ހުޅުމާލޭގައި އުޅޭ ވެހިކަލް ދޮވެ ސާފުކުރާ ބިދޭސީންނަށް އަމާޒުކޮށް މޯލްޑިވްސް އިމިގްރޭޝަނުން އިއްޔެ ހިންގި އޮޕަރޭޝަނެއްގައި ގަވައިދާ ޚިލާފަށް އުޅުނު ފަސް މީހަކު އެ އިދާރާގެ ބެލުމުގެ ދަށަށް ގެންގޮސްފިއެވެ.
އިމިގްރޭޝަނުން މިރޭ އެކްސްގައި ކުރި ޕޯސްޓެއްގައިވަނީ ހުޅުމާލޭގައި ވެހިކަލް ދޮވެ ސާފުކުރުމަށް ބިދޭސީން ތިބޭ 05 ސަރަހައްދެއް އިއްޔެ ބަލައި ފާސްކޮށްފައިވާ ކަމަށެވެ.
އަދި ގަވާއިދާ ޚިލާފަށް ސައްހަ ވިސާއެއް ނެތި އުޅުނު ފަސް ބިދޭސީއަކު އިމިގްރޭޝަންގެ ބެލުމުގެ ދަށަށް ގެނެވިފައިވާކަމަށް ބުންޏެވެ.
އިމިގްރޭޝަނުން މިހާރު އަތޮޅު ތެރޭގައި ވެސް އަންނަނީ މިފަދަ އޮޕަރޭޝަންތައް ހިންގަމުންނެވެ. އެއީ މާލޭގައި އިމިގްރޭޝަންގެ އޮޕަރޭޝަންތައް ކުރިއަށްދާތީ ބައެއް ބިދޭސީން ފިލަން ވެސް ރަށްރަށަށް ދާތީކަމަށް އިމިގްރޭޝަނުން ވަނީ ބުނެފައެވެ.
މާލޭގައި ވެސް އެކި ސަރަހައްދުތަކުގައި ބިދޭސީން އެއްވެ، ވެހިކަލް ސާފުކުރަން ތިބިއެވެ. ޚާއްސަކޮށް ކާނިވާ ސަރަހައްދާއި، ފުޑްކޯޓު ސަރަހައްދު ހިމެނެއެވެ.