ކުރީ ސަރުކާރުން ގެއްލުމުގެ ބަދަލުގައި ބައެއް ފަރާތްތަކަށް ބަދަލުދިން ގޮތް ތަހުގީގު ކުރަން ނިންމުމާ ގުޅިގެން، އެއީ މި ސަރުކާރުން ފާޅުގައި ޑިމޮކްރަސީގެ ހައްގުގައި ތެދުވާ މީހުންނަށް ދިން އަނިޔާއެއް ކަމަށް އެމްޑީޕީގެ ރައީސް އަބްދުﷲ ޝާހިދު މިއަދު ވިދާޅުވެއްޖެއެވެ.
އެމްޑީޕީ ސަރުކާރުގައި ގެއްލުމުގެ ބަދަލުގައި ބައެއް ފަރާތްތަކަށް ބަދަލުދިން ގޮތުން, ކުރީގެ ރައީސް އިބްރާހީމް މުހައްމަދު ޞާލިހާއި، ކުރީގެ އިކޮނޮމިކް މިނިސްޓަރު ފައްޔާޒު އިސްމާއިލްގެ އިތުރުން ރައީސް އޮފީހުގެ ކުރީގެ މިނިސްޓަރު އަލީ ޝިޔާމްގެ މައްސަލަ ބަލައި ތަހުގީގެއް ހިންގައި، ދައުވާ ކުރަން ޖެހިއްޖެ ހާލަތެއްގައި ދައުވާކުރުމަށް, ޕްރޮސެކިއުޓާ ޖެނެރަލް (ޕީޖީ) އޮފީހަށް އެންގުމަށް ރައްޔިތުންގެ މަޖިލީހުން މިއަދުވަނީ ފާސްކޮށްފައެވެ.
މި ކަމާ ގުޅިގެން ޝާހިދު އެކްސްގައި ކުރެއްވި ޕޯސްޓެއްގައި ވަނީ މިއީ އިންސާފާއި ގައުމުގެ ކުރިމަގާއި ރައްޔިތުންގެ ހައްގުގައި ސަރުކާރުން ކުރި ކަމެއް ނޫން ކަމަށާއި، މިއީ ޑިމޮކްރަސީއާއި އޭގެ ހައްގުގައި ތެދުވާ މީހުންނަށް ދިން ހަމަލާއެއް ކަމަށެވެ. އެހެން ކަމުން ސަރުކާރަށް ނުހެއްލުމަށް އޭނާ ވަނީ ގޮވާލައްވައިފައެވެ.
ޝާހިދު ވިދާޅުވީ މިއީ ރައީސް ޑރ. މުހައްމަދު މުއިއްޒު ކޮންޓްރޯލް ކުރައްވާ ޕީއެންސީގެ ސުޕަމެޖޯރިޓީ މަޖިލީހުން، އެއްވެސް އަސާސެއް ނެތް ތުހުމަތުތަކެއްގެ މައްޗަށް ހިންގަން ނިންމި ތަހުގީގެއް ކަމަށެވެ. މި ކަމާ ގުޅިގެން ކަންބޮޑުވުން ފާޅުކުރައްވައި ޝާހިދު ވިދާޅުވީ، މިއީ ޞާލިޙްގެ ހެޔޮވެރިކަމާއި ޑިމޮކްރަސީގެ ކުރިމަގަށް ދިން ހަމަލާއެއް ކަމަށެވެ. މިއީ އަދުގެ ސަރުކާރުގެ ނާކާމިޔާބީތައް ފޮރުވަން ކުރިކަމެއްގެ ގޮތުގައި ވެސް އޭނާ ސިފަ ކުރެއްވިއެވެ.
ދަރަނި ބޮޑުވުމާއި މިނިވަންކަން ހަނިކުރުން ފަދަ ބޮޑެތި މައްސަލަތަކުގައި ޖަވާބުދާރީނުވެ، ސަރުކާރުން ރައްޔިތުންގެ ފޯކަސް ބަދަލު ކުރުމަށް މަސައްކަތް ކުރާ ކަމަށް ޝާހިދުވަނީ ވިދާޅުވެފައެވެ. އޭނާ ވިދާޅުވި ގޮތުގައި މިއީ ޖަވާބުދާރީވުމަށް ބިރުގަންނަ ސަރުކާރެއްގެ ފަރާތުން ފެންނާނެ ފަދަ އުކުޅުތަކެވެ.
މިދިޔަ އެމްޑީޕީގެ ސަރުކާރުން އެކި ކުންފުނިތަކަށް ގެއްލުމުގެ ބަދަލުގެ ގޮތުގައި 1.6 ބިލިއަނަށްވުރެ ގިނަ ރުފިޔާ ދޫކޮށްފައިވާ ކަމަށް ފިނޭންސް މިނިސްޓްރީގެ ހިސާބުތަކުން ދައްކައެވެ. މި މައްސަލައިގައި ތަހުގީގެއް ހިންގުމަށް ނިންމާފައިވާއިރު، 2019 އިން ފެށިގެން 2023 ވަނަ އަހަރާ ހަމައަށް ސޮއިކޮށްފައިވާ އެއްބަސްވުންތަކަކީ އުފެދުމުގައި ވެސް ބާތިލު އެއްބަސްވުންތަކެއް ކަމަށް ވެސް ވަނީ ނިންމައިފައެވެ.
އަދި އެ އެއްބަސްވުންތަކަށް ބަދަލު ދީފައިވާނަމަ އެ އަނބުރާ ދައުލަތަށް ނަގަން ބަންޑާރަ ނައިބަށް އެންގުމަށް މަޖިލީހުން ވަނީ ފާސްކޮށްފައެވެ. ހަމައެއާއެކު މާލިއްޔަތު ގާނޫނާ ޚިލާފަށް އެއްވެސް ބަޔަކަށް ބަދަލު ދީފައިވާނަމަ އެވެސް އަނބުރާ ދައުލަތަށް ނަގަން ބަންޑާރަ ނައިބަށް އަންގަން ވެސް ފާސްކުރިއެވެ.
އަމިއްލަ ފަރާތަކާއި ސަރުކާރާ ދެމެދު ވެފައިވާ އެއްބަސްވުންތަކާ ގުޅިގެން އުފެދިފައިވާ މައްސަލަތައް ހައްލުކޮށް، ގެއްލުމުގެ ބަދަލުދިނުމަށް އުފެއްދި ސެޓްލްމެންޓް ކޮމިޓީ މިދިޔަ އަހަރުގެ ނޮވެންބަރުގައި އުވައިލެއްވީ ރައީސް މުއިއްޒެވެ.