އިމިގްރޭޝަން އޮފިސަރުން ކަމަށް ބުނެ ބިދޭސީން އުޅެމުންދާ ތަންތަން ބަލާ ޗެކްކޮށް ސްކޭމެއް ކުރިއަށްގެންދާތީ އެ ކަމަށް ސަމާލުވެ، އެ މީހުންގެ މައުލޫމާތު އާންމުކުރުމަށް އިމިގްރޭޝަނުން އެދިއްޖެއެވެ.
އިމިގްރޭޝަނުން އެކްސްގައި ކޮށްފައިވާ ޕޯސްޓުގައި ވަނީ އިމިގްރޭޝަން އޮފިސަރުންކަމަށް ބުނެ އޮޅުވާލައިގެން ބިދޭސީން އުޅެމުންދާ ތަންތަން ބަލާ ފާސްކުރަމުންދާކަމުގެ މައުލޫމާތު އެ އިދާރާއަށް ލިބިފައިވާ ކަމަށެވެ.
އެހެންކަމުން އެއީ އިމިގްރޭޝަން އޮފިސަރުން ނޫންކަމަށާއި ރެއިޑްތަކުގައި ހަރަކާތްތެރިވާ އިމިގްރޭޝަން އޮފިސަރުންނަމަ ޔުނީޕޯމުގެ އިތުރުން އިމިގްރޭޝަނުގެ ފާސް އޮންނާނެ ކަމަށް އެ އިދާރާއިން ވަނީ ބުނެފައެވެ.
އިމިގްރޭޝަނުން ވަނީ މިފަދަ ކަންކަމަށް ސަމާލުވެ ޝައްކުވާނަމަ އެފަދަ މީހުންގެ ފާސް އަދި ފުރިހަމަ މައުލޫމާތު ބެލުމަށް އިލްތިމާސްކޮށްފައެވެ.
އިއްޔެ ވެސް އިމިގްރޭޝަން އޮފިސަރަކަށް ހެދިގެން، ބިދޭސީއެއް އަތުން 9،000 ރުފިޔާ ފޭރުނު މައްސަލައެއް ފުލުހަށް ވަނީ ހުށަހަޅައިފައެވެ.
އިމިގްރޭޝަނުން އަންނަނީ ގަވާއިދާ ޚިލާފަށް އުޅޭ ބިދޭސީން ހިފަހައްޓާ އެފަދަ ފަރާތްތައް ޑީޕޯޓް ވެސް ކުރަމުންނެވެ.
ފުލުހުންނާއި އިމިގްރޭޝަން އަދި، ޓްރާންސްޕޯޓް މިނިސްޓަރީއާއި ދައުލަތުގެ ކަމާބެހޭ މުއައްސަސާތައް ގުޅިގެން ފެށި މި ރެއިޑް އޮޕަރޭޝަންތަކުގެ ދަށުން މިހާރު ވަނީ ގިނަ އަދަދެއްގެ ގަވާއިދާ ޚިލާފަށް އުޅޭ ބިދޭސީން އަތުލައިގަނެ އެމީހުން ޑީޕޯޓް ކޮށްފައެވެ.