ހިޔާ ފްލެޓެއްގެ ތެރެއިން ތަކުރާރުކޮށް އަންހެނަކު ރޯ އަޑު އިވި، އެކަން ސާފުކުރަން ފުލުހުން އެޕާޓްމަންޓުގެ ދޮރު ހުޅުވަން އެދުމުން އެކަން ނުކޮށް، އެއްބާރުލުން ނުދިނުމުން، ބާރުގެ ބޭނުންކޮށް، އަންހެން މީހާ ސަލާމަތްކުރުމަށްފަހު ދެ މީހަކު ހައްޔަރުކޮށްފިއެވެ.
މި މައްސަލައާ ގުޅިގެން ހައްޔަރުކޮށްފައި ވަނީ އުމުރުން 20 އަހަރުގެ ހ. ލާމިޔާ، އަހުމަދު އުވައިސްއާއި 39 އަހަރުގެ މއ. ތުރީމޫންސް މުޙައްމަދު މުމީތެވެ.
މީޑިއާތަކާ ހިއްސާކުރި މެސެޖެއްގައި ފުލުހުން ބުނީ، ރޭ ދަންވަރުގެ ވަގުތެއްގައި ހިޔާ ފްލެޓުގެ އެޕާޓްމަންޓެއްގައި އަންހެނަކު ސަލާމަތަށް އެދި ގޮވައި، ރޯ އަޑުއިވޭތީ ފުލުހުން އެޓެންޑުވެފައިވާ ކަމަށެވެ.
އެކަން ސާފުކުރުމަށް ފުލުހުން ގޮސް އެޕާޓުމަންޓުގެ ދޮރު ހުޅުވަން ބުނުމުން، ފިރިހެނަކު ދޮރު ހުޅުވި ކަމަށާއި ފުރަތަމަ ފަހަރު، ކަމެއް ނުހިނގާ ކަމަށް ބުނެ ދޮރުލައްޕާ ތަޅުލީ ކަމަށް ފުލުހުން ބުނެއެވެ.
ނަމަވެސް އޭގެ ފަހުން ވެސް އަންހެން މީހާ ސަލާމަތަށް އެދި ހަޅޭއްލަވާތީ އެޕާޓްމަންޓުގެ ދޮރު ހުޅުވަން ތަކުރާރުކޮށް އެދުނު ކަމަށް ފުލުހުން ބުންޏެވެ.
އެކަމަކު، ދޮރު ހުޅުވަން ތަކުރާރުކޮށް އެންގުމުން ވެސް ނުހުޅުވި ކަމަށާއި އެހެންވެ ބާރުގެ ބޭނުންކޮށްގެން އެޕާޓްމަންޓުގެ ދޮރު ހުޅުވި ކަމަށް ފުލުހުން ބުންޏެވެ.
ފުލުހުން ބުނީ، އެޕާޓްމަންޓަށް ވަދެ އަންހެން މީހާ ސަލާމަތްކުރި ކަމަަށެވެ. ނަމަވެސް، މި ހާދިސާގައި އަންހެން މީހާ ސަލާމަތަށް އެދި ގޮވީ ސީދާ ކީއްވެކަމެއް، އަދި އަނިޔާއެއް ކޮށްފައިވާ ކަމެއް ސާފެއް ނުވެއެވެ.
ފުލުހުން އަންނަނީ މި މައްސަލަ ތަހުގީގު ކުރަމުންނެވެ.