ފުވައްމުލަކު ސިޓީގައި މިއަދު ހެނދުނު ބިއްލޫރި ޝީޓުތަކެއް ވެއްޓި ހަތަރު މީހުން ޒަޚަމްވިއިރު، އޭގެ ތެރޭގައި ހިމެނޭ ބިދޭސީއެއް އިމަޖެންސީކޮށް ހެހިކޮޕްޓަރުގައި މާލެ ގެނެސް ފަރުވާދޭން ފަށައިފިއެވެ.
ފުލުހުން ބުނި ގޮތުގައި މި ހާދިސާ ހިނގީ ފުވައްމުލަކު ސިޓީގައި އޮތް ދޯންޏަކުން އަންލޯޑް ކުރަން އުޅުނު ބިއްލޫރި ޝީޓްތަކެއް އުފުލަން އުޅުމުގެ ތެރެއިންނެވެ.
އެ ހާދިސާގައި އަނިޔާވެފައި ވަނީ ދެ ދިވެއްސަކާއި ދެ ބިދޭސީންނަށް ކަމަށް ފުލުހުން މައުލޫމާތުދިނެވެ. އަދި މިހާރު އަނިޔާވި ހަތަރު މީހުން ހޮސްޕިޓަލަށް ފަރުވާ ދިނުމަށް ގެންގޮސްފައިވާ ކަމަށް ފުލުހުން ބުންޏެވެ.
"ސަން"އަށް މައުލޫމާތު ދެއްވަމުން ފުވައްމުލަކު ސިޓީގެ ޑެޕިއުޓީ މޭޔަރު މުޙައްމަދު ފިކުރީ ވިދާޅުވީ މިއަދު 15:30ހާއިރު، އެ ބިދޭސީމީހާ އިމަޖެންސީކޮށް، ހެލިކޮޕްޓަރުގައި މާލެ ގެންގޮސްފައިވާ ކަމަށެވެ.
މި ހާދިސާގައި އަނިޔާވި ދެ ދިވެހިންނާއި އަނެއް ބިދޭސީ މީހާއަށް ފުވައްމުލަކު ހޮސްޕިޓަލްގައި ފަރުވާދެމުން އަންނަ ކަމަށް އޭނާ ވިދާޅުވިއެވެ.