ވޮޝިންޓަން (21 ސެޕްޓެމްބަރު 2024) : ފަލަސްތީނުގެ ނަސްލު ނައްތާލުމުގެ ގަތުލުއާންމުތައް ހިންގާ ކަމަށް ބައިނަލްއަގްވާމީ ޖިނާއީ ކޯޓުން ތުހުތުކޮށްފައިވާ އިސްރާއީލުގެ ބޮޑުވަޒީރު ބެންޖަމިން ނަތަންޔާހޫ މިދިޔަ ޖުލައި މަހު އެމެރިކާއަށް ކުރި ދަތުރުގައި އެމެރިކާގެ ކޮންގްރެސްގެ ބައެއް މެންބަރުން އޭނާއަށް މަރުހަބާ ކިޔާފައިވަނީ އެމެރިކާގައި ހަރަކާތްތެރިވާ ޔަހޫދީ އެންމެ ބޮޑު ޔަހޫދީ ލޮބީ ގްރޫޕް ކަމަށްވާ "އައިޕެކް" އިން ފައިސާގެ އެހީ ދީގެންކަން ހާމަވެއްޖެއެވެ.
ކޮންގްރެސްގެ ޑިމޮކްރެޓިކް ޕާޓީގެ ބައެއް މެންބަރުންނާ ހަވާލާދީ ތުރުކީގެ "އަނަތޯލިޔާ ނިއުސް އެޖެންސީ" ބުނާގޮތުން ނަތަންޔާހޫ އަކީ ޣައްޒާގެ އާންމުންގެ 40 ހާހަށްވުރެ ގިނަ މީހުން މަރާލައިފައިވާ މީހެކެވެ. އަދި ޣައްޒާގެ ހޮސްޕިޓަލްތަކާއި ސްކޫލްތަކާއި އާންމުންގެ ގެދޮރަށް ހަމަލާދީ އެތަންތަން ފުނޑުފުނޑުކޮށް ބިމާހަމަކޮށް ޣައްޒާގެ ހޮސްޕިޓަލްތަކުގެ ބަލިމީހުންނާއި ޑޮކްޓަރުންގެ އެތަށް ސަތޭކަ ބަޔަކު މެރި ނުރައްކާތެރި މުޖްރިމެކެވެ. އެހެންވެ، ކޮންގްރެސްގެ ގިނަ މެންބަރުންތަކެއް ނިންމާފައިވަނީ ނަތަންޔާހޫ ކޮންގްރެސް އަށް ގޮސް ޚިތާބު ދޭގަޑީގައި އެތަނަށް ހާޒިރު ނުވުމަށެވެ.
އަދި ބައެއް މެންބަރުން ނިންމާފައިވަނީ ހާޒިރުވި ނަމަވެސް ނަތަންޔާހޫގެ ޚިތާބަށް ތަރުހީބު ނުދީ އޭނާގެ ވާހަކަތަކަށް ތާއީދުނުކުރުމަށާއި އަތްތިލަބަޑި ޖަހައި ނުހެދުމަށެވެ.
ކޮންގްރެސްގެ ބައެއް މެންބަރުންގެ ކިބައިގައި މިރޫހު ހުރިކަން "އައިޕެކް" ގެ އެޖެންޓުންނަށް އެނގިގެން އެ ޖަމްއިއްޔައިންވަނީ ދުރާލައި ކޮންގްރެސް މެންބަރުންނަށް ގުޅައި ނަތަންޔާހޫ ކޮންގްރެސް އަށް ދާ ވަގުތުގައާއި ޚިތާބު ދޭއިރު އޭނާއަށް މަރުހަބާ ކިޔުން ޝަރުތުކޮށް އެ މެންބަރުންނަށް ރިޝްވަތު ގެ ފައިސާ ހުށަހަޅާފައެވެ.
"އަނަތޯލިޔާ ނިއުސް އެޖެންސީ" ބުނާގޮތުން "އައިޕެކް" އިން ކޮންގްރެސްގެ މެންބަރުންނަށް ރިޝްވަތުގެ ގޮތުގައި ފައިސާ ހުށަހެޅީ "އިލެކްޝަން ޑޮނޭޝަން" ގެ ނަމުގައެވެ.
މިގޮތުން "އައިޕެކް"އިން އެތައް ހާސް ޑޮލަރަކުން ކޮންގްރެސްގެ މެންބަރުންނަށް ފައިސާ ދީފައިވާކަމަށާއި، މިއާއެކުވެސް ކޮންގްރެސްގެ ދެގޭގައި ހިމެނޭ 535 މެންބަރުންގެ ތެރެއިން 160 އަށް ވުރެ ގިނަ މެންބަރުން ނަތަންޔާހޫ ޚިތާބު ދިން ޖަލްސާއަށް ހާޒިރުވެފައިނުވާކަމަށް "އިންފޯމްޑް ސޯސް" އަކާ ހަވާލާދީ "އަނަތޯލިޔާ" ގެ ރިޕޯޓެއް ބުނެއެވެ.
