ބައިނަލްއަގްވާމީ ޑިމޮކްރަސީ ދުވަސް މިއަދު ފާހަގަކުރާއިރު، ފެންނަނީ ރާއްޖެއިން ޑިމޮކްރަޓިކް ހަމަތަކާއި އުސޫލުތަކާ ދުރަށް ދާތަން ކަމަށް މޯލްޑިވިއަން ޑިމޮކްރެޓިކް ޕާޓީ (އެމްޑީޕީ)ގެ ރައީސް އަބްދުﷲ ޝާހިދު ވިދާޅުވެއްޖެއެވެ.
އެކްސްގައި ކުރެއްވި ޕޯސްޓެއްގައި ޝާހިދު ވިދާޅުވީ ޑިމޮކްރަޓިކް ހަމަތަކާއި އުސޫލުތަކާ ދުރަށް މި ގައުމު ދިއުމަކީ ކަންބޮޑުވާ ކަމެއް ކަމަށެވެ.
ޝާހިދު ވިދާޅުވި ގޮތުގައި ޑިމޮކްރެޓިކް ހަމަތަކާއި ގައުމުގެ ތަރައްގީ ވަނީ ގުޅިލާމެހިފައެވެ. އެ ގޮތުން، ޑިމޮކްރަސީގައި ރާއްޖޭން ހޯދައިފައިވާ ކާމިޔާބީތަކާ ދުރަށް ނުދިޔުމަށް ގަދައަޅައި މަސައްކަތްކުރަން ޖެހޭނެކަމަށާއި، ޚިޔާލުފާޅުކުރުމާއި، އެއްވެއުޅުމުގެ މިނިވަންކަމާއި، އިންސާނީ ހައްގުތަކާއި ގާނޫނުގެ ވެރިކަން ނެގެހެއްޓުމަށް މަސައްކަތްކުރަން ޖެހޭނެކަމަށް ޝާހިދު ވިދާޅުވިއެވެ.
ޑިމޮކްރަސީ ދުވަހާ ގުޅިގެން ޕީއެންސީން ނެރުނު ބަޔާނުގައި ވަނީ ރައީސް ޑރ. މުޙައްމަދު މުޢިއްޒުގެ ސިޔާސަތުތަކާއެކު ރާއްޖޭގެ ތާރީޚުގައި ޑިމޮކްރަސީގެ އައު ބާބެއް ފެށިގެންދާނެކަން ޔަގީން ކުރާ ކަމަށް ބުނެފައެވެ. އަދި ޑިމޮކްރަސީ ތަންފީޒު ކުރުމުގައި މި ސަރުކާރުން ހޯދައިފައިވާ ކާމިޔާބީތައް ވެސް އެ ބަޔާނުގައި ފާހަގަކޮށްފައިވެއެވެ.
ޕީއެންސީގެ މަޖިލިސް މެންބަރުންނަށް ރައީސް މުޢިއްޒުގެ ފަރާތުން ކޮންމެ މަހަކު 50،000 ރުފިޔާ ދެއްވަމުން ގެންދެވުމަށްފަހު، މި މަހު 25،000 ރުފިޔާ އިތުރުކޮށް، ކޮންމެ މެންބަރަކަށް 75،000 ރުފިޔާ ދޫކޮށްފައިވާކަމަށް ބުނެ ބައެއް ޚަބަރުތައް އަންނަނީ ފެތުރެމުންނެވެ. އަދި އެ ޚަބަރު ފެތުރި ފަރާތާމެދު ފިޔަވަޅު އަޅާނެ ކަމަށް ވެސް ސަރުކާރުން ބުނެފައިވެއެވެ.
މި ކަމާ ގުޅިގެން ނޫސްވެރިންނަށް ބިރުދެއްކުން ވަގުތުން ހުއްޓާލުމަށް އެމްޑީޕީން ވަނީ މިދިޔަ ބުދަ ދުވަހު ސަރުކާރަށް ގޮވައިލައިފައެވެ. އެ ޕާޓީން ސަރުކާރަށް ގޮވައިލީ ނޫސްވެރިކަމަށް ހުރަސް އެޅުން ހުއްޓާލައި ނޫސްވެރިންނަށް ބިރު ދެއްކުމަށް ކުރަމުންދާ އެންމެހާ ކަންކަން ވަގުތުން ހުއްޓާލުމަށެވެ.
އަދި ގާނޫނުއަސާސީން ކަށަވަރު ކޮށްދީފައިވާ މިނިވަން ނޫސްވެރިކަން ކުރެވޭނެ ފަދަ މާހައުލެއް ސަރުކާރުން ކަށަވަރު ކޮށްދިނުމަށެވެ.