ހަތަރު ލައްކަ ރުފިޔާއަށް މާލެ ސިޓީ ކައުންސިލްގެ އިންޓާނަލް އޮޑިޓެއް ހެދުމަށް ކުރޯ މޯލްޑިވްސް އެލްއެލްޕީއާ މިއަދު ހަވާލުކޮށްފިއެވެ.
އެ ކައުންސިލުން މިއަދު ވަނީ ކައުންސިލްގެ އިންޓާނަލް އޮޑިޓެއް ހެދުމަށް ކުރޯ މޯލްޑިވްސް ހަމަޖައްސާފައިވާކަމަށް ބުނެފައެވެ. އަދި މި އޮޑިޓްގެ މަސައްކަތް ކުރިއަށްދާނީ މާދަމައިން ފެށިގެން 2026 ވަނަ އަހަރުގެ ޑިސެމްބަރު މަހުގެ 26 ވަނަ ދުވަހާ ހަމައަށް ކަމަށް އެ ކައުންސިލުން ވަނީ ބުނެފައެވެ.
ސިޓީ ކައުންސިލުން މައުލޫމާތު ދިން ގޮތުގައި އޮޑިޓް ހެދުމަށް ކްރޯ މޯލްޑިވްސްއާ ހަވާލުކޮށްފައި ވަނީ ހަތަރުލައްކަ ފަސްދޮޅަސް ހަހާސް ފައްސަތޭކަ ފަސްދޮޅަސް ރުފިޔާއަށެވެ.
އިންޓާނަލް އޮޑިޓެއް ހެދުމަށް އެ ކައުންސިލުން ނިންމާފައ ވާއިރު ދާދިފަހުން ތިން މިނިސްޓްރީއެއްގެ އިތުރުން ސިޓީ ކައުންސިލްގެ ބްރާންޗެއް ހިންގަމުން އައި އިމާރާތުގައި އަލިފާން ރޯވުމާއި ގުޅިގެން ވަނީ އެ ކައުންސިލްގެ ލިޔެކިޔުންތަކެއް އަނދައިގެން ގޮސްފައެވެ.
އަލިފާނުގެ އެ ހާދިސާގައި ގެއްލުން ލިބުނު ލިޔެކިޔުންތަކުގެ ތެރެެއިން 99 އިންސައްތަ ލިޔެކިޔުން ސަލާމަތް ކުރެވޭނެ ކަމުގެ ޔަގީންކަން އެބައޮތް ކަމަށް މާލެ ސިޓީ ކައުންސިލްގެ މޭޔަރު އާދަމް އާޒިމް މީގެ ކުރީން ވަނީ ވިދާޅުވެފައެވެ.
މާލޭ ރައްޔިތުންގެ ރަށްވެހިކަމާއި، އަލަށް މާލެ ސަރަހައްދަށް އުފަންވާ ކުދިންގެ ލިޔެކިޔުންތައް ބެލެހެއްޓުމުގެ އިތުރުން، އިމާރާތްތަކުގެ ރެޖިސްޓްރޭޝަން ފަދަ މުހިންމު ކަންކަން ބެލެހެއްޓުމުގެ މަސައްކަތް ހިނގަމުންދާ އެ އޮފީހުގެ ލިޔެކިޔުންތަކަށް ވަނީ އަލިފާނުގެ ހާދިސާގެ ސަބަބުން ގެއްލުންތަކެއްވެފައެވެ.
އެ ހާދިސާގައި ސަލާމަތްކުރެވުނު ސިޓީ ކައުންސިލްގެ ލިޔެކިޔުންތަކާއި އިމާރާތްތަކުގެ ކުރެހުންތައް ތަރުތީބުކުރުމުގެ މަސައްކަތް އެ ކައުންސިލުން މިހާރު އަންނަނީ ކުރަމުންނެވެ.