ހާޒިރު ނުވި މެންބަރުންގެ ތެރޭގައި ގިނައީ ޑިމޮކްރެޓިކް ޕާޓީއަށް ނިސްބަތްވާ މެންބަރުންނެވެ.
ނަތަންޔާހޫ އަކީ ނާޒީ ޖަރުމަނުގެ ހިޓްލަރާ އެއްފަދަ އަނިޔާވެރިއެއްކަމަށް ސިފަކުރާއިރު އެފަދަ ނުރައްކާތެރި ކްރިމިނަލް މުޖްރިމަކަށް އެމެރިކާގެ ކޮންގްރެސް އިން މަރުހަބާ ކިޔުމާއި އަދި ޣައްޒާގެ އާންމުންނާ ދެކޮޅަށް އޭނާގެ ސިފައިން ހިންގާ ގަތުލުއާންމުތަކާއި ނަސްލު ނައްތާލުމުގެ ޖަރީމާތައް ދިފާއުކޮށް ނަތަންޔާހޫ ކޮންގްރެސްގައި ދިން ޚިތާބަށް ކޮންގްރެސްގެ މެންބަރުން މަރުހަބާ ކިޔައި އަތްތިލަބަޑި ޖެހުމުން އެމެރިކާގެ އަގުވަނީ ވަރަށް ބޮޑަށް ވެއްޓިފައި ކަމަށް އެމެރިކާގެ ވާތު ފިޔައިގެ މީހުން ދެކެއެވެ.
މި ފަރާތްތަކުންވަނީ އިންސާނީ ހައްގުތަކުގެ ނަމުގައި ދެން އެމެރިކާ ދުނިޔޭގައި ދައްކާނެ ވާހަކައެއް އޮންނާނެތޯ ސުވާލު އުފައްދައިފައެވެ.
އަނެއްކޮޅުން އިންސާނީ ހައްގުތަކަށް މަސައްކަތްކުރާ އެމެރިކާގެ ބައެއް ޖަމާއަތްތައް ބުނާގޮތުން އިސްރާއީލުގެ އަނިޔާވެރިކަމާއި ލާއިންސާނިއްޔަތު ކަމުގެ ސަބަބުން އިސްލާމީ ދުނިޔޭގެ އާންމުންގެ ނަފްރަތު ވެސް ވަނީ އެމެރިކާއަށް ވަރަށް ބޮޑަށް އަމާޒުވެފައެވެ. މިއީ އެމެރިކާގެ ރައްޔިތުން އެދޭގޮތް ނޫންކަމަށް އެޖަމާއަތްތަކުން ބުނެއެވެ.
މުހައްލިލުން ވިދާޅުވެފައިވާގޮތުގައި ދުނިޔޭގެ ދެ ބިލިޔަން މުސްލިމުންގެ ނުރުހުން އެމެރިކާއަށް އަމާޒު ވުމަކީ ޗައިނާއާ ދެކޮޅަށް އެމެރިކާ ކުރާ ޖިއޮޕޮލިޓިކަލް ހަނގުރާމައިގާ އެމެރިކާއަށް ގެއްލޭ ވަރަށް ބޮޑު އެއްޗެކެވެ.
އިސްރާއީލުން ޣައްޒާގެ އާންމުންނާ ދެކޮޅަށް ހިންގާ ގަތުލުއާންމުތައް އެެމެރިކާ ދިފާއުކޮށްފައި ޗައިނާގެ އިންސާނީ ހައްގުތަކުގެ ވާހަކަ އެމެރިކާ ދެއްކުމުން އެކަން ދެން ގަބޫލުކުރާނީ އަދި ބަލައިގަންނާނީ ކާކުތޯ އިސްލާމީ މުފައްކިރެއްކަމަށްވާ ވިޟާހު ޚަންފަރު ވަނީ ވިދާޅުވެފައެވެ.
އޭނާ ވިދާޅުވި ގޮތުގައި އިސްރާއީލުގެ އަނިޔާވެރިކަން ދިފާއު ކުރަން އުޅުމުގެ ސަބަބުން އެމެރިކާގައި ޒަމާނުއްސުރެ އޮންނަ ޚިޔާލު ފާޅުކުރުމުގެ މިނިވަންކަން ވެސް ވަނީ ވަރަށް ބޮޑަށް ހަނިވެފައެވެ.
އެމެރިކާއަކީ ހެއްދެވި ފަރާތާ ދެކޮޅަށްވެސް ބޭނުންއެއްޗެއް ކިޔުމާއި ދީންގަބޫލުނުކުރުމާ އަދި ބޭނުން ދީނެއް ގަބޫލުކުރުމުގެ މިނިވަންކަން އޮންނަ ގައުމަކަށްވިޔަސް އިސްރާއީލުން ހިންގާ ޖަރީމާތަކަށް ފާޑުކިޔުން މިހާރު އެމެރިކާގައިވަނީ ވަރަށް ބޮޑަށް ހަނިކޮށްފައެވެ.
އެމެރިކާގެ ކޮންގްރެސް އިން ދާދިފަހުން ފާސްކޮށްފައިވާ ގާނޫނެއްގައިވާ ގޮތުން އިސްރާއީލަށް ފާޑުކިޔުމަކީ އަދި ޔަހޫދީ އިސްތިއުމާރީ މޫމެންޓެއްކަމަށްވާ "ޒަޔަނިޒަމް" އަށް ފާޑުކިޔުމަކީ ވެސް އެންޓި ސެމިޓިޒަމްއެވެ. ނުވަތަ ޔަހޫދީންނާ ޖައްސާލުމުގެ އަމަލެކެވެ. މި ކަންކުރާ ފަރާތްތަކަށް މި ގާނޫނުގެ ދަށުން އަދަބު ދެވޭނެއެވެ.
މީހަކު ފާޅުކުރާ ޚިޔާލަކަށް އަދަބު ދިނުމަކީ އެމެރިކާގައި އޮންނަ ކަމަކަށްނުވި ނަމަވެސް ޖަރުމަނުވިލާތުގެ ކުރީގެ ޒައީމް އެޑޮލްފް ހިޓްލަރު ދެވަނަ ބޮޑު ހަނގުރާމައިގާ ޔަހޫދީންނާ ދެކޮޅަށް ހިންގިކަމަށް ބުނެވޭ "ހޮލޮކޯސްޓް" (ގަތުލުއާންމު) އަށް އިންކާރު ކުރުމަކީ ކުރިން ވެސް އަދި މިހާރު ވެސް އެމެރިކާގައި ޖަލުގެ އަދަބު ދެވޭ ކުށެކެވެ. މިއީ ޔަހޫދީންނާ ޖެހުމުން އެމެރިކާގައި ޚިޔާލު ފާޅުކުރުމުގެ މިނިވަންކަން ނޯންނަކަމުގެ ހެއްކެކެވެ.
އިސްރާއީލަށާއި "ޒަޔަނިޒަމް" އަށް ފާޑުކިޔުން މަނާކުރުމަށް އެމެރިކާގެ ކޮންގްރެސްއިން ގާނޫނެއް ފާސްކޮށްފައި ވުމުގެ އިތުރުން އިސްރާއީލުން ޣައްޒާގެ އާންމުންނާ ދެކޮޅަށް ހިންގާ ޓެރަރިޒަމްގެ އަމަލުތަކާއި ގަތުލުއާންމުތައް ކުށްވެރިކޮށް އިސްރާއީލާ ދެކޮޅަށް އަޑުއުފުލާ އެމެރިކާގެ ޔުނިވާސިޓީތަކުގެ ދަރިވަރުންނާ ދެކޮޅަށްވެސް އެމެރިކާގެ ފުލުހުންނާއި ސަލާމަތީ ބަރުތަކުން ގެންދަނީ ވަރަށް އަނިޔާވެރި ގޮތްގޮތަށް އަމަލު ކުރަމުންނެވެ.
މީގެތެރޭގައި އިސްރާއީލާ ދެކޮޅަށް އަޑުއުފުލާ ދަރިވަރުން ހައްޔަރުކުރުމާއި އެދަރިވަރުންނަށް ބިރުދެއްކުމާއި އެ ދަރިވަރުން ޔުނިވާސިޓީތަކުން ކަނޑާލުންފަދަ އިންސާނީ ހައްގުތަކާއި، ޚިޔާލު ފާޅުކުރުމުގެ މިނިވަންކަމާ ޚިލާފު އަމަލުތައް ހިމެނެއެވެ.
އެމެރިކާގައިވާ ޔަހޫދީ ލޮބީ ގްރޫޕްތަކުން އިސްރާއީލު ދިފާއު ކުުރުމަށް ޓަަކައި ފައިސާއާއި ރިޝްވަތުގެ ކަޅުފައިސާ ބޭނުންކުރުމަކީ އެ ލޮބީތައް ބަލިކަށިވެ އާންމުންގެ ތާއީދު ގެއްލެމުންދާ ކަމުގެ ހެއްކެތްކަމަށް ކަމާބެހޭ ރިޕޯޓްތައް ބުނެއެވެ.