މަގުމަތީން ދިޔަ އަންހެނެއްގެ އަތުން ފޭރުނު މައްސަލައެއްގައި ފިވެހި ފިރިހެނަކު ހައްޔަރުކޮށްފިއެވެ.
ފުލުހުން މީޑިއާތަކާ ހިއްސާކުރި މެސެޖެއްގައި ވަނީ މިދިޔަ ބުދަ ދުވަހުގެ ހެނދުނުގެ ވަގުތެއްގައި ލޮނުޒިޔާރަތް މަގުން ސައިކަލެއްގައި ދިޔަ އަންހެނެއްގެ އަތުން ވޮލެޓަކާއި މޯބައިލް ފޯނެއް ފޭރުނު މައްސަލައިގައި ދިވެހި ފިރިހެނަކު ކޯޓު އަމުރެއްގެ ދަށުން ހައްޔަރުކޮށްފައި ވާކަމަށެވެ.
މި މައްސަލައިގައި ހައްޔަރުކޮށްފައި ވަނީ ރ. އަލިފުށީ ހަބީބީހެޕް އުމުރުން 39 އަހަރުގެ އިސްމާޢީލް ސާއިފް ކަމަށް ފުލުހުން ބުނެއެވެ.
ފުލުހުން ބުނީ އެ އަންހެން މީހާގެ އަތުން އޭނާ ފޭރުނީ ސައިކަލެއްގައި ދަމުން ކަމަށެވެ. އަދި އެ ސައިކަލަކީ ވެސް ވަގަށް ނަގާފައިވާ ސައިކަލެއްކަން އެނގިފައި ވާކަމަށް ފުލުހުން ވަނީ ބުނެފައެވެ.
ފުލުހުން ބުނީ އޭނާ ފޭރުނު ވޮލެޓާއި ފޯނުވެސް ފުލުހުން ހޯދާފައި ވާކަމަށާއި އަދި އިސްމާޢީލް ސާއިފް ދުއްވި ސައިކަލު ވެސް ފުލުހުންގެ ބެލުމުގެދަށަށް ގެންގޮސްފައި ވާކަމަށެވެ.
މި މައްސަލަ ފުލުހުން ގެންދަނީ ތަހުގީގުކުރަމުންނެވެ.
ވައްކަމާ ފޭރުމުގެ މައްސަލަތަކަކީ ރާއްޖޭގައި މިހާރު ވަރަށްވެސް ބޮޑުވެފައިވާ މައްސަލައެކެވެ. އިއްޔެވެސް ވަނީ އަތުކުރި ގަޑިތަކަކާއި ފޯނެއް ވަގަށް ނެގި މައްސަލައެއްގެ ތުހުމަތުގައި ދިވެހި ފިރިހެނަކު ހައްޔަރު ކޮށްފައެވެ.
އޭނާގެ އުމުރުން 33 އަހަރު ވެފައި ވާއިރު ވައްކަމާ ފޭރުމުގެ އިތުން މިނޫންވެސް އެކި މައްސަލަތަކުގައި އޭނާ 100 ފަހަރަށް ހައްޔަރު ކޮށްފައި ވާކަމަށް ފުލުހުން ވަނީ ބުނެފައެވެ.