
އަދި ކުންފުނިތަކުގެ އޮޮޑިޓް ކޮމެޓީތަކުގައި އެކައުންޓިން އަދި ފައިނޭންސް ދާއިރާގެ ޑިރެކްޓަރުގެ މަގާމަށް ޑިރެކްޓަރުން އައްޔަނު ކުރަނީ މުޅި ކުންފުނީގެ އެތެރޭގެ ކޮންޓްރޯލާއި ރިސްކު މެނޭޖުމަންޓް ހަރުދަނާކުރުމަށް ކަމަށް ޕީސީބީން ބުންޏެވެ.
އެެހެންވެ ކުންފުންޏަކީ މާލީ ގޮތުން ފުދުންތެރި ކުންފުންޏަކަށް ހެދުމަށް ބޭނުންވާ އިރުޝާދު ދެވޭ ފަންނީ ފަރާތްތަކެއް ހޯދުމަށް، ޑިރެކްޓަރުންގެ ޕޫލެއް އެކުލަވާލުމަށް، އެ ބޯޑުން ނިންމީކަމަށް ޕީސީބީއިން ބުންޏެވެ.
ހަމައެއާއެކު އެ ޑިރެކްޓަރުން ކުންފުނިތަކުގެ ބޯޑަށް އައްޔަނުކުރުމާއެކު ކުންފުނިތަކުގެ ބޯޑުގައި އެކައުންޓިން އަދި ފައިނޭންސް ދާއިރާގެ ތަޖުރިބާ ހުރި، އިންޓަނޭޝަނަލް ފެޑަރޭޝަން އޮފް އެކައުންޓްސް (އައިފެކް) އިން ގަބޫލުކުރާ ފެންވަރުގެ ފަންނީ ފަރާތެއް ހިމެނޭކަން ކަށަވަރުކުރެވިގެން ދާނެ ކަމަށް ވެސް ޕީސީބީން ބުނެފައިވެއެވެ.