މާލޭ ސިޓީގެ މަގުތަކުގައި ބަހައްޓާފައިވާ ބޭނުންނުކުރާ ބާ އުޅަނދުތައް މާލޭ ސިޓީ ކައުންސިލުން ނަގަން ފަށައިފިއެވެ.
ސިޓީ ކައުންސިލުގެ މި ހަރަކާތާ ގުޅިގެން ކައުންސިލްގެ މީޑިއާ އޮފިޝަލު އައިމިނަތު ޝަތުފާ ޝަފީއު ވިދާޅުވީ، މާލޭ މަގުތަކުގައި ބޭނުން ނުކޮށް ގިނަ އަހަރުތަކެއްވެފައިވާ ގިނަ އަދަދެއްގެ އުޅަނދުތައް އެބަހުރި ކަމަށެވެ. އޭގެތެރޭގައި އިންޖީނު ނެތް އުޅަނދުތައް ވެސް ހުރިކަމަށާއި އެވެހިކަލްތަކުގެ ސަބަބުން މަގުގެ ބޮޑު ބައެއް ބޭނުން ނުހިފި ގެއްލޭކަން އޭނާ ފާހަގަ ކުރެއްވިއެވެ.
އޭނާ ވިދާޅުވީ މިއަދު ފެށި މި ހަރަކާތަކީ މާލޭގެ މަގުތަކުގައި ކުނީގެ ގޮތުގައި ހުރި ވެހިކަލްތައް ނެގުމަށް ފެށި ހަރަކާތެއް ކަމަށެވެ.
"މި ހަރަކާތް ކޮންޓިނިއު ކުރާނެ ހަމަ ކުރިއަށްއޮތް ތަނުގައި. އެއީ މާލޭ މަގުމަތީގައި ވަރަށް ގިނަ ދުވަސް ވަންދެން ހަމަ ކުންޏަށް ވެފައި ހުރި ކާރު އެއްޗިސް އެބަ ހުރި،" އޭނާ ވިދާޅުވިއެވެ.
އޭނާ ވިދާޅުވީ، މި ހަރަކަތުގެ ތެރެއިން ޓޯ ކުރާ ވެހިކަލްތައް ބަލާއައުމަށް ވެރިފަރާތަށް ވަކި މުއްދަތެއް ދޭނެކަމަށެވެ. އަދި ވެރިފަރާތުން ހަވާލުނުވާ ވެހިކަލްތައް އޮންނަ އުސޫލުގެ ދަށުން ނައްތާލާނެ ކަމަށް އޭނާ ވިދާޅުވިއެވެ.
"އެބައި ކުރިއަށް ގެންދާނީ ޕޮލިހުން،" އޭނަ ވިދާޅުވިއެވެ.
ވެރިރަށް މާލޭގެ މަގުތަކުގެ 65 ޕަސެންޓު އަބަދު ވެސް ހިފައިފައި އޮންނަނީ ޕާކުކޮށްފައި އޮންނަ އުޅަނދުތަކުން ކަމަށާއި، މި ކަމުގެ ސަބަބުން މަގުމަތީގެ އެކްސިޑެންޓުތައް އިންތިހާއަށް އިތުރުވަމުންދާ ކަމަށް ޓްރާންސްޕޯޓު މިނިސްޓްރީން މީގެ ކުރިން ވަނީ ބުނެފައެވެ.
މީގެ ކުރިން ވެސް ޓްރާންސްޕޯޓު މިނިސްޓްރީއާއި މާލޭ ސިޓީ ކައުންސިލް އަދި ގިނަ އިދާރާތަކެއް ގުޅިގެން ވަނީ މާލޭ މަގުމަތިން ވެހިކަލްތައް މަދުކުރުމުގެ ހަރަކާތެއް ފަށައިފައެވެ.
އެގޮތުން 281 އުޅަނދު ނައްތާލއިފައި ވާކަމަށް މާޗު މަހު މިނިސްޓްރީން ބުންޏެވެ.