ޕްރޮސިކިއުޓާ ޖެނެރަލް ޢައްބާސް ޝަރީފު ބަންޑާރަނާއިބު އަޙްމަދު އުޝާމާ މިއަދު ބައްދަލުކުރައްވައިފިއެވެ.
އެޓާނީ ޖެނެރަލްގެ އޮފީހުގައި މިއަދު ކުރިއަށްދިޔަ ބައްދަލުކުރެއްވުމުގައި ބަންޑާރަނާއިބު ވަނީ ޕްރޮސިކިއުޓާ ޖެނެރަލް ޢައްބާސް މަޤާމަށް އައްޔަންކުރެއްވުމާ ގުޅިގެން އެމަނިކުފާނަށް މަރުޙަބާ ދަންނަވާފައެވެ.
ޕީޖީ އޮފީހުން މިއަދު ނެރެފައިވާ ބަޔާނެއްގައި ވަނީ މި ބައްދަލުކުރެއްވުމުގައި ދެބޭފުޅުން ޖިނާއީ ޢަދުލުގެ ނިޒާމު އިތުރަށް ހަރުދަނާކޮށް ކުރިއެރުވުމާ ގުޅޭގޮތުން މަޝްވަރާ ކުރައްވާފައިވާ ކަމަށެވެ.
އަދި ޕީޖީ އައްބާސް، ޖިނާއީ ޢަދުލުގެ ނިޒާމު އިތުރަށް ފުރިހަމަކުރުމަށް ގެންގުޅުއްވާ ތަޞައްވުރު ބަންޑާރަނާއިބާ ހިއްސާކުރެެއްވި ކަމަށް ވަނީ ބުނެފައެވެ.
މި ބައްދަލުކުރެއްވުމުގައި ބަންޑާރަނައިބު އުޝާމު ވަނީ، ޕީޖީގެ މަޤާމުގެ ޒިންމާތައް އަދާކުރެއްވުމުގައި، ތެދުވެރިކަމާއެކު ދެމިހުންނެވުމަށް ޕީޖީ އައްބާސަށް ހިތްވަރު ދެއްވާފައެވެ.
ޤާނޫނުއަސާސީގެ 220 ވަނަ މާއްދާގައި ބަޔާންކޮށްފައިވާ ގޮތުގައި ޕީޖީގެ މަސްއޫލިއްޔަތުތައް އަދާކުރާންވާނީ އަދި ބާރުތައް ބޭނުންކުރާންވާނީ، އެއްވެސް ފަރާތަކަށް ޖެހިލުންވުމެއްނެތި، ވަކިފަރާތަކަށް މަންފާއެއް ހޯދައިދިނުމެއްނެތި، ތައައްސުބުން އެއްކިބާވެ ހުރެ ބަންޑާރަނައިބު ކަނޑައަޅުއްވާ މައިގަނޑު ސިޔާސަތުތަކާ އެއްގޮތަށެވެ.
އެހެންކަމުން ޕީޖީގެ މަސައްކަތްޕުޅު ބައްޓައްކުރާނެ ގޮތުގެ މައިގަނޑު ސިޔާސަތުތައް ކަނޑައަޅާ ފަރާތަކީ ބަންޑާރަނައިބު ކަމަށް ވެސް އެ ބަޔާނުގައި ވަނީ ބުނެފައެވެ.