އަންނަ ބުރާސްފަތި ދުވަހު ކަސްޓަމަރުންނާ އެކު އިހަވަންދިއްޕޮޅުގައި ބަންކަރިންގެ ޚިދުމަތް ފެށޭނެ ކަމަށް މޯލްޑިވްސް ޕޯޓްސް ލިމިޓެޑް (އެމްޕީއެލް)ގެ ސީއީއޯ މުޙައްމަދު ވަޖީހު އިބްރާހީމް މިރޭ ވިދާޅުވެއްޖެއެވެ.
ރާއްޖޭގެ އުތުރުގައި ބަންކަރިންގެ ޚިދުމަތް ފެށުމަށް ތައްޔާރުވެފައިވާއިރު، އެ ޚިދުމަތް ދިނުމުގައި އަމަލީ ގޮތުން ހަރަކާތްތެރިވަނީ ސްޓޭޓް ޓްރޭޑިން އޯގަނައިޒޭޝަން (އެސްޓީއޯ)އާއި އެމްޕީއެލްއެވެ.
އެސްޓީއޯއިން ބޯޓުތަކަށް ތެލުގެ ޚިދުމަތްދޭއިރު، އެމްޕީއެލުން ޚިދުމަތްދޭނީ ސީދާ ބޯޓުތަކަށް ބޭނުންވާ އެހެނިހެން ކަންކަމުގައެވެ. ވަޖީހު ވިދާޅުވި ގޮތުގައި ބަންކަރިންގެ ޚިދުމަތް ފެށުމާއެކު އެމްޕީއެލުން ބޯޓުތަަށް 14 ޚިދުމަތެއް ދޭނެއެވެ. އޭގެ ތޭރޭގައި ހިމެނެނީ:
- ޕައިލޮޓޭޖްގެ ޚިދުމަތް
- ކްރޫ ޗޭންޖު
- ޝިޕް ޓު ޝިޕް ސާވިސް
- ސާފު ބޯފެނުގެ ޚިދުމަތް
- ކާބޯތަކެތި ފޯރުކޮށްދިނުމުގެ ޚިދުމަތް
- އަޑީތެޔޮ ފޯރުކޮށްދިނުން
- ޔޮޓުފަހަރުތަކަށް ޑޮކުގެ ޚިދުމަތް
- މެއިންޓަނެންސްގެ ޚިދުމަތް
- އަންޑަވޯޓާ ސާވިސް
- ޓަގުގެ ޚިދުމަތް
- އެއްވެސް ހާދިސާއެއް ދިމާވެއްޖެ ނަމަ އެހީތެރިކަން ފޯރުކޮށްދިނުން
- ބޯޓުގައި އުފެދޭ ކުނިތައް ނައްތާލުމުގެ ޚިދުމަތް
ބަންކަރިން ޚިދުމަތް ދޭން ގެނައި ބައެއް އުޅަނދުތައް: ބަންކަރިން ޚިދުމަތް ފަށަން ވާންޖެހޭ ހުރިހާ ތައްޔާރެއްވެފައިވާ ކަމަށް އެމްޕީއެލުން ވަނީ ބުނެފައި -- ފޮޓޯ/ އެމްޕީއެލްގެ ސީއީއޯ
ވަޖީހު ވިދާޅުވި ގޮތުގައި ބަންކަރިންގެ ޚިދުމަތާ އެކު، ބޯޓުފަހަރަށް ދޭންޖެހޭ މި ހުރިހާ ޚިދުމަތެއް ދިނުމަށް އެމްޕީއެލުން މިހާރު ވަނީ ތައްޔާރުވެފައެވެ.
"މި ދެންނެވި 14 ޚިދުމަތަކީ މިހާރު އެމްޕީއެލުން ރެޑީވެފަ ހުރި ކަންތައް. އިންރާދަ ކުރެއްވިއްޔާ މި މަހުގެ 19ވަނަ ދުވަހު ބަންކަރިންގެ ޚިދުމަތް ފެށުމާ އެއްކޮށް އަޅުގަނޑުމެން މި ޚިދުމަތްތައް ފޯރުކޮށްދޭން ފަށާނަން" ވަޖީހު ވިދާޅުވިއެވެ.
އޭނާ ވިދާޅުވި ގޮތުގައި ބަންކަރިންގެ ޚިދުމަތް ފަށާ ދުވަހު، ކަސްޓަމަރުން ވެސް ލިބޭނެއެވެ. އެ ގޮތުން އެމްޕީއެލުން ދޭ ޚިދުމަތްތަކަށް ކަސްޓަމަރުން ހޯދުމަށް 24 ގަޑިއިރުގެ ކޯލް ސެންޓަރެއް ވެސް ގާއިމްކޮށްފައިވާ ކަމަށް އޭނާ ވިދާޅުވިއެވެ.
މި މަޝްރޫއުގެ ދެވަނަ ފިޔަވައްސެއްގެ ގޮތުގައި އިހަވަންދިއްޕޮޅުގައި އޮއިލް ޓާމިނަލާއި އޮއިލް ޓޭންކުތައް ގާއިމުކުރުމުގެ މަސައްކަތް ފައްޓަވާނެ ކަމަށް ވަޖީހު ވަނީ މީގެ ކުރިން ވިދާޅުވެފައެވެ.
އިހަވަންދިއްޕޮޅުގައި ބަންކަރިންގެ ޚިދުމަތް ދޭން ދެ ބޯޓެއް ބޭނުންކުރާނެއެވެ. އެއީ، 'މެރިން އޭޖަލް' އަދި 'މެރިން ބެލާ' ކިޔާ ދެ ބޯޓެކެވެ. ދެ ބޯޓު ވެސް މިހާރު އޮތީ އިހަވަންދިއްޕޮޅުގައެވެ.
އިހަވަންދިއްޕޮޅުގައި ބަންކަރިންގެ ޚިދުމަތް ފަށަން އެސްޓީއޯއިން ވިޓޯލާ އެކު އެމްޔޫއޯއެއްގައި ސޮއިކުރީ މާޗު 13ވަނަ ދުވަހުއެވެ.