މާލެ ސަރަހައްދުގައި ގަވާއިދާ ޚިލާފަށް ބިދޭސީން ދިރިއުޅޭ ތަންތަނާއި މުޑުދާރުކޮށް ކާބޯތަކެތި ތައްޔާރު ކުރާ ތަންތަން ބަލައި ފާސްކުރުމަށް އިމިގްރޭޝަނުން ހިންގާ އޮޕަރޭޝަނުގެ ތެރެއިން ބިދޭސީންތަކެއް އަތުލައިގެންފިއެވެ.
އިމިގްރޭޝަނުން އެކްސްގައި ކޮށްފައިވާ ޕޯސްޓެއްގައި ބުނީ، އިމިގްރޭޝަންގެ ޓާސްކްފޯހުން ހިންގަމުން އަންނަ އޮޕަރޭޝަންގެ ދަށުން މިދިޔަ ހޯމަ ދުވަހު މާލޭން ހަތަރު ތަނެއް ބަލާ ފާސްކޮށްފައިވާ ކަމަށެވެ.
އޭގެތެރޭގައި، ދެ ހޮޓަލާއި ދެ ގެއެއް ހިމެނޭއިރު، އެތަންތަނުގައި އުޅޭ ހަތް ބިދޭސީއަކު އަތުލައިގެންފައިވާ ކަމަށް އިމިގްރޭޝަނުން ބުނެފައިވެއެވެ.
އިމިގްރޭޝަނުން ހިއްސާކޮށްފައިވާ ފޮޓޯތަކުން ފެންނަ ގޮތުގައި، ބިދޭސީންތައް އަތުލައިގަތީ ވަރަށް މުޑުދާރުކޮށް، ކައްކާ ހޮޓާތަކަކުންނެވެ. އެތަންތަނުގައި ބޭނުންކުރާ ސާމާނާ އެތަން ވެސް ސާފުނުކޮށް ގިނަދުވެސްވެފައިވާ ތަން ފޮޓޯތަކުން ފެނެއެވެ.
ނުގަވައިދުން އުޅޭ ބިދޭސީން ހޯދުމަށް އިމިގްރޭޝަނުން މިހާރު ފަށާފައިވާ އޮޕަރޭޝަންގެ ތެރެއިން ގިނަ މައްސަލަތަކެއް އަންނަނީ ފެންމަތިވަމުންނެވެ.
އެ އޮޕަރޭޝަންގެ މަގުސަދަކީ ރާއްޖޭގައި ގަވާއިދާ ޚިލާފަށް އުޅޭ ބިދޭސީންގެ މައްސަލައަށް އަވަސް ހައްލެއް ހޯދައިދިނުން ކަމަށް އިމިގްރޭޝަނުން ބުނެފައިވެއެވެ.