މާލޭގެ ސްކޫލަކަށް ވަދެ، އަޑުގަދަކޮށް ބައެއް ޓީޗަރުންނަށް ބިރުދެއްކިކަމުގެ ތުހުމަތުގައި މިދިޔަ ހަފުތާގައި މީހަކު ހައްޔަރުކޮށް، 30 ދުވަހަށް ބަންދުކުރަން ކްރިމިނަލް ކޯޓުން އަމުރުކޮށްފިއެވެ.
މި ހާދިސާ ހިނގާފައިވަނީ މިދިޔަ ހަފުތާގެ އަންގާރަ ދުވަހުއެވެ. މި މައްސަލައިގައި ފުލުހުން ހައްޔަރުކޮށްފައިވަނީ 41 އަހަރުގެ ދިވެހި ފިރިހެނެކެވެ.
ކޯޓު އަމުރުން އެނގޭ ގޮތުގައި އެ މީހާ ސްކޫލު ތެރެއަށް ވަދެ، ބައެއް ޓީޗަރުންނަށް ބިރުދެއްކި ކަމަށް އެ ސްކޫލުގައި މަސައްކަތްކުރާ ބައެއް މުވައްޒަފުން ވަނީ ހެކިބަސް ދީފައެވެ. އެކަމަކު، އެއްވެސް މީހެއްގެ ގައިގައި އަތްލާފައިނުވާ ކަމަށް އެ މީހުން ވަނީ ބުނެފައެވެ.
އެ މީހާ ބައެއް ޓީޗަރުންނަށް ބިރުދައްކާފައިވަނީ ސްކޫލު ދަރިވަރުންގެ ވެސް ކުރިމަތީގައެވެ.
ކޯޓު އަމުރުގައި މައްސަލަ ބެއްލެވި ގާޒީ އިސްމާއިލް ޝަފީއު ވަނީ މި މައްސަލައިގައި ބަންދުކުރި މީހާއަކީ ބިރުދެއްކުމުގެ މައްސަލަތަކުގެ ކުށުގެ ރިކޯޑު އޮތް މީހެއްކަން ފާހަގަކުރައްވައިފައެވެ.
އެހެންވެ، އޭނާ 30 ދުވަހުގެ މުއްދަތަކަށް ބަންދުކުރަން މިދިޔަ ބުދަ ދުވަހު ކޯޓުން ވަނީ އަމުރުކޮށްފައެވެ. އެ މުއްދަތު ހަމަވާނީ އަންނަ މަހު ހަޔަކަށެވެ.