މޮސްކޯ (12 ސެޕްޓެމްބަރު 2024): އެމެރިކާގެ ނުރައްކާ ބޮޑުވަމުންދާނަމަ ޗައިނާއާއި ރަޝިއާ ގުޅިގެން އެމެރިކާއާ ކުރިމަތިލާނެ ކަމަށް ރަޝިއާ ބުނެފިއެވެ.
މިކަމާބެހޭގޮތުން ވާހަކަ ދައްކަވަމުން ރަޝިއާ ޚާރިޖީ ވުޒާރާގެ ތަރުޖަމާނު މާރިއާ ޒަޚަރޯވާ ވިދާޅުވީ އެމެރިކާގެ ފަރާތުން ކުރިމަތިވާ އަސްކަރީ ނުރައްކާތަކާ ކުރިމަތިލުމުގައި ރަޝިއާއާ ބައިވެރިވެރިވާނެކަމުގެ ޔަގީންކަން ޗައިނާގެ ފަރާތުން ލިބިފައިވާކަމަށެވެ.
ޒަޚަރޯވާ މިމޭރުމުން ވާހަކަ ދެއްކެވީ ރަޝިއާއާއި ޗައިނާގެ އަވަށްޓެރި ގައުމެއް ކަމަށްވާ ޖަޕާނުގައި އެމެރިކާއިން "ޓައިފޫން" މަރުކާގެ މެދު ރާސްތާގެ މިސައިލް ރުކުރުވާލަން މަސައްކަތްކުރާ ކަމުގެ އަޑުތައް ފެތުރުމާ ގުޅިގެންނެވެ. ޖަޕާނުގައި އިނގިރޭސިބަހުން ނެރޭ ނޫހެއްކަމަށްވާ "ޖަޕާން ޓައިމްސް" ބުނާގޮތުން އެމެރިކާ ގެންދަނީ ޖަޕާނުގައި "ޓައިފޫން" މަރުކާގެ މިސައިލް ބެހެއްޓުމާމެދު ޖަޕާން ސަރުކާރާ މަޝްވަރާ ކުރަމުންނެވެ.
ޗައިނާއާއި ރަޝިއާގެ އަސްކަރީ ތަމްރީންތައް
ޖަޕާނަކީ ދެވަނަ ބޮޑު ހަނގުރާމައަށްފަހު އެމެރިކާ ފަޅީގައި އޮންނަ އަދި އެމެރިކާއަށް އަސްކަރީގޮތުން ވަރަށް ބޮޑަށް ބަރޯސާވާ ގޮތަށް ނިޒާމު ބައްޓަންކޮށްފައިވާ ގައުމެކެވެ. ދެވަނަ ބޮޑުހަނގުރާމައިގައި އެމެރިކާވަނީ ޖަޕާން ހިފައިފައެވެ. އެމެރިކާ ޖަޕާނުން ފޭބީ އެމެރިކާ ބޭނުންވާގޮތަށް މުޅި ޖަޕާން ބައްޓަންކޮށްފައެވެ. މީގެތެރޭގައި ޖަޕާން މީހުންގެ ފިކުރާއި ވިސްނުންވެސް އެމެރިކާއަށް ފައިދާވާގޮތަށް ބަދަލުކުރުމާއި ޖަޕާނުގައި އެމެރިކާގެ އަސްކަރީ ބޭސްތައް ގާއިމް ކުރުމާއި އެމެރިކާގެ 30 ހާހަށްވުރެ ގިނަ ސިފައިން ޖަޕާންގައި ބޭތިއްބުން ހިމެނެއެވެ.
ދެވަނަ ބޮޑު ހަނގުރާމައިގެ ކުރިން ޖަޕާނަކީ އެމެރިކާއަށް ގޮންޖަހަމުންދިޔަ އަދި އަވަށްޓެރި ޗައިނާއާއި ކޮރެއާ ފަދަ ގައުމުތަކަށް އަރައިގަންނަމުން ދިޔަ އިސްތިއުމާރީ ބާރެކެވެ. ދެވަނަ ބޮޑުހަނގުރާމައިގާ ޖަޕާން ގެންދިޔައީ ނާޒީ ޖަރުމަނާ އަދި އޭރުގެ އިޓަލީއާ ގުޅިގެން އެމެރިކާ އާއި އިނގިރޭސިވިލާތުގެ ފަޅިއާ ދެކޮޅަށް ހަނގުރާމަ ކުރަމުންނެވެ. މިހަނގުރާމައިގާ އެމެރިކާވަނީ ޖަރުމަނު ބަލިކޮށްލުމަށްފަހު ވަރަށް ވޭންދެނިވި ގޮތަކަށް ޖަޕާންވެސް ބަލިކޮށްލާފައެވެ.
އެމެރިކާވަނީ ޖަޕާން ބަލިވަމުންދަނިކޮށް ޖަޕާނަށް އެޓަމިކް ބޮން އަޅައި އެބޮމުގެ ބާރު ތަޖުރިބާކޮށް އޭގެ ވޭންދެނިވި އަނިޔާތައް ތަހައްމަލުކުރަން ޖަޕާން ރައްޔިތުންނަށް ޖައްސާފައެވެ. އެޓޮމިކް ބޮމުން އިންސާނުންނަށް ލިބޭ ގެއްލުން ތަޖުރިބާ ކުރުމަށް ފުރުސަތު ބަލާފައި އެމެރިކާ ބޭނުންކުރީ ޖަޕާނުގެ ރައްޔިތުންނެވެ.
ދެވަނަ ބޮޑުހަނގުރާމައިގައި ޖަޕާން ބަލިވަމުން ދަނިކޮށް އެމެރިކާ ޖަޕާނަށް އެޓަމިކް ބޮމުގެ ދެ ބޮން ވައްޓާލިއެވެ. އެދެބޮމުން ވަގުތުން ޖަޕާނުގެ ދޮޅުލައްކަ މީހުން މަރުވެގެން ދިޔައިރު އެ ބޮމުގެ ނިއުކްލިޔާ ރޭޑިއޭޝަންތަކުން ލިބުނު ގެއްލުންތަކުގައި ޖަޕާނުގެ މިލިޔަނެއްހާ މީހުން މަރުވެގެން ގޮސްފައިވެއެވެ. މިއާއެކު ޖަޕާން އެމެރިކާއަށް އަމާންދީ އެމެރިކާގެ ކޮންޓްރޯލްގެ ދަށަށް ދިޔައެވެ.
ޗައިނާއާއި ރަޝިއާގެ އަސްކަރީ ތަމްރީންތަކުގައި ބައިވެރިވި ރަޝިއާގެ ނިއުކްލިޔާ ސަބްމެރިން އެއް
އެއަށްފަހު އެމެރިކާ، ޖަޕާން ނެރުނީ އެމެރިކާއަށް ވާގިވެރިވާ ގައުމެއްގެ ގޮތުގައެވެ. ޖަޕާނުގެ ހުރިހާ އެއްޗެއް ބަދަލުކޮށްލާފައެވެ. މީގެތެރޭގައި ޖަޕާނު މީހުންގެ ވިސްނުމާއި ފިކުރާއި މަސްލަހަތުވެސް ހިމެނެއެވެ.
"ޖަޕާން ޓައިމްސް" ބުނާގޮތުން އެގައުމުގައި "ޓައިފޫން" މަރުކާގެ މިސައިލް ރުކުރުވާލަން އެމެރިކާ މަސައްކަތްކުރަނީ އެ މިސައިލް ބޭނުންކޮށްގެން ޖަޕާން ސިފައިންނާއެކު އެމެރިކާ ބާއްވާ ތަމްރީންތަކެއްގައި ބޭނުންކުރުމަށެވެ. މިމައްސަލާގައި ޗައިނާވެސްވަނީ ކަންބޮޑުވާކަން ހާމަކޮށްފައެވެ.
ރަޝިއާ ޚާރިޖީ ވުޒާރާގެ ތަރުޖަމާން ޒަޚަރޯވާ ވިދާޅުވިގޮތުގައި އެކިބާވަތުގެ ހަތިޔާރުތައް ރުކުރުވާލައިގެން ބިރުދައްކަން އުޅޭނަމަ އެމެރިކާއަށް އޮތީ ރަޝިއާއާއި ޗައިނާ ގެ ގުޅިފައިވާ ބާރާ ކުރިމަތިލުމެވެ. އެމެރިކާ ޖަޕާނުގައި މިސައިލް ބަހައްޓައިގެން ރަޝިއާއާއި ޗައިނާއަށް ބިރުދައްކަން އުޅެފިނަމަ އެމެރިކާއާ ދެކޮޅަށް ގުޅިގެން ނުކުންނަން ރަޝިއާ އާއި ޗައިނާ އޮތީ ތައްޔާރަށެވެ.
ރަޝިއާއާއި ޗައިނާއަކީ ސްޓްރެޓީޖިކް ލެވެލްގައި އިގްތިސާދީ ގޮތުންނާއި ޖިއޮޕޮލިޓިކަލް ގޮތުން ވަރަށް ބޮޑަށް ގުޅިގެން މަސައްކަތްކުރާ ދެގައުމެވެ. އަސްކަރީގޮތުންވެސް ދެގައުމުގެ ގުޅުން ސްޓްރެޓީޖިކް ލެލެވްގައި އޮތް ކަމަށް ރަޝިއާ ބުނެއެވެ. ޗައިނާ މިކަން ކަށަވަރުކޮށް ނުދިންނަމަވެސް މިކަން ދޮގެއް ނުކުރެއެވެ.
ޗައިނާ ގެންދަނީ ހަތިޔާރު އުފެއްދުމަށް ރަޝިއާ ބޭނުންވާ މަތީ ޓެކްނޮލޮޖީގެ އިލެކްޓްރޯނިކް ޗިޕްތަކާއި ސެމިކޮންޑަކްޓާސް ތައްފަދަ ހައިޓެކްގެ ގިނަ ބާވަތްތަކެއް ރަޝިއާއަށް ފޯރުކޮށްދެމުންނެވެ. މިއީ އެމެރިކާ އިންތިހާއަށް ރުޅިއަންނަ ކަމެކެވެ.
މީގެއިތުރުން ޗައިނާ އާއި ރަޝިއާ އިސްވެތިބެ އީރާންފަދަ އެމެރިކާއާ އިދިކޮޅު ގައުމުތަކާ ގުޅިގެން އަސްކަރީ ތަމްރީންތައްވެސް ފުޅާދާއިރާއެއްގައި ބާއްވަމުން ގެންދެއެވެ. ދާދިފަހުންވެސް ޗައިނާއާއި ރަޝިއާ އަދި އީރާނާއި އެނޫންވެސް ބައެއް ގައުމުތައް ގުޅިގެން ކެސްޕިއަންކަނޑާއި ޖަޕާން ކަނޑާ އަދި ރީނދޫ ކަނޑުގައިވަނީ އަސްކަރީ ތަމްރީންތަކެއް ކުރިޔަށް ގެންގޮސްފައެވެ.
ނަމަވެސް އެމެރިކާ ނޭޓޯ އުފައްދާފައިވާ ގޮތަށް އަސްކަރީ ޖަމާއަތްތައް ހަދައިގެން ގައުމުތަކަށް ބިރުދައްކައި ދުނިޔޭގައި ހަންފެތުރުމުގެ ސިޔާސަތުތަކެއް ޗައިނާއާއި ރަޝިއާ ގުޅިގެން ކުރިއަކަށް ނުގެންދެއެވެ. ރަޝިއާ ބުނާގޮތުން އެގައުމުން ޗައިނާއާއެކު ބާއްވާ އަސްކަރީ ގުޅުންތަކަކީ ތިންވަނަ ފަރާތަކަށް ބިރުދައްކަން ނުވަތަ ގޯނާކުރަން ބާއްވާ ގުޅުންތަކެއް ނޫނެވެ. ނަމަވެސް އެމެރިކާގެ ނުރައްކާ ބޮޑުވާނަމަ ދެގައުމު ގުޅިގެން އެމެރިކާއާ ކުރިމަތިލުމުގެ ގުޅުންތަކެކެވެ.