މާލޭގެ ކެފޭތަކެއް ބަލައިފާސްކޮށް، ގަވާއިދާ ޚިލާފަށް އުޅޭ ބިދޭސީންތަކެއް އިމިގްރޭޝަންގެ ބެލުމުގެ ދަށަށް އިއްޔެ ގެނެގޮސްފިއެވެ.
މިއަދު އިމިގްރޭޝަނުން ކުރި ޕޯސްޓެއްގައި ބުނީ، ގަވާއިދާ ޚިލާފަށް އުޅެމުންދާ ބިދޭސީންގެ މައްސަލަ ހައްލު ކުރުމަށް ކުރަމުންދާ މަސައްކަތުގެ ތެރެއިން މާލޭގައި ހުންނަ ތިން ކެފޭއެއް އިއްޔެ ބަލާ ފާސްކުރި ކަމަށެވެ.
އެގޮތުން، އެ ކެފޭތަކުގައި މަސައްކަތް ކުރަމުން ދިޔަ ހަތަރު ބިދޭސީ ފިރިހެނުންނާއި ބިދޭސީ އަންހެނެއް އިމިގްރޭޝަންގެ ބެލުމުގެ ދަށަށް ގެންގޮސްފައިވާ ކަމަށް އެ ޕޯސްޓުގައި ބުނެފައިވެއެވެ.
މި ފަހުން ކޮންޓްރޯލާ ޖެނެރަލް އޮފް އިމިގްރޭޝަން މުޙައްމަދު ޝަމްއާން ވަހީދު ވިދާޅުވީ، މި މަހުގެ 21ވަނަ ދުވަހާ ހަމައަށް ގަވާއިދާ ޚިލާފަށް އުޅޭ 4،361 ބިދޭސީއަކު ފުރުވާލާފައިވާ ކަމަށެވެ.
މީގެ ތެރޭގައި، އަމިއްލައަށް ބޭނުންވެގެން ރާއްޖެއިން ފުރުވާލާފައިވާ ފަރާތްތަކާއި ނޯޓިސްދީ ވަކި މުއްދަތެއްގެ ތެރޭގައި ރާއްޖެ ދޫކޮށް ދިއުމަށް އެންގުމުން ފުރާފައިވާ ފަރާތްތައް ހިމެނޭކަމަށް ވެސް ޝަމްއާން ވަނީ ވިދާޅުވެފައެވެ.
މި ސަރުކާރަށް އެއް އަހަރު ވާންވާއިރަށް ގަވާއިދާ ހިލާފަށް އުޅޭ 5،000 ބިދޭސީން ފޮނުވައިލެވޭނެ ކަމަށް ވެސް ޝަމްއާން ވިދާޅުވެފައިވެއެވެ.
ޝަމްއާން ވަނީ ގަވާއިދާ ޚިލާފަށް ރާއްޖޭގެ ބޯޑަރު ހުރަސްކުރަން ގިނަ ބަޔަކު މަސައްކަތްކުރާކަން ފާހަގަކުރައްވައިފައެވެ. އެގޮތުން މި އަހަރު 51 ބިދޭސީއަކު ގަވާއިދާ ޚިލާފަށް ރާއްޖޭގެ ބޯޑަރު ހުރަސްކުރަން މިހާތަނަށް މަސައްކަތް ކޮށްފައިވާކަން އޭނާ ފާހަގަކުރެއްވިއެވެ